Мөнгөтэй, эрх мэдэлтэй л бол улсын хөрөнгийг шамшигдуулсан ч, эрх мэдэл, алба тушаалаа ашигласан ч ял эдлүүлэх, хариуцлага хүлээлгэх боломжийг нь таслан зогсоодог ганц байгууллагатай болжээ, Монгол Улс. Энэ бол Нийслэлийн прокурорын газар. Нийслэлийн прокурорын газар гэх “цайз”-аар хамгаалуулсан эрх мэдэл, хөрөнгөтнүүд хэргээс мултарч, хийсэн хэргээ прокурорын ширээн дээр хав дардаг тогтолцоо бий боллоо. Уншигч та энэ тогтолцоог бидний дор дурдах дөрөвхөн жишээнээс төвөггүй ойлгох биз ээ.

УИХ-ын гишүүн СҮ.БАТБОЛДЫН хэргийг НПГ хэрэгсэхгүй болгож, Иргэний хэрэг рүү шилжүүлэв

УИХ-ын гишүүн Сү.Батболдыг нийтийн албан тушаалтнуудтай холбоотой оффшор бүсэд компани эзэмшдэг, хууль бус орлогоо нуусан, эсэх талаарх мэдээллийн дагуу АТГ-аас шалгаж байсан билээ. Мөн түүнийг Ерөнхий сайд байхдаа Оюутолгой төслийн хүрээнд Монгол Улсын Засгийн газар, “Айвенхоу Майнз Монголия Инк” ХХК, “Айвенхоу Майнз Лимитед”, “Рио Тинто Интернэшнл Холдингс Лимитед” компанийн хооронд 2009 оны аравдугаар сарын 6-ны өдөр байгуулсан хөрөнгө оруулалтын гэрээ, хувь нийлүүлэгчдийн гэрээг батлахад нэр бүхий албан тушаалтнууд эрх мэдэл, албан тушаалын байдлаа урвуулан ашиглаж, илт хууль бус шийдвэр гаргаж, бусдад давуу байдал бий болгон хохирол учруулсан байж болзошгүй хэрэгт холбогдуулан шалгаж байсан юм.

АТГ-т шалгагдаж байсан Сү.Батболдын хэргийг Нийслэлийн прокурорын газар хэрэгсэхгүй болгожээ. Түүний хэргийг Нийслэлийн прокурорын газраас эрүүгийн хэрэг биш байна хэмээн шалгах харьяалалыг нь өөрчилж, иргэний хэргийн анхан шатны шүүх рүү шилжүүлжээ.

УИХ-ын гишүүн асан С.ЭРДЭНИЙН хэргийг хэрэгсэхгүй болгожээ

УИХ-ын гишүүн асан С.Эрдэнийг Нийгмийн даатгалын ерөнхий газрын харилцах дансны жилийн эцсийн үлдэгдлийг Нийгмийн даатгалын санд буцаан төвлөрүүлээгүй, “Капитал” банканд давуу байдал олгож тус сангийн болон Эрүүл мэндийн даатгалын сангаас их хэмжээний мөнгө шамшигдуулсан гэх хэрэгт буруутгаад байсан билээ. Тодруулбал, түүнийг Нийгмийн даатгалын болон Эрүүл мэндийн даатгалын сангийн хөрөнгийг III зэрэглэлийн банканд байршуулснаас 230 гаруй тэрбум төгрөгийн хохирол учруулсан гэж үзэж, шалгаж байсан юм.

Мөн С.Эрдэнийг болсон “Дарханы гурил тэжээл” ХК-ийн элеватортой холбоотой хэрэгт холбоотойгоор яллагдагчаар татаад байсан билээ. Учир нь, хуучин элеваторыг 3.5 тэрбум төгрөгөөр засчихаад, улсад 16 тэрбум төгрөгөөр үнэлж шахсан, эвдэрсэн элеваторын хэрэгт холбогдуулан С.Эрдэнийн охин Э.Содгэрэлээс мэдүүлэг, тайлбар авсан гэдэг. С.Эрдэнийн охин Э.Содгэрэл “Дархан гурил тэжээл” ХК-ийн 550527 хувьцааны 152131 ширхэгийнх нь эзэмшигч гэнэт болсон нь С.Эрдэнийг буруутгах үндэслэл болсон юм. Учир нь, түүнийг сайдаар ажиллаж байхдаа уг компанид давуу байдал бий болгосныхоо төлөө охиноо “Дархан гурил тэжээл” ХК-ийн хувьцаа эзэмшигчээр оруулсан нь яллагдагчаар татах шалтгаан болсон гэдэг. Улмаар УИХ-ын гишүүн асан С.Эрдэнийг энэ хэрэгт холбогдуулан яллагдагчаар татах үндэслэл бүхий баримтуудыг АТГ-ынхан олж тогтоон 2020 оны нэгдүгээр сард уг саналаа НПГ-т хүргүүлж байсан.

Тэгвэл С.Эрдэнийн холбогдсон дээрх хэргүүдийг Нийслэлийн прокурорын газраас мөн л хэрэгсэхгүй болгох шийдвэр гарчээ.

УИХ-ын гишүүн А.АДЪЯАСҮРЭНГ яллагчаар татсан тогтоолыг хүчингүй болгов

Баянхонгор аймагт нэр дэвшиж ялалт байгуулж, УИХ-ын гишүүнээр сонгогдсон А.Адъяасүрэн нүүрс тээврийн С зөвшөөрөл авахын тулд Авто тээврийн газрын нэр бүхий албан тушаалтанд 100 мянган ам.долларын авлига өгсөн хэргээр АТГ-т шалгагдаж байсан билээ.

УИХ-ын гишүүн А.Адъяасүрэнгийн өмгөөлөгч нар НПГ-ын ерөнхий прокурор Ш.Нямдоржид хандаж, түүнийг яллагдагчаар татсан тогтоолыг хүчингүй болгуулах хүсэлт гаргасан гэнэ.

Ингээд НПГ-ын ерөнхий прокурор хянаад, хэргийг хэрэгсэхгүй буюу ялладагчаар татсан тогтоолыг хүчингүй болгожээ.

“Салхитын мөнгөний орд"-ын хэрэгт холбогдсон шүүгч Ц.АМАРСАЙХАНГ цагаатгав

2019 оны зургаадугаар сарын 27-нд Монгол Улсын Ерөнхийлөгч Х.Баттулга нэр бүхий 17 шүүгчийн бүрэн эрхийг түдгэлзүүлэх зарлиг гаргасан билээ. Тэднийг “Салхитын мөнгөний орд”-той холбоотой хэргийг шийдвэрлэхдээ оролцогчоос хахууль авсан, үндэслэлгүйгээр хөрөнгөжсөн гэх үндэслэлээр АТГ-аас эрүүгийн хэрэг үүсгэн шалгаж байсан юм. Улмаар 17 шүүгчийн 10 нь гэм буруутайд тооцогдож, яллах дүгнэлт үйлдсэн билээ. Түүний нэг нь Улсын дээд шүүхийн Иргэний хэргийн танхимын шүүгч асан Ц.Амарсайхан юм.

Түүний биеийн байдлыг харгалзан үзэж, хэргийг тусгаарлаад байсан ч цагаатгажээ.

Энэ мэт бидэнд мэдэгдэсэн ердөө дөрөвхөн жишээг уншигч танд хүргэлээ. Жирийн иргэдээ толгой дараалан яллаж, жижүүрээрээ ялын тогтоол дайдаг тэд яагаад эрх мэдэлтний эрх ашгийг дээдэлж, хэргийг хэрэгсэхгүй болгоод байна вэ. Гэмт хэрэг үйлдсэн нь, улсын хөрөнгийг шамшигдуулсан нь, эрх мэдэл, албан тушаалаа урвуулан ашигласан нь хөдөлшгүй баримтаар тогтоогдсон дээрх этгээдүүд хэргээс мултарч байгаа цаад шалтгаан юу вэ. Нийслэлийн прокурорын газар гэх хөдөлшгүй “цайз”-аар хэргээ хацайлуулж, хав даруулсан гэмт хэрэгтнүүдийг хэн, хэзээ шалгах вэ.