БОАЖ-ын сайд Б.Бат-Эрдэнэ хариуцсан салбараа өөд татах гэж чадахаараа зүтгэж байна. Жуулчдыг олноор нь татахын тулд төрөл бүрийн арга хэрэглэж буй нь сайшаалтай. Тухайлбал, “Монголын аялал жуулчлалыг хөгжүүлэхийн тулд модон жорлонг халах хэрэгтэй” хэмээн төсөл хөтөлбөр хэрэгжүүлж, зуун дамнасан модон жорлонгоосоо салахаар зүтгэж байна. Үүнээс гадна саяхан цахим хуудастаа “Нэг жуулчин, нэг хонь” хөтөлбөр хийвэл хэрхэх вэ хэмээн санал, асуулга явуулжээ. Мөн хэвлэлд өгсөн ярилцлагадаа “Нутгийн иргэдэд суурилсан аялал жуулчлалыг хөгжүүлэхэд анхаарч ажиллана. Жуулчид Чингис хааны өлгий нутаг гээд Монгол орныг зорин ирэхэд “Чингис” нэртэй архинаас өөр бүтээгдэхүүн, үйлчилгээ байхгүй байгаад сэтгэл дундуур буцдаг гэсэн судалгаа бий. Тиймээс нутгийн иргэд өөрсдөө бүтээгдэхүүн хөгжүүлэгчид байх ёстой" гэсэн билээ. 

"Амралтаараа Египет рүү биш Монгол руу аялаарай" гэж уриалах болно

     Тэрбээр Монголын аялал жуучлалыг хөгжүүлэхийн тулд цахим сүлжээнд олон дагагчтай гадаадын одуудыг урилгаар авчирч эх орноо сурталчилан таниулах ажил эхлүүлсэн. Үүний дагуу БНСУ-ын топ моделиуд болон жүжигчид ирж, контент, нэвтрүүлэг хийж, Монголын тал нутгийг сурталчилан таниулах ажил хийсэн. Мөн эдгээр хүнтэй БОАЖ-ын сайд Б.Бат-Эрдэнэ уулзаж, Монгол Улсад аялуулах, тэднээр дамжуулж Монгол орны онцлог, дөрвөн улирлын аялал жуулчлалыг сурталчлах, хамтран ажиллах талаар санал солилцсон билээ. Үүнээс гадна БНЧУ-ын Шадар сайд бөгөөд Хөдөлмөр, нийгмийн хэргийн Сайд Мариан Юречкагтай байгаль орчин, аялал жуулчлалын салбарын хамтын ажиллагааг үргэлжлүүлэх, бататгах асуудлаар уулзалт хийжээ. Уулзалтын үр дүнд хоёр улсын хооронд аялал жуулчлалын чиглэлээр харилцан сурталчилгаа хийх, өдөрлөгүүд зохион байгуулах, мэдээллийн төвүүдийг байгуулах асуудлаар хамтран ажиллах хүсэлт тавьжээ. БНЧУ-ын Шадар сайд бөгөөд Хөдөлмөр, нийгмийн хэргийн Сайд Мариан Юречка "Монгол орныг Европын жуулчдад аялахад тохиромжтой, аюулгүй, тав тухтай орчинг бүрдүүлж буйг хэлж, иргэддээ амралтаараа Египет рүү биш Монгол руу аялаарай гэж уриалах болно" гэсэн байна. Энэ мэт хариуцсан салбараа хөгжүүлэх гэж зүтгэж, өөрийн чадах бүхнээ хийж буй сайдын дараагийн нүүдэл нь хонь өгөөд ч болтугай жуулчин авчрах арга хэрэгжүүлэх гэж байгаа бололтой. Ямартай ч хэрэгжүүлсэн хөтөлбөрүүд нь үр дүнд хүрж, Монголыг зорин ирэх жуулчдын тоо нэмэгдэж байвал болох нь тэр.

Засгийн газар аялал жуулчлалын салбарынханд 55 тэрбум төгрөгийн хөнгөлөлттэй зээр олгохоор шийдвэрлэсэн

                Манай улсын хувьд 2022 онд 290.414 гадны жуулчин хүрэлцэн ирж, 350 сая ам.доллар буюу 1.2 их наяд төгрөгийн орлого олсон” хэмээн БОАЖЯ-наас мэдээлсэн. 2023 онд сая жуулчин хүлээн авч, салбарын орлогыг 1.2 тэрбум ам.доллар буюу 4.2 их наяд төгрөгт хүргэж, ДНБ-ий 11.5 хувь, 2024 онд 16 хувьд хүргэхэд чиглүүлсэн үйл ажиллагаагаа явуулахаар зорьж буй талаар төрөөс зарласан. Дэлхийн аялал жуулчлалын салбар 2023 онд ковидын өмнөх үеийн үзүүлэлтэнд хүрэх гол зорилго тавьсан. Монгол Улсын хувьд 600 гаруй мянган гадны жуулчин авах шаардлагатай” хэмээн мэдэгдэж байв. Засгийн газар аялал жуулчлалыг хөгжүүлэх чиглэлд бодлогын түвшинд дорвитой анхаарч эхэлсэн. Үүнтэй холбогдуулаад Б.Бат-Эрдэнэ сайд “2023 ондоо багтаад ядаж нүхэн жорлонгоосоо салъя гэдэг зорилт дэвшүүлсэн. Үүний хүрээнд үе шаттай ажлууд хийж буй. Боловсон ариун цэврийн байгууламж байгуулсан газрыг аж ахуйн нэгжийн орлогын албан татвараас чөлөөлөх замаар хөрөнгө оруулалтыг нь буцаан олгох зохицуулалтыг Аялал жуулчлалын тухай хуульд тусгасан. Мөн жуулчид хүлээж авах бэлтгэлээ базааж, нүхэн жорлонгоосоо даруй салах чиглэлийг Аялал жуулчлалыг хөгжүүлэх үндэсний хорооноос орон нутгийн удирдлагуудад хүргүүлсэн. Түүнчлэн тусгай хамгаалалттай газарт үйл ажиллагаа явуулж буй амралтын газар, жуулчны баазуудыг 2023 оны дөрөв дүгээр сараас өмнө нүхэн жорлонгоосоо салахыг шаардаж байгаа. Биелүүлээгүй тохиолдолд тусгай зөвшөөрлийг нь цуцлах хүртэл арга хэмжээ авна. Хувийн хэвшлийнхний зүгээс тавьж байгаа гол асуудлуудын нэг нь санхүүгийн дэмжлэг буюу зээл. Үүний дагуу Засгийн газар аялал жуулчлалын салбарынханд 55 тэрбум төгрөгийн хөнгөлөлттэй зээр олгохоор шийдвэрлэсэн” мэдээлсэн билээ. 

        Хонь өгөөд ч болтугай аялал жуулчлалын салбарт өнгө оруулж, салхи сэвэлзүүлж, шинэ түвшинд хүргэх гэсэн Б.Бат-Эрдэнэ сайдын бас нэг аргыг монголчууд дэмжиж эхэлжээ. Эцсийн дүндээ, Монголыг зорих аялагчдын тоо, Монгол орны сайхан бүхнийг мэдрэх, бишрэх, түүнд оруулах хөрөнгө оруулалт бидэнд чухал билээ. Б.Бат-Эрдэнэ сайд аа, аялал жуулчлалыг л хөгжүүлж байвал мянган арга байсан ч иргэд дэмжихээр байна шүү...