АТГ-аас 2022 оны арванхоёрдугаар сард “Нүүрсний хулгай”-н хэрэгт шалгагдаж буй 17 хүний нэрийг нийтэд зарласан. Ардын хувьсгалын “Анхны долоо” гэдэг шиг тэд Нүүрсний хулгайн “Анхны 17” гэж алдаршицгаасан. Атал одоо “Анхны 17”-ноос Х.Баттулга, Ө.Шижир, Н.Наранбаатар, Р.Сэддорж дөрөв торны цаана бус, Төрийн ордонд тохой залган сууж буй. УИХ-ын гишүүн Р.Сэддоржийн хувьд, алдарт “Ажнай” Д.Бат-Эрдэнийн хар бор ажлыг 20 гаруй жил хийж, хөлс хүчээ өргөсөн үнэнч туслах нь.  Тиймдээ ч “Ажнай” Д.Бат-Эрдэнэ Р.Сэддоржийг “Нүүрсний хулгай”-н хэргээс мулталч, улмаар УИХ-ын гишүүн болгосон. Өөрөөр бол, 2004 оноос хойш 20 жил улс төрд улиг болтлоо явсан “Ажнай” Д.Бат-Эрдэнэ Төрийн ордонд Р.Сэддорж болж “зүсээ хувиргаж” орж ирсэн гэхэд хилсдэхгүй.

ТУСЛАХААС ТҮШЭЭ ХҮРТЭЛ 24 ЖИЛ

Тэртээ 2000 оны УИХ-ын сонгуульд Өмнөговь аймагт “Ажнай корпораци” ХХК-ийн эзэн Д.Бат-Эрдэнэ нэр дэвшихээр бэлтгэл хангаж эхэлсэн. Ингэхдээ “Ажнай” Д.Бат-Эрдэнэ Өмнөговь аймгийн оюутан, залуучуудыг өөртөө татах зорилгоор “Говийн ирээдүй” гэх клуб байгуулсан. Улмаар Өмнөговь аймгийн уугуул, оюутнууд дундаа яриа хөөрөөтэй Хан-Уул дээд сургуулийн II курсийн оюутан Р.Сэддоржийг “Говийн ирээдүй” клубынхээ тэргүүнээр  томилж, сонгуулийн сурталчилгаандаа ажиллуулсан. Тэр жил “Ажнай” Д.Бат-Эрдэнэ УИХ-ын гишүүн болж чадаагүй ч насан туршдаа өөрт нь үнэнчээр зүтгэх Р.Сэддоржийг олж авсан байдаг.

Ингээд Р.Сэддорж 2002 оны хавар Хан-Уул дээд сургуулийг төгсмөгцөө Д.Бат-Эрдэнийн “Ажнай корпораци”-ийн Маркетингийн албаны даргаар ажиллаж эхэлсэн. Улмаар 2004 оны УИХ-ын сонгуульд “Ажнай” Д.Бат-Эрдэнэ дахин нэр дэвшиж, мөн л Р.Сэддорж сурталчилгаанд нь гүйсэн. Д.Бат-Эрдэнэ УИХ-ын гишүүнээр сонгогдож, тэр даруй Р.Сэддоржийг шадар туслахаараа томилсон байдаг. Ингээд Р.Сэддорж “Ажнай” Д.Бат-Эрдэнийн цув, цүнхийг барьж гүйж байгаад 2009 онд “Ажнай” Д.Бат-Эрдэнийн хувьцаа эзэмшдэг “Тавантолгой” ХК-ийн Санхүү, хангамж хариуцсан дэд захирал болж, 2013 онд “Тавантолгой” ХК-ийн Гүйцэтгэх захирал болж дэвшсэн.

“Тавантолгой” ХК-ийн Гүйцэтгэх захирлаар долоон жил ажиллаад 2020 онд Өмнөговь аймгийн Засаг даргаар томилогдсон. Засаг даргаар дөрвөн жил ажиллаад өнгөрөгч 2024 онд УИХ-ын гишүүн болсон. Товчхондоо, Р.Сэддорж “Ажнай” Д.Бат-Эрдэнийн туслах болж, түүнд 24 жил үнэнчээр зүтгэсний эцэст түшээ болсон нь энэ.

Өнгөрсөн 24 жил УИХ-ын гишүүн Р.Сэддорж хувьдаа бизнес хийгээгүй боловч өдгөө 750 сая төгрөгийн дөрвөн орон сууцтай, 200 сая төгрөгийн Land Cruiser-300 хөлөглөдөг, 222 сая төгрөгийн хурдан удмын 23 адуутай, 150 сая төгрөгийн үнэт эдлэлтэй, 300 сая төгрөг хадгаламжтай буюу түшээд дундаа түрийвчээрээ хоцрохооргүй болж томорчээ.

Р.СЭДДОРЖ ӨМНӨГОВЬ АЙМГИЙН ЗАСАГ ДАРГААР ДӨРВӨН ЖИЛ, ХҮРГЭН АХ Л.БАТЧУЛУУН ӨМНӨГОВЬ АЙМГИЙН ИТХ-ЫН ДАРГААР ДОЛООН ЖИЛ АЖИЛЛАСАН

УИХ-ын гишүүн Р.Сэддорж өнгөрсөн хугацаанд ганцхан “Ажнай” Д.Бат-Эрдэнээр татуулж, тордуулж ирсэн юм биш. Тухайлбал, УИХ-ын гишүүн Р.Сэддоржийн ээжийнх нь төрсөн дүү буюу нагац эгч Э.Жугарсүрэн гэж хүн бий. Э.Жугарсүрэн нь Өмнөговь аймгийн Төрийн банкны захирлаар ажиллаж байсан. Одоо Өмнөговь аймаг дахь Монголбанкны салбарын захирлаар ажилладаг. Ноцтой нь, Э.Жугарсүрэн нь Бавуугийн Түвшинбаяртай “Их говийн үндэстэн” ХХК-ийг хамтран эзэмшиж байсан. Харин Б.Түвшинбаяр нь “Ажнай” Д.Бат-Эрдэнийн үеэл бөгөөд 2012-2016, 2021-2023 онд “Тавантолгой” ХК-ийн ТУЗ-ийн даргаар ажиллаж байсан нэгэн.

Цаашилбал, УИХ-ын гишүүн Р.Сэддоржийн ээжийнх нь төрсөн дүү буюу нагац эгч Э.Оюунмаам нь Үндэсний статистикийн хорооны Өмнөговь аймгийн дахь хэлтсийн даргаар ажиллаж байсан. Ноцтой нь, Э.Оюунмаамын нөхөр буюу Р.Сэддоржийн хүргэн ах Л.Батчулуун нь 2008-2012, 2013-2016 онд Өмнөговь аймгийн ИТХ-ын даргаар, 2016-2020 онд Өмнөговь аймгийн ИТХ-ын тэргүүлэгчээр, 2020 оноос хойш Өмнөговь аймгийн ИТХ-ын Нарийн бичгийн даргаар ажиллаж байгаад өнгөрөгч нэгдүгээр сард өөрийн хүсэлтээр чөлөөлөгдсөн.

Өөрөөр хэлбэл, УИХ-ын гишүүн Р.Сэддоржийн нагац эгч Э.Оюунмаамын нөхөр Л.Батчулуун нь Өмнөговь аймгийн ИТХ-ын даргаар долоон жил ажилласан нэгэн бол, нөгөө нагац эгч Э.Жугарсүрэн нь “Тавантолгой” ХК-ийн ТУЗ-ийн дарга асан Б.Түвшинбаяртай халаас нэгтэй явж ирсэн. Тэгэхээр УИХ-ын гишүүн Р.Сэддоржийн ээж талынхан нь Өмнөговь аймагтаа томчууд гэдэг нь төвөггүй ойлгогдож байгаа биз ээ.

ӨМНӨГОВИЙН МАФИ

УИХ-ын гишүүн Р.Сэддорж, алдарт “Ажнай” Д.Бат-Эрдэнэ хоёрын санаачилгаар байгуулагдсан “Өмнөговь бүтээн байгуулалтын корпораци” ХХК гэж бий. Доороо 50 компанитай. Тухайн 50 компани нь Өмнөговь аймгийн барилга, бүтээн байгуулалтын тендерүүдийг хувааж авахаас гадна “Тавантолгой” ХК-ийн хөрс хуулалт, нүүрс олборлолт, нүүрс тээврийн ажлыг хувааж гүйцэтгэдэг. Үндсэндээ “Өмнөговь бүтээн байгуулалтын корпораци” ХХК нь “Ажнай” Д.Бат-Эрдэнэ, УИХ-ын гишүүн Р.Сэддорж хоёрын Өмнөговь дахь “мафи” гэж хэлж болно. Тухайлбал, “Өмнөговь бүтээн байгуулалтын корпораци” ХХК-ийг

• УИХ-ын гишүүн асан “Ажнай” Д.Бат-Эрдэнийн “Тавантолгой транс” ХХК,
• “Ажнай” Д.Бат-Эрдэнийн ээж Д.Хуушааны “Мөнгөн буур” ХХК,
• Өмнөговь аймгийн Засаг дарга Р.Сэддоржийн “Галтваань” ХХК,
• Өмнөговь аймгийн ИТХ-ын төлөөлөгч, “Тавантолгой” ХК-ийн ТУЗ-ийн дарга асан Б.Түвшинбаярын “Жуулчин говь” ХХК,
•  Өмнөговь аймгийн ИТХ-ын төлөөлөгч Ч.Жаргалсайханы “Өмнөговь-Интерпрайз” ХХК,
• Өмнөговь аймгийн ИТХ-ын төлөөлөгч Ч.Жаргалсайханы охин Ж.Энхчимэгийн “Ундарга өмнөговь” ХХК,
• Өмнөговь аймгийн Даланзадгад сумын ИТХ-ын төлөөлөгч асан Ч.Батжаргалын “Шанх транс” ХХК,
•  Өмнөговь аймгаас УИХ-ын гишүүнээр сонгогдон ажиллаж байсан, Барилга, хот байгуулалтын сайд асан Ц.Баярсайханы “Говийн-Өндөр” ХХК,
• Өмнөговь аймгийн ИТХ-ын төлөөлөгч, “нүүрсний хулгай”-н хэрэгт шалгагдаж буй Б.Эрдэнэ-Очирын “Уужим од” ХХК,
• Өмнөговь аймгийн ИТХ-ын төлөөлөгч Д.Баттүвшингийн “Ханбогд индастри” ХХК,
• Өмнөговь аймгийн ИТХ-ын төлөөлөгч В.Мөнхбатын “Хүннүгийн говь” ХХК,
• Өмнөговь аймгийн ИТХ-ын төлөөлөгч Н.Хүрлээгийн “Эрхэмсүлд Монгол” ХХК,
•  Өмнөговь аймгийн Баяндалай сумын ИТХ-ын төлөөлөгч Х.Мартбаярын “Цэнгүүндалай” ХХК,
• Баяндалай сумын ИТХ-ын төлөөлөгч асан А.Оюунжаргалын “Тод-Өөдлөх” ХХК,
• Өмнөговь аймгийн ИТХ-ын төлөөлөгч асан Т.Золжаргалын “Номгон монгол инвест” ХХК-ууд хамтран эзэмшдэг.
• Ганц жишээ дурдахад, “Өмнөговь бүтээн байгуулалтын корпораци” ХХК-ийг хамтран эзэмшигч Ч.Мөнхбаярын “Ёл Ази” ХХК нь “Таван толгой” ХК-ийн хөрс хуулалт, нүүрс олборлолтыг хариуцаж ирсэн. Өнгөрөгч 2024 онд л гэхэд “Ёл Ази” ХХК нь “Тавантолгой” ХК-ийн хөрс хуулалт, нүүрс олборлолтын ажлыг гүйцэтгэх 268 тэрбум төгрөгийн тендерт шалгарсан байдаг.
• Цаашилбал, Ч.Мөнхбаярын “Ёл ресурс” ХХК нь “Тавантолгой” ХК-ийн нүүрсийг урагш нь зөөдөг, харин “Ёл повер” ХХК нь “Таван толгой” ХК-ийн дэргэд “Нүүрс угаах үйлдвэр” байгуулж буй.