-БРИГАДЫН ГЕНЕРАЛ Ц.АМГАЛАНБАЯРААР ХУУЛЬ ЗӨРЧСӨН ШИЙДВЭР ГАРГУУЛСАН Ц.ЦЭРЭНБАДАМ АЙМГИЙНХАА НИЙГМИЙН ДААТГАЛЫН ГАЗРЫН ДАНСЫГ ХААЛГАСАН ГЭВ ҮҮ-

         Хөвсгөл аймгийн Нийгмийн даатгалын газрын дансыг хаасан хэрэг гарчээ. Тодруулбал, тус аймгийн Шүүхийн шийдвэр гүйцэтгэх газрын алба хаагчид эрх мэдэл, албан тушаалаа урвуулан ашиглаж, Нийгмийн даатгалын газрын дансыг хаасан гэнэ.  Тус газрын дансыг хаах болсон шалтгаан нь Шүүхийн шийдвэр гүйцэтгэх газрын нэгэн ахмад ажилтан өндөр насны тэтгэвэртээ гарахаар болсон байна. Гэвч тэрбээр хуурамч бичиг баримт бүрдүүлэн тэтгэвэрт гарах гэж байсан нь илэрчээ. Үүнээс үүдэн хууль, журамд заасны дагуу “Гэмт хэрэгт холбогдож, шүүхээр ял шийтгэл авсан. Үүнээс үүдэн ажлаасаа халагдсан хүнд тэтгэвэр олгох боломжгүй” гэсэн хариу өгчээ. Дээрх үл ойлголцлоос үүдэн Шүүхийн шийдвэр гүйцэтгэх албаныхан аймгийн Нийгмийн даатгалын газрын дансыг хаачихсан бололтой.

Шүүхийн шийдвэр гүйцэтгэх ерөнхий газрын даргаар ажиллаж байсан Ц.Амгаланбаяр Ц.Цэрэнбадамд илт давуу байдал бий болгож, эрх мэдэл албан тушаалаа урвуулан ашиглаж, өөрийн хүсэлтээр ажлаас чөлөөлөгдсөн гэх утгатай тушаал, шийдвэр гаргаж өгчээ

          Албаны эх сурвалжаас авсан мэдээллээр Хөвсгөл аймаг дахь шүүхийн шийдвэр гүйцэтгэх  газарт тасгийн дарга бөгөөд ахлах шийдвэр гүйцэтгэгчээр ажиллаж байсан Ц.Цэрэнбадам нь тус аймгийн Сум дундын эрүүгийн хэргийн анхан шатны шүүхийн  2018 оны зургадугаар сарын 19-ний өдрийн 162 дугаар  шийдвэрээр гэмт хэрэг үйлдсэн нь тогтоогдсон байна. Ингээд шүүхээс ял шийтгэл авчээ. Гэмт хэрэг үйлдсэн алба хаагчийг ажлаас нь халсан гэнэ. Гэтэл Шүүхийн шийдвэр гүйцэтгэх ерөнхий газрын даргаар тухайн үед ажиллаж байсан Бригадын генерал Ц.Амгаланбаяр Ц.Цэрэнбадамд илт давуу байдал бий болгож, эрх мэдэл албан тушаалаа урвуулан ашиглаж, өөрийн хүсэлтээр ажлаас чөлөөлөгдсөн гэх утгатай тушаал, шийдвэр гаргаж өгчээ. Тэрбээр 2019 оны хоёрдугаар сарын 27-ны өдрийн Б302 дугаар тушаалаар гэмт буруутай буюу гэмт хэрэг үйлдсэн нь тогтоогдсон албан тушаалтныг 2016 оны наймдугаар сарын 10-ны өдрөөс өөрийн  хүсэлтээр ажлаас чөлөөлсөн хэмээн хууль бус тушаал гаргачихсан байна. Энэ нь илтэд хууль зөрчсөн үйлдэл юм.  

        Хөвсгөл аймгийн Нийгмийн даатгалын газрын нэгэн мэргэжилтэн бидэнд нэрээ нууцалж, сүүлийн үед өрнөж буй асуудлын талаар мэдээлэл өгсөн юм. Тэрбээр “Манай газарт шүүхийн шийдвэрийн ахмад ажилтан Ц.Цэрэнбадам тэтгэвэр тогтоолгохоор хүсэлт өгсөн. Түүнийг Хөвсгөл аймаг даяар гэмт хэрэгт холбогдож байсныг мэднэ. Гэтэл ажлаас өөрийн хүсэлтээр чөлөөлөгдсөн гэх бичиг, баримт бүрдүүлээд ирсэн байсан. Мэргэжилтэн лавлагаа гаргаж үзээд "Тэтгэвэр өгөх боломжгүй" гэсэн хуулийн тайлбар өгсөн. Гэтэл тэдний дунд үл ойлголцол үүсч, тус аймгийн шийдвэр гүйцэтгэх албанд хүсэлт гаргаад данс хаалгачихсан. Өөрөөр хэлбэл, өөрсийнхөө санаа зорилгыг биелүүлэхийн тулд төрийн байгууллагын данс барьцаалсан гэж хэлж болох юм. Үүнээс үүдэн асуудал үүсээд байна. Хууль, хяналтын байгууллага ч энэ асуудлыг шалгаж эхлээд байгаа юм билээ” гэв.  

          Өөр нэг эх сурвалжаас авсан мэдээллээр Шүүхийн шийдвэр гүйцэтгэх ерөнхий газрын даргаар тухайн үед ажиллаж байсан Ц.Амгаланбаяр Ц.Цэрэнбадам нарыг АТГ-аас шалгаж эхэлсэн гэнэ. Бригадын генерал Ц.Амгаланбаяр нь одоо Хууль сахиулахын их сургуулийн захирлаар ажиллаж байгаа билээ. Тэрбээр Шүүхийн шийдвэр гүйцэтгэх ерөнхий газрын даргаар ажиллаж байхдаа Хууль зүйн сайд асан Ц.Нямдоржид үнэтэй автомашин авч өгсөн гэх үндэслэлээр буруутгагдаж, хэл аманд өртөж байсан нэгэн юм.