-УИХ-ЫН ГИШҮҮН АСАН Ж.БАТЗАНДАНГИЙН ХАМААРАЛ БҮХИЙ ЭТГЭЭДҮҮД 721 ТЭЭВРИЙН ХЭРЭГСЛЭЭР НҮҮРС ТЭЭВЭРЛЭЖ БАЙГАА БАРИМТ-

     ...Жалбасүрэн гуайн хэдэн хөвгүүд ч баларч байна даа. Хоёр хүү нь төрийн албаны зөөлөн сэнтийгээсээ чирэгдэж буугаад, “аавын хаалга” татаж, цагдан хорих ангид хэзээ суллагдахаа мэдэхгүй хана налж, хаалга манаж, тааз ширтэж, хөлийн чимээ чагнаж, шүүх хурлаа хүлээн бэмбэгэнэж суухад ууган хүү нь дүү нарынхаа араас “явах” дээрээ тулчихаад сууж байдаг. Мөн ч сонин шүү, саяхан л “Шударга тав”-ын нэг болчихсон шуурга сөрөөд “мандаж” явсан Ж.Батзандан өөрийнхөө зуурсан жонхуунд ах, дүү нартайгаа хамт бүдчиж унах дээрээ тулчих гэж. Тэр хоригдох хүртлээ “том” байлаа. Хэн дуртай руу нь хаяглаж, хэтийдсэн өндөр дуугаар хашхичиж, хааш нь ч хамаагүй хуруугаа дүрж, хачин “шударга” явлаа шүү дээ. Харин тэр одоо хоёрын банзан дээр хөгжил, хувьсал хоёрыг ярих “тэнхэлгүй” болтлоо “хэрэгт” дарагдаж, ахтайгаа, туслахтайгаа нэг хориход, гурван өөр камерт байж байна.

       Эргэлт.мн мэдээллийн сайтын Эрэн сурвалжлах нэгдлээс УИХ-ын гишүүн асан Ж.Батзандангийн хамаарал бүхий этгээд буюу түүний туслах, ШИНЭ намын дэд дарга Г.Аюулгүй Хөгжлийн банкнаас Капитал банкаар дамжуулан 12 тэрбум төгрөгийн зээл аваад, найдваргүй зээлдэгчдийнх нь нэг болж, улмаар дампууралд нь гол нөлөө үзүүлсэн байж болзошгүй ноцтой баримтыг дэлгэж байлаа. Тэгвэл бид энэ удаад “Нүүрсчдийн бүлэглэл”-ийн гэх хэргийн гол эзэн буюу нууц ноён нь УИХ-ын гишүүн Ж.Батзандан байсныг батлах схемийг баримтаар хүргэх гэж байна. Өөрөөр хэлбэл, хорихын хүйтэн өрөөнд дээл нөмөрч суух Ж.Батзанданг “Нүүрсчдийн бүлэглэл”-ийн гол тоглогч байсныг баталж болзошгүй ноцтой баримтыг хүргэе. 

БАРИМТ : Ж.БАТЗАНДАГИЙН ТУСЛАХ Г.АЮУЛГҮЙН 60 ХУВЬ ЭЗЭМШДЭГ “ГРИЙТ МОНГОЛ ТРАНС” ХХК 379 ТЭЭВРИЙН ХЭРЭГСЛЭЭР НҮҮРС ТЭЭВЭРЛЭЖ БАЙНА

           “Эрдэнэс таван толгой” ХК-тай нүүрс тээвэрлэлтийн гэрээ үзэглэж, 379 тээврийн хэрэгслээр нүүрс тээвэрлэдэг давуу эрхтэй дараагийн компани бол “Грийт монгол транс” ХХК. Уг компанийг 2016 оны есдүгээр сарын 30-нд Улсын бүртгэлийн 6111297 регистрийн дугаартайгаар Гадаад худалдаа, Худалдааны зуучлал, Авто машины сэлбэгийн худалдаа, Авто машины засвар, үйлчилгээ, Авто машинаар ачаа тээвэрлэх, Хүнд машин механизмын түрээс, сэлбэгийн худалдаа   , Хүнд машин механизмын тоног төхөөрөмжийн худалдаа, Мах, махан бүтээгдэхүүний үйлдвэрлэл, худалдаа чиглэлээр үүсгэн байгуулжээ. Бүртгэл дээрх хаяг нь, Улаанбаатар, Баянзүрх, 18-р хороо, 13 хороолол, 13, 180 тоот аж. Харин компанийн оффис нь Өмнөговь аймгийн Ханбогд сумын тавдугаар баг, Хайрхан, Цагаан хаданд байдаг.

       Хамгийн ноцтой нь, “Грийт монгол транс” ХХК-ийн үүсгэн байгуулагч нь УИХ-ын гишүүн Ж.Батзандангийн туслах Галсанжамцын Аюулгүй. Тэрбээр 2016 онд Цэрэннадмид Мөнхсайхан, Балдандорж Мөнх-Эрдэнэ гэх хүмүүстэй хамтран уг компанийг үүсгэн байгуулсан байна. Г.Аюулгүйн үүсгэн байгуулсан “Грийт монгол транс” ХХК нь төрийн өмчит “Эрдэнэс таван толгой” ХК-тай гэрээ байгуулж, урд хөрш рүү автомашинаар нүүрс зөөх ажлыг хариуцдаг байсан гэсэн үг.

         Гэхдээ Г.Аюулгүй хүмүүстэй хамтран эзэмшдэг байсан компаниудынхаа хувь эзэмшлээс нэрээ хасуулж, нүүрс тээврийн бизнесээс бүрэн гарсан гэж харагдахаар тэмдэглэл хийлгэсэн ч “Грийт монгол транс” ХХК-ийнхаа 60 хувийг эзэмшдэг хэвээрээ байна. Өөрөөр хэлбэл, Ж.Батзандангийн туслах Г.Аюулгүй толгой мэдэж компани байгуулсан юм биш, “эзэн”-ийхээ даалгавраар компани байгуулж, ногоон гэрлээр нүүрс тээвэрлэж байгаа гэсэн үг.

           Ташрамд дурдахад, Хөгжлийн банкнаас 888 төсөл болон ЖДҮХС-ийн санхүүжилт бүхий зээлийг Капитал банкаар дамжуулан аваад эргэн төлөөгүй буюу дампуурахад нь нөлөө үзүүлсэн “Азийн бамбар” ХХК, “Элит цамхаг” ХХК-иудыг эзэмшигч Г.Аюулгүй гэгч нь УИХ-ын гишүүн асан Ж.Батзандангийн туслах, ШИНЭ намын дэд дарга, басхүү түүний бизнесийн хамтрагч. Тодруулбал, Ж.Батзандан 2004 онд “Эрүүл нийгэм-Иргэний хөдөлгөөн” гэгчийг байгуулж, төв талбайд жагсаж явсан. Тухайн үед Ж.Батзандангийн арын албанд Г.Аюулгүй хүчин зүтгэж явсан бөгөөд тэдний нөхөрлөл энэ үеэс эхлэлтэй аж. Улмаар 2012 онд Ж.Батзандан УИХ-ын гишүүн болоход Г.Аюулгүй түүний туслах, зөвлөхөөр нь ажиллаж эхэлсэн байдаг. Ингээд зогсохгүй, Ж.Батзандан Шударга иргэдийн нэгдсэн эвсэл буюу ШИНЭ намыг байгуулж, 2019 оны зургадугаар сарын 6-нд Төрийн ордонд анхдугаар их хурлаа хийсэн. Тухайн үед Ж.Батзандан өөрийн туслах, Г.Аюулгүйг намын байгуулалт хариуцсан дэд даргаар томилж байлаа.

              Эндээс харвал, УИХ-ын гишүүн асан Ж.Батзандан, түүний төрсөн ах, дэд сайд асан Ж.Бат-Эрдэнэ, түүний туслах Г.Аюулгүй “Нүүрсчдийн бүлэглэл”-ийн гол хүн, нууц ноёнтон байсан гэдэг нь тодорхой байна. Хууль хяналтын байгууллага Ж.Батзандан, Г.Аюулгүй нарыг ганцхан "Капитал" банкийг дампууруулсан байж болзошгүй үндэслэлээр бус, нүүрсний хэргээр шалгаж байгаа аж. Өөрөөр хэлбэл, Ж.Батзандан хийгээгүй хэргийнхээ төлөө бус, хийсэн хэргийнхээ төлөө ах, дүү, туслахтайгаа цуг ачигдсан бололтой.