Төр, нийгмийн зүтгэлтэн С.Зориг агсны амийг бүрэлгэсэн хэрэгт буруутгагдаж 20-25 жилийн хорих ял авсан Т.Чимгээ, Б.Содномдаржаа нар өнөөдөр батлан даалтад гарч, суллалаа. Тэднийг эрүүдэн шүүж, ял хүлээлгэсэн гэх хэрэгт ТЕГ-ын дарга асан Б.Хурц, прокурор Г.Эрдэнэбат нарын есөн хүнийг буруутайд тооцож, гурван шатны шүүхээс ял оноогоод байгаа. Шинэ нөхцөл байдал үүссэний улмаас 20 жилийн хорих ял авсан Т.Чимгээ, Б.Содномдаржаа нарын хэргийг хуулийн дагуу задалж, дахин хянуулах дүгнэлтийг УЕП-оос Дээд шүүхэд хүргүүлсэн. Тэгвэл прокурорын уг дүгнэлтийг шүүх хурлаар хэлэлцэж, Т.Чимгээ, Б.Содномдаржаа нарыг батлан даалтад гаргалаа. Ингэснээр гурван шатны шүүхийн шийдвэр хүчингүй болж, Т.Чимгээ, Б.Содномдаржаа нарт холбогдох хэргийг дахин шалгах юм.

       Өчигдөр батлан даалтад гарсан Б.Содномдаржаагийн ээжтэй холбогдоход “Хүүтэйгээ уулзах сайхан байлаа. Миний хүү гэртээ хүрээд ирлээ шүү дээ. Бид өчигдөр хорих ангиас гараад шууд Эрдэнэт рүү хөдөлсөн. Өнөөдөр 05:00 цагийн үед гэртээ ирлээ. Хүү минь хүүхдүүдтэйгээ уулзахаар дөнгөж сая явлаа. Долоон хүүхэд нь Эрдэнэтээс холгүйхэн хөдөө амьдардаг юм. Уул, усандаа мөргөж, хүүхдүүдтэйгээ уулзаад ирэх байх. Миний хүү “Орох өдөр байхад гарах өдөр ирдэг л юм байна. Сэтгэл санаа үнэхээр сайхан байна” гээд хоолой нь зангирч байна лээ. Бүтэн зургаан жил хоригдсон болохоор олон хүн хараад хямарсан байх. Тэгээд сэтгүүлчдэд ярилцлага өгөхгүйгээр шууд машинд суулгасан. Хууль хяналтын байгууллагынхан биднийг 22-ын товчоогоор гаргаж өгөөд буцсан. Харин одоо хяналт, хамгаалалт тавьсан юм алга. Хүү минь их турсан байна лээ” гэв.