Одоогоос таван жилийн өмнө буюу 2016 онд “Hero entertainment” студийн захирал, найруулагч Б.Баатарыг ТЕГ-ын дарга асан Б.Хурц тагнаж, чагнасан, мөн бичлэг задалсан гэх мэдээлэл цацагдсан. Тухайн үед   тэрбээр ямар нэгэн тайлбар өгөөгүй бөгөөд “Үнэнийг тогтоолгоно” хэмээн ТЕГ-т хандсан тухайгаа өөрийн цахим хуудастаа бичиж байсан. Энэ талаар ТЕГ-ын олон нийттэй харилцах албаны дарга Т.Баярхүү өнөөдөр /2021.03.18/ мэдээлэл хийлээ.

Тэрээр “Найруулагч Б.Баатарын гаргасан гомдлын дагуу бичлэг алдагдсан гэх хэргээр бүртгэл нээгээд, шалгах ажиллагаа явагдаж байна. Тухайн мөрдөн шалгах ажиллагааны явцад алдагдсан гэх бичлэгийг гүйцэтгэх ажиллагааны шугамаар олж авсан байх магадлалтай гэсэн дүгнэлт урьдчилсан байдлаар тогтоогдоод байна. Бичлэг алдагдсан гэх хэрэгт холбогдуулан хэд хэдэн хүнээс байцаалт авч байна. ТЕГ-ын даргаар ажиллаж байсан Б.Хурцыг дуудсан хэдий ч ирж мэдүүлэг өгөөгүй.

Гэмт хэрэг үйлдэгдсэн эсэх асуудлыг шүүх эцэслэн шийдвэрлэнэ. Хэрэг шалгах ажиллагаа явагдаж байгаа учир үүнээс илүү мэдээлэл өгөх боломжгүй” хэмээлээ.