"SUN" БРЭНДИЙН ГАЗЫГ БНХАУ-Д ДУУРАЙЛГАЖ ҮЙЛДВЭРЛЭЭД, УЛСЫН ХИЛЭЭР НУУЦААР ОРУУЛЖ ИРДЭГ БАЙСАН ХЭРГИЙГ ШАЛГАЖ ЭХЭЛЛЭЭ

      “Sun” брэндийн ахуйн газны сав баглаа боодол, нэрийг дуурайлгаж, БНХАУ-д хууль бусаар үйлдвэрлээд улсын хилээр нууцаар оруулж ирдэг байж болзошгүй гэмт хэргийг “Мөн Зөв” ХХК-ийн ажилчид болон цагдаа нар үйлдэл дээр нь илрүүлжээ. Тодруулбал, “Sun” брэндийн ахуйн газыг дуурайлгаж, хуурамчаар үйлдвэрлээд, улсын хилээр нууцаар оруулж ирээд шууд орон нутаг руу тээвэрлэдэг байна. 

     “Мөн Зөв” ХХК нь “Sun” хэмээх нэрээр 20 дахь жилдээ буюу Монголд газ орж ирснээс хойш албан ёсны зөвшөөрөлтэйгөөр хэрэглэгчдэд бүтээгдэхүүнээ хүргэж байгаа. Ахуйн газыг тусгай зөвшөөрөлтэйгөөр, хий мэдрэгч байршуулсан газар борлуулах, ашиглах зориулалтаар хэрэглэдэг. Гэвч Хятадаас хууль бусаар оруулж ирдэг байж болзошгүй газыг бусад төрлийн ачаатай хольж буюу дунд нь нууж оруулж ирдэг байж болзошгүй байгаа юм. Тус хууль бус ашиглах зөвшөөрөлгүй газыг   "Нарантуул" болон Улаанбаатар хотын бусад дэлгүүрт худалдаалагддаггүй шууд орон нутаг руу тээвэрлэдэг байна. Энэ нь хууль бусаар оруулж ирсэн газыг хяналтгүй газар буюу алслагдсан сумдад их хэмжээгээр борлуулдаг байж болзошгүй урьдчилсан нөхцөл байдал үүсээд байгаа юм. 

“МӨН ЗӨВ” ХХК-ИЙН ЗАХИРАЛ С.БИЛГҮҮН: МАНАЙ ГАЗНЫ НЭРИЙГ АШИГЛАН ХЯТАДАД ХУУЛЬ БУСААР ҮЙЛДВЭРЛЭЭД ОРОН НУТАГ РУУ ТЭЭВЭРЛЭДЭГ АСУУДЛЫГ ЦАГДААД  МЭДЭГДСЭН Ч ШИЙДЭЖ ӨГӨӨГҮЙ

      Бид энэ хэргийн талаар “Мөн зөв” ХХК-ийн захирал С.Билгүүнээс тодруулсан юм. Тэрбээр “Манай бүтээгдэхүүний нэр, баглаа боодлыг ашиглаж, Хятадад үйлдвэрлээд Монголд хууль бусаар оруулж ирдэг асуудлыг бид коронавирусийн халдвар дэгдэхээс өмнө цагдаа нарт мэдэгдэж, хэрэг бүртгэл нээлгэсэн боловч шийдэгдээгүй. Энэ удаад бид хууль бус, дуураймал газыг орон нутаг руу тээвэрлэж байхад нь газар дээрт нь илрүүлж, цагдаад дуудлага өгчихсөн хүлээж байна. Тус бүтээгдэхүүнийг хэн оруулж ирдэг хэрхэн борлуулж байгааг мэдэхгүй. БНХАУ-ын хилээр газ оруулж ирэхийг хуулиар хориглосон. Гэвч хэн нь хууль зөрчиж, хориотой бүтээгдэхүүн оруулж ирээд орон нутаг руу тээвэрлэж байгааг яаралтай илрүүлэх хэрэгтэй байна. Тус бүтээгдэхүүнийг 18-аас дээш насныхан борлуулах, бусад төрлийн бараатай хамт тээвэрлэж болохгүй гэх мэт олон төрлийн хориглосон заалттай байдаг. Заалтын дагуу манай компани  20 жилийн турш хэрэглэгчдэд хүргэж байна. Мөн Монгол Улсын стандартаар англи, монгол хэлний тайлбартайгаар борлуулах ёстой байтал бидний хууль бус хэмээн үзэж буй тус газ зөвхөн хятад заавартай байгаа юм” гэлээ. Мөн Увс аймаг руу хууль бусаар оруулж ирсэн газыг тээвэрлэхээр ачиж байсан жолооч Б.Баянмөнхөөс тодруулсан юм.

ТЭЭВРИЙН ЖОЛООЧ Б.БАЯНМӨНХ: УВС АЙМАГ РУУ 100 ГАРУЙ ХАЙРЦАГ ГАЗ АЧУУЛСАН. БИ ӨМНӨ НЬ ГАЗ ТЭЭВЭРЛЭЖ БАЙГААГҮЙ

       “Би анх удаа энэ газыг Увс аймаг руу тээвэрлэж байна. Хууль бусаа оруулж ирсэн газ мөн бишийг би мэдэхгүй. Дуудлагын дагуу тээвэрлэсэн очоод ямар дэлгүүрт буулгахыг хэлээгүй. Карго ачаа учир холбогдох дугаарт залгаж хэлэх ёстой байсан байх. Би олон жил Улаанбаатар Увс чиглэлд ачаа тээвэрлэж байгаа. Өмнө нь ийм асуудалд орж байгаагүй. Өнөөдрийн байдлаар 100 гаруй хайрцаг газ ачуулсан. Нэг хайрцагт хэчнээн ширхэг байдгийг мэдэхгүй” гэсэн юм.

“НАРАНТУУЛ” ЗАХЫН ЦАГДАА: ХЯТАДЫН ХИЛЭЭР ХУУЛЬ БУСААР ОРУУЛЖ ИРСЭЭД УВС АЙМАГ РУУ ТЭЭВЭРЛЭХЭЭР ЗАВДСАН ГАЗЫГ ХУРААЖ АВНА

        “Нарантуул” захыг эргүүл, хамгаалалтын цагдаа учирч болзошгүй зөрчлийг газар дээр нь илрүүлж, хамгаалалтад авч ажилладаг. Дээрх хууль бусаар үйлдвэрлэж, борлуулахаар завдсан газыг хамгаалалтад авч, газар дээр нь ажилласан "Нарантуул" захын цагдаагаас зарим зүйлийг тодрууллаа. Тэрбээр “Баянзүрх дүүргийн хоёрдугаар хэлтэст дээрх асуудлын талаар дуудлага, мэдээлэл өгсөн. Цагдаа нар байцаалтын ажлаа дуусчихаад ирнэ гэсэн. Бид цагдаагийн бүрэлдэхүүн ирэхээр БНХАУ-аас хууль бусаар оруулж ирээд орон нутаг руу тээвэрлэхээр завдсан байж болзошгүй газыг хураан авч шалгалтын ажлыг эхлүүлнэ. Өмнө нь ийм асуудал үүсэж, цагдаад мэдэгдэж байсан эсэхийг мэдэхгүй” гэв.

ХЯТАДЫН ХИЛЭЭР ХУУЛЬ БУСААР ҮЙЛДВЭРЛЭСЭН ГАЗ ОРУУЛЖ ИРДЭГ УЛС ДАМНАСАН ГЭМТ ХЭРГИЙН АРД ХЭН БАЙДАГ ВЭ

       Хориотой бодис буюу ахуйн газыг хууль бусаар үйлдвэрлэж, хятадын хилээр нууцаар оруулж ирдэг улс дамнасан гэмт хэргийг ард улс төрд болон хууль, гаалийн байгууллагад нөлөө бүхий хүмүүс байж болзошгүй юм. БНХАУ-д “Sun” брэндийн нэр, баглаа боодлыг дуурайлган хийж, хятадын хилээр нууцаар оруулж ирээд орон нутаг руу тээвэрлэх гэмт хэргийг  жирийн худалдагч толгой мэдэн хийж чадах уу. Өмнө нь дээрх зөрчлийг цагдаад мэдэгдсэн ч шийдээгүй өнгөрүүлсэн гэдэг. Магадгүй нөлөө бүхий этгээдийн толгойлдог гэмт хэрэг байсан учраас хэргийг шийдэж чадалгүй өнгөрүүлсэн байх магадлалтай гэдгийг эх сурвалжууд онцолж байлаа. Мөн сүүлийн үед ахуйн газ дэлбэрэх, өсвөр насныхан газ сорж, мансуурах, амиа алдах тохиолдол нэмэгдэж байгаа. Энэ нь хууль бус газыг зөвшөөрөлгүйгээр оруулж ирдэгтэй холбоотой байж болзошгүй юм.