Налайх дүүргийн ИТХ-ын төлөөлөгчид аяллын хөтөлбөрөө туршлага судлах болгон өөрчилж, төсвийн 85 сая төгрөгөөр Туркт зугаалсан гэх зураг, мэдээлэл олон нийтийн сүлжээгээр өнгөрсөн жил цацагдсан. Тухайн үед АТГ-ынхан тэднийг шалгаж, Налайх дүүргийн ИТХ-ын даргын захирамжаар ИТХ-ын төлөөлөгчдийг чадавхжуулах сургалтад 29 хүнийг хамруулахаар шийдвэрлэж, аялал жуулчлалын үйл ажиллагаа эрхэлдэг аж ахуйн нэгжтэй гэрээ байгуулахдаа аяллын хөтөлбөрийг “туршлага судлах” гэж өөрчлөн баталж, улмаар дүүргийн 2022 оны төсөвт нэмэлт, өөрчлөлт оруулах тухай тогтоолоор ИТХ-ын даргын урсгал зардлаас 85.000.000 төгрөг зарцуулсан болохыг тогтоосон байдаг. Мөн Налайх дүүргийн дарга нар аялал жуулчлалын гол бүсийг хөгжүүлэх ажил хийдэггүй гэх яриа жилийн жилд гардаг. Харин энэ жилийн орон нутгийн сонгуульд Налайх дүүргээс нэр дэвшигчдийг танилцуулж байна.

-Дамдинсүрэнгийн Отгонсүрэн нь 1991-1999 онд Налайх дүүргийн 100-р сургууль, 1999-2001 онд УБИС-ийн лицей байгалийн ухааны гүнзгийрүүлсэн сургалттай дунд сургууль төгссөн. 2001-2006 онд ШУТИС-ийн КТМС-ийн Мэдээллийн системийн инженер, 2009-2013 онд Тайванийн Минчуан их сургуулийн Олон улсын худалдаа, бизнесийн удирдлага, 2014-2016 онд ШУТИС-ийн ГУУС-ийг Уул уурхайн менежментээр сурч төгссөн. Тэрбээр 2006 онд "Өнөр" БСОБХХК-д менежер, 2014 онд УИХ-ын Тамгын газарт эдийн засгийн референт, 2016 онд УИХ дахь МАН-ын бүлгийн эдийн засгийн зөвлөхөөр ажиллаж байсан.

Харин НИТХ-ын төлөөлөгчдийг сонгох сонгуульд Ардчилсан намаас Н.Гансүх, Т.Энхсайхан нар нэр дэвшиж байгаа. 

-Норовсамбуугийн Гансүх нь 2016 онд Ардчилсан намд элсэж, Эрүүл мэндийн сайдын хэвлэлийн төлөөлөгч, УИХ-ын гишүүний зөвлөх, АН-ын Стратеги, бодлого судалгааны хүрээлэнгийн ажлын албаны дарга, АН-ын даргын дэргэдэх бизнес зөвлөлийн тэргүүн, УИХ дахь АН-ын Бүлгийн орон тооны бус зөвлөхөөр тус тус ажиллаж байсан. Олон нийтэд "Mongol HD" телевизийн "Apprentice Mongolia" шоуны шилдэг оролцогч гэдгээрээ танигдсан. Тэрбээр одоо Ардчилсан намын Бизнес хөгжил, технологи, инноваци хариуцсан Нарийн бичгийн даргаар ажилладаг. Эрх зүйч мэргэжилтэй, Төрийн удирдлагын докторын зэрэгтэй. “Тахь ресурс” компанийн дэд захирлаар ажилладаг.

-Тэрбишийн Энхсайхан нь Ш.Батсуурь аваргын зээ охин. Ц.Нямдоржийг Хууль зүй, дотоод хэргийн сайдаар ажиллаж байхад нь огцрохыг шаардаж, жагсаал зохион байгуулж явсан. Бүр Ц.Нямдоржийг огцруулах хөдөлгөөний тэргүүн гэх давхар гуншинтай. Харин түүнийг 2021 онд Прокурорын газраас хуулиар хориглосон газарт эрх бүхий байгууллагад бүртгүүлэлгүйгээр жагсаал цуглаан зохион байгуулсан, хорио цээр, хөдөлгөөний хязгаарлалт зөрчсөн хэмээн үзэж, Зөрчлийн хэрэг үүсгэн шалгаж байсан. Мөн 2021 оны гуравдугаар сард “Мөнгөний сонгууль хийхийг эсэргүүцэж байна” хэмээн Ардчилсан намын даргын сунгаанаас нэрээ татаж буйгаа хэвлэлээр дамжуулж байв. Харин 2016 онд 29 дүгээр тойрогт Ардчилсан намаас нэр дэвшихдээ “Мөнгөний гачаалаас гаргаж, санхүүгийн эрх чөлөөнд хүргэнэ” гэх мөрийн хөтөлбөрөөр улс төрд хүч үзэж байсан. Мөн 2020 онд УИХ-д нэр дэвшиж, өвдөг шороодоод согтуу лайв хийж, олны ярианы бай болсон. Тэрбээр өөрийгөө Японы алдарт Мейжигийн их сургуулийг эдийн засаг, санхүүч мэргэжлээр төгссөн Монголын анхны оюутан хэмээн тодотгодог. “Фүжи холдинг” ХХК-ийн захирлаар ажилладаг бизнесмен.