-Хүү минь эх орондоо ирэх гэж бүтэн жил онгоц хүлээсэн. Эцэст нь осолд орчихлоо-

       БНСУ-д ажиллаж, амьдарч байсан И.Дэлгэрхангай гэх залуу өнгөрсөн хоёрдугаар сард өндрөөс унаж, хүнд гэмтжээ. Тэрбээр одоо БНСУ-ын нэгэн мужийн эмнэлэгт эмчлүүлж байгаа бөгөөд эмчилгээний зардал байхгүйн улмаас эх орондоо ирж чадахгүй байгаа гэнэ. Энэ талаар түүний ээж З.Отгонбаяртай ярилцлаа.

-Таны хүүгийн бие ямар байгаа вэ. Та хүүгийнхээ талаар дэлгэрэнгүй мэдээлэл өгч болох уу?

     -Хүү минь дөрвөн давхар барилгаас унаж, хоёр хөл нь гурван хэсэг хугарч, тархиндаа хүнд гэмтэл авсан. Гурван удаа хагалгаанд орж, бие нь арай дээрдээд байгаа. Тэргэнцэр дээр суугаад ойр зуур явдаг болсон гэсэн. БНСУ-ын мужийн нэг эмнэлэгт хэвтэн эмчлүүлж байгаа. Тэнд хийх эмчилгээ нь дуусаж, гэртээ гарах боломжтой болсон ч төлбөрөө төлж чадахгүй учраас эмнэлэгтээ байгаа. БНСУ-д заавал төлбөрөө төлж байж эмнэлгээс гаргадаг юм гэнэ. Хүү минь 2015 оны гуравдугаар сард БНСУ руу гэрээт ажилтнаар явсан юм. Гэрээнийх нь хугацаа өнгөрсөн 2020 оны  гуравдугаар сард дууссан ч хил хаалттай учраас ирж чадаагүй. Тусгай үүргийн онгоц хүлээсээр нэг жил болчихлоо. Уг нь хил нээлттэй байсан бол миний хүү хэдийн эх орондоо хүрээд ирчих байсан. Ижий, аав, элгэн саднаа санаж бэтгэрсэн хүү минь нэг л өдөр осолд орж, эмнэлгийн орон дээр 40 гаруй хоног тарчилж байна.

-Хүүгийнх нь эмчилгээнд хэдэн төгрөг хэрэгтэй байгаа вэ?

-Бид байгаа бүхнээ зарж, хүүгийнхээ эмчилгээний зардлыг төлсөн ч 65 сая төгрөг дутаад байгаа. Хүү минь таван жилийн хугацаанд ажиллаж олсон мөнгөө аавынхаа эмчилгээнд зарцуулаад дууссан. Хань минь хүүгээ явснаас хойш дөрвөн сарын дараа шулуун гэдэсний хавдар, бөөрний дутагдал гэх онош сонссон юм. Нөхөр минь таван жил эмчилгээ хийлгэж, найдваргүй гэсээр өнгөрсөн наймдугаар сард бурхан болсон. Хүүтэйгээ уулзах гэж мөн ч их хүлээсэн. Даанч харамсалтай нь хүү минь нислэгт багтаж чадаагүй. Түшиж тулж байсан хань минь бурхан болж, бидний амьдралыг авч явдаг байсан хүү минь гэнэт л осолд орж, хэвтэрт орчихлоо. Дээшээ тэнгэр хол, доошоо газар хатуу гэгч л болж байна даа.

Бид байгаа бүхнээ зарж, хүүгийнхээ эмчилгээний зардлыг төлсөн ч 65 сая төгрөг дутаад байгаа. Хүү минь таван жилийн хугацаанд ажиллаж олсон мөнгөө аавынхаа эмчилгээнд зарцуулаад дууссан.

Арга ядахдаа элгэн саднаасаа хүүгийнхээ эмчилгээний дутуу төлбөрийг хүсэж, тусламж гуйгаад явж байна. Хүү минь таван жил ажиллаж, олсон мөнгөө хүнд өвчтэй аавынхаа эмчилгээнд зарцуулсан. Одоо өөрийнхөө ч эмчилгээний зардлаа гүйцэд төлж чадахгүйд хүрээд байна. 

-Хүү нь барилга дээр ажилладаг байсан юм уу?

-Тийм ээ, ааваасаа хойш сэтгэл санаагаар унаж, хямралд орсон. Гэрээний хугацаа нь дууссан учир хараар ажил хийж байсан юм билээ. Барилга дээр ажиллаж байгаад дөрвөн давхраас нь уначихсан гэсэн. БНСУ-д таних хүн байхгүй, ганцаараа л өрөө түрээсэлж амьдардаг байсан юм билээ. Барилгаас уначихсан байхад нь цагдаа нар олж, эмнэлэгт хүргэсэн гэсэн.

-Хүүг тань гэмтсэн гэдгийг танд анх хэн хэлсэн бэ?

-Миний хүү чинь ганц бие. Аав, ээжийгээ тэжээх гэж алс орныг зорьсон хүү шүү дээ. Амьдрал сайхан байсан бол хүү минь юу гэж хүний газарт хар ажил хийхээр аав, ээжээсээ хол, олон жил зовох билээ. Хүүг осолд орсон талаар цагдаагийн байгууллагаас хоёрдугаар сарын 20-нд залгаж хэлсэн. Нэг хүн залгаад “Өндрөөс унасан байсан тул эмнэлгийн байгууллагад хүлээлгэж өглөө” л гэж хэлсэн. Тэрнээс хойш хүүгийн минь бие муу, утсаар ч ярьж чадахгүй шар махтайгаа хатлаа. Одоо л нэг надтай ганц, хоёр минут ярьж, хэдэн үг сольдог болоод байна.

-Осолд орохоосоо өмнө нь тантай ярьсан уу?

-Гурван хоног надтай яриагүй. Өөрөө л залгадаг болохоор хүлээгээд сууж байсан юм. Ааваасаа хойш хүнтэй юм ярихгүй, хямраад байсан. Ярихаараа “Удахгүй очно” л гэдэг. Тэгээд гурван хоногийн дараа гэнэт эмнэлэгт байгаа гэсэн мэдээ ирсэн.

Гэрээгээр биш, хууль бусаар амьдарч байсан учраас тус улсаас үзүүлэх хөнгөлөлтийг хүртэх боломжгүй юм билээ.

-Ажлын байран дээрээ осолд орж, гэмтсэн байхад компани нь эмнэлгийн төлбөрийг нь төлөхгүй хэрэг үү?

-Үгүй гэсэн. Гэрээгээр биш, хууль бусаар амьдарч байсан учраас тус улсаас үзүүлэх хөнгөлөлтийг хүртэх боломжгүй юм билээ. Хүү минь л эрүүл саруул болоод эх орондоо хүрээд ирэх юм бол учир нь олдох байх. Эмнэлгийн төлбөрийн хэдэн төгрөг л олчихвол эхний нислэгээр ирнэ гэж найдаж байгаа.

-Та хэдэн хүүхэдтэй вэ?

-Манайх таван хүүхэдтэй. Миний хүү чинь айлын дөрөв дэх хүүхэд. Бид Ховд аймгийн Мөст сумаас Улаанбаатар хотод 2012 онд шилжиж ирсэн. Хүү минь Улаанбаатарт гурван жил амьдраад БНСУ руу явсан даа. Бид хандивын аян хэрхэн зохион байгуулахаа ч сайн мэдэхгүй юм. Нутгийнхаа ард түмнээс тусламж хүсэж, фэйсбүүк группт хүүгийнхээ талаар нийтэлсэн. Хүүг минь “Эрүүл саруул болоод эх орондоо ирээрэй” гэж ерөөж, бидэнд тусалж байгаа бүх хүнд баярлалаа гэж хэлмээр байна. Өндөр настай намайг бодоод хүүд минь туслахыг чин сэтгэлээсээ хүсэж байна.