УИХ-ын гишүүн Б.Дэлгэрсайхан Дорноговь аймгийг өөрийн “Вант улс” болгосон нэгэн. Учир нь, УИХ-ын гишүүн Б.Дэлгэрсайхан Дорноговьд нүүрсний уурхайтай, Дорноговь аймгийн нүүрсний уурхайнуудын нүүрсийг Ханги боомтоор гаргах төмөр замтай. Дорноговь аймгийн ИТХ болон сумдынх нь ИТХ-ын төлөөлөгчид, төрийн байгууллагууд нь ч түүний “тавиул”-уудаар дүүрсэн. Жишээ дурдахад, Б.Дэлгэрсайханы Баянголын уурхайн тусгай зөвшөөрөл нь түүний “Миллениум диггерс” ХХК-ийн нэр дээр бүртгэлтэй байдаг. Тус компанийнх нь гүйцэтгэх захирлаар Хоролжавын Гантөмөр гэгч ажилладаг бөгөөд Дорноговь аймгийн Замын-Үүд сумын ИТХ-ын төлөөлөгчөөр давхар ажилладаг. Б.Дэлгэрсайханы төрсөн дүү Б.Ганхуягтай “Их дэлгэрэх хэт” ХХК-ийг 2016 оноос хойш хамтран эзэмшиж байгаа Пүрэвжавын Бямбанаранжав нь Дорноговь аймгийн ИТХ-ын төлөөлөгчөөр сонгогдон ажиллаж буй. Энэ мэтээр цааш үргэлжилнэ.

          УИХ-ын гишүүн Б.Дэлгэрсайханы төмөр замуудын тухайд, тэр “Монголиан транс лайн”, “Монголиан транс ложистик” ХХК гэх төмөр зам барьдаг, төмөр замаар төмрийн хүдэр, нүүрс тээвэрлэдэг хоёр компанитай. “Монголиан транс ложистик” ХХК-аараа 2009 онд Сэлэнгэ аймгийн Ерөө сумын нутагт байрлах “Баянгол”-ын уурхай руугаа 100 гаруй км төмөр зам тавьж, Монголын анхны хувийн төмөр замтай хүн болж байв. Дараа нь, 2019 онд Дорноговь аймгийн Алтанширээ суманд төмрийн хүдэр баяжуулах үйлдвэр барьж, тэр үйлдвэр рүүгээ 12 км төмөр зам барьж байв. Үргэлжлүүлэн, өнгөрөгч 2022 оны оны гуравдугаар сард “Монголиан транс лайн”, “Монголиан транс ложистик” ХХК-аараа Засгийн газраас Зүүнбаян-Ханги чиглэлийн 226 км төмөр замыг концесс авсан. Улмаар өнгөрсөн оны арваннэгдүгээр сард барьж дуусгасан бөгөөд Ерөнхий сайд, салбарын сайд нарыг урьж, сүр дуулиантай нээлт хийсэн. Ирэх жилүүдэд буюу гэрээнд заасан 20 жилийн хугацаанд Дорноговь аймгийн Зүүнбаян-Ханги чиглэлийн төмөр замыг УИХ-ын гишүүн Б.Дэлгэрсайхан эзэмшинэ. Ингэснээр Монголоос урд хөрш рүү Ханги боомтоор гарах бүх нүүрс Б.Дэлгэрсайханаар дамжина гэсэн үг.

            Харин Дорноговь аймагт байх түүний уурхайнуудынх нь тухайд, УИХ-ын Б.Дэлгэрсайханы “Дорнын говь” ХХК-ийг түүний төрсөн дүү Б.Ганхуяг, түүний хүү Г.Гантулга нар хамтран эзэмшдэг. Тэгвэл Ганхуягийн Гантулга гэгч нь Б.Дэлгэрсайханы уурхайнуудыг хариуцдаг болоод буй. Тухайлбал, Г.Гантулга нь өдгөө “Нүүрсний хулгай”-н хэргээр хоригдож буй “Хишиг арвин индустриал” ХХК-ийн эзэн Б.Хишигдоржийн хүү Х.Батхишигтэй хамтран “Сора интернэшнл” ХХК-ийг эзэмшдэг ажээ. Харин “Сора интернэшнл” ХХК нь Дорноговь аймгийн Хөвсгөл сумын нутагт орших “Дадын хар толгой” нүүрсний ордод 2018 оноос хойш  Сор говь нэртэй нүүрсний уурхай ажиллуулж байгаа. Гэхдээ энэ бол УИХ-ын гишүүн Б.Дэлгэрсайханд хамаарах уурхайнуудын ганцхан нь гэдгийг онцлох нь зөв байх.