ХЗДХ-ийн сайд С.Амарсайханы тушаалаар философич С.Молор-Эрдэнэ тэргүүтэй этгээдүүдийг шалгаж эхэлсэн. Тодруулбал, тэднийг Монгол Улсын үндэсний аюулгүй байдал, тусгаар тогтнол, язгуур өв соёл, түүхийг илтэд гуйвуулж гутаан доромжилсон гэх үндэслэлээр шалгах нь зүйтэй гэж үзсэн юм. Энэ дагуу өчигдөр ТЕГ-аас С.Молор-Эрдэнийг саатуулсан байдаг. Саатуулах цаг дууссан тул шүүхэд ирүүлсэн цагдан хорих эсэх саналыг өнөөдөр 13.00 цагт хэлэлцжээ. Улмаар түүнийг 30 хоног цагдан хорихоор шийдвэрлэжээ.

      С.Молор-Эрдэнийг 2027 оны Ерөнхийлөгчийн сонгуульд нэр дэвшихээ зарласны дараа, Хууль зүй, дотоод хэргийн сайд С.Амарсайханаас "үзэл бодлоо илэрхийлэх нэрээр улс орны тусгаар тогтнолыг үгүйсгэж болохгүй" хэмээн шалгах чиглэл, тушаал өгсөн байна. Түүний жилийн өмнө "Томокогийн найз" подкастад оролцохдоо Монголын түүх, Чингис хааны оршихуйг үгүйсгэсэн утгатай ярьсан бичлэг олон нийтийн сүлжээнд тарж, иргэдийн шүүмжлэлийг дагуулаад байсан юм.

Түүнийг ЭХТА-ийн 19.9 дүгээр зүйлийн Үндэсний эв нэгдлийг бусниулах,

1. Хүмүүсийг үндэс, угсаа, хэл, арьсны өнгө, шашны номлол, үзэл бодлоор дайсагнуулах, эвдрэлцүүлэх, салан тусгаарлахыг ухуулсан, уриалсан, ялгаварлан гадуурхсан, хүчирхийлсэн, эрхийг нь хязгаарласан, давуу байдал тогтоосон үйлдлийг зохион байгуулсан бол таван жилээс арван хоёр жил хүртэл хугацаагаар хорих ял шийтгэнэ.
2. Энэ гэмт хэргийг зохион байгуулалттай гэмт бүлэг үйлдсэн бол арван хоёр жилээс хорин жил хүртэл хугацаагаар хорих ял шийтгэнэ гэх зүйл заалтаар буруутган шалгаж байгаа талаар эх сурвалж мэдээллээ.