Замын-Үүдийн гаалийн хяналтын бүсэд иргэдийн түүвэр ачаа саатаж, олон хоног дугаарлаж байна гэх мэдээлэл цацагдсан. Мөн ачаатай машинууд хяналтын талбайд багтахгүй, өөр чиглэлд шилжүүлсэн гэх. Тэгвэл уг мэдээлэлтэй холбоотойгоор нэр бүхий иргэний хууль хяналтын байгууллагаас худал мэдээлэл тараасан, бусдыг гүтгэсэн, хууль бусаар хилээр хориотой бараа нэвтрүүлэхийг завдсан байж болзошгүй үндэслэлээр шалгаж эхэлжээ. Тодруулбал, сүүлийн өдрүүдэд цахим сүлжээнд Түмэнжаргал Нэргүй гэх хаягтай эмэгтэй гаалийн байцаагчдад гомдолтой байгаа талаараа мэдээлэл хийх болсон.

Т.НЭРГҮЙ: МИНИЙ АЧААНД ӨНДӨГ БАЙГААГ БИ МЭДЭЭГҮЙ ШҮҮ ДЭЭ

            Иргэн Т.Нэргүй “Өвчтэй байж байгаад ирэх хооронд манай ачаа өндөг гаргасан байна. Би гаалийн бүрдүүлэлт хийгээгүй, мэдээгүй байсан. Гэхдээ өндөгний эзэн холбогдогч нь байгаа. Гэтэл манай ачаатай машинуудыг бүгдийг нь буулгаж, шалгаж байна. Харин хажуу болон бусад айлын машинуудыг 80 хувьтай буулгалт хийхгүй, хоёр хайрцаг буулгаад, зөрчлөө тохиролцоод л гараад явчихаж байна шүү дээ. Би үүн дээр бухимдалтай байна. Яг адилхан буулгахад энэ байтугай л ноцтой зүйл илэрнэ. Монгол орон үйлдвэрлэгч орон биш учраас би бараа оруулж ирнэ. Миний ачаа хилээр гарч чадахгүй байгаа нь гаалийнхны халаасанд орохгүй байгаад л учир байна. Халаасанд нь орчихсон бол миний ачаа 20 хувьтай шалгагдаад, гараад явчихсан байгаа. Би шүгэл үлээгээд хоёр жил болж байна. Гаалийн байгууллага үнэн шударга, тэгш ажиллахыг шаардаж байна. Миний ачаанд өндөг байгааг мэдээгүй шүү дээ. Гэхдээ гаалийнхан өндөг байгааг илрүүлээгүй. Харин би мэдэж, 100 хайрцаг өндөг байгаа, хураа гэж хэлсэн. Би нэг ч худал мэдээлэл тараагаагүй, үнэн төрхийг нь илчилсэн. Замын-Үүдийн гаалийнхан солигдож, шинэ даргатай болсон. Би сайн ажиллах болов уу гэж харж байлаа. Гэхдээ тэд чадсангүй. Ард иргэдийн ачаа 10 хоног саатлаа. Гэтэл иргэн Т.Нэргүйгээс болж, ачаа саатсан мэт гаалийнхан ярьж байна. Авлига зогссон учраас ачаа гарахгүй байна шүү” гэх утга бүхий зүйлсийг ярьсан байдаг.

ГЕГ:ЗАМЫН-ҮҮДИЙН ГААЛИЙН БАЙГУУЛЛАГА ҮНДЭСЛЭЛГҮЙГЭЭР АЧАА СААТУУЛДАГГҮЙ

Харин Замын-Үүдийн Гаалийн байгууллагаас дараах мэдэгдлийг гаргалаа.

Т.НЭРГҮЙГ ЦАГДААГААС ШАЛГАЖ БАЙНА

         Иргэн Т.Нэргүйн барааг ачсан зургаан машиныг шалгаж байна. Шалгалтын явцад гаальд мэдээлэлгүй, бүүрдүүлэлт хийлгүйгээр 36 мянган ширхэг өндөг, шар айраг, дарс, ахуйн газ, хоолны амтлагч зэрэг илэрчээ. Замын-Үүд авто замын боомтоор өдөрт дунджаар 500 орчим тээврийн хэрэгсэл нэвтэрдэг бөгөөд үүний 82 хувь буюу 400 гаруй нь эрсдэлгүй тул гаалийн бүрдүүлэлтээ хийлгээд шууд гардаг гэнэ. Харин үлдсэн эрсдэлтэй гэж үзсэн 18 орчим хувьд нь нарийвчилсан шалгалт хийдэг бөгөөд иргэн Т.Нэргүйн ачаа яг энэ эрсдэлтэй бүлэгт багтан шалгаж байгаа гэсэн үг. Одоогийн байдлаар иргэн Т.Нэргүйн ачааг шинжилж, хориотой бодис илэрсэн эсэх нь тодорхойгүй байна.

            Хууль бусаар хориотой бараа улсын хилээр нэвтрүүлэхийг завдсан гэдгээс гадна иргэн Т.Нэргүйг төрийн албан хаагчийн нэр төрд халдсан, бусдыг гүтгэсэн, худал мэдээлэл тараасан гэх үндэслэлээр шалгаж эхэлжээ.