Төрөөс тэрбумтан “төрдөг” болоод удлаа. Өнгөрсөн оны сүүлчээр хууль хяналтын байгууллагынхан Эрчим хүчний салбарыг бүрэн “нэгжсэн”. Төрийн сайд, Төрийн нарийн бичгийн дарга байсан эрхмүүдийг цагдан хорьж, энд, тэнд нуусан хөрөнгийг нь битүүмжилсэн. Тэгвэл баривчилгаа, мөрдөн шалгах ажиллагааны үе дуусаж, сүр дуулиантай хэргүүдийг шүүхэд шилжүүлж эхэлжээ. Үүний нэг нь Зам тээврийн яамны Төрийн нарийн бичгийн дарга Б.Насантогтохтой холбоотой хэрэг.

      Б.Насантогтох гэж тоймгүй баян, төрийн албан тушаалтан байлаа. Тэрбээр ЗТЯ-ны ТНБД Б.Насантогтох "М Си Эс Интернэйшнл"-ийн цахилгаан хангамж, техникийн нөхцөлийг өдөрт нь баталж, эхнэрийнхээ компаниар гэрээ байгуулуулсан хэрэгт холбогдсон. Өөрөөр хэлбэл, Эрчим хүчний яамны Төрийн нарийн бичгийн даргын түр орлон гүйцэтгэгчээр ажиллаж байхдаа эрх мэдэл, албан тушаалын байдлаа урвуулан ашиглаж, дээрх гэрээг хийсэн гэсэн үг л дээ.

       Б.Насантогтох "М Си Эс Интернэйшнл"-ийн Баянхонгор аймгийн Шинжинст суманд байрлах алтны уурхайд цахилгааны зөвшөөрөл өгсөн. Үүнийхээ хариуд эхнэр Ч.Ариунтунгалагынхаа “Эн Ар Жи хөгжил” ХХК-аар 5.5 тэрбумын гэрээ хийсэн байна.

Б.БИЛЭГТ: Б.НАСАНТОГТОХЫН 17 ҮЛ ХӨДЛӨХ ХӨРӨНГӨ, ГУРВАН МАШИНЫГ БИТҮҮМЖИЛСЭН, ҮНДЭСЛЭЛГҮЙ ХӨРӨНГӨЖСӨН НЬ ТОГТООГДСОН

        Энэ талаар АТГ-ын Хэвлэл мэдээлэл, олон нийттэй харилцах мэргэжилтэн Б.Билэгтээс “АТГ-ын Мөрдөн шалгах хэлтсээс Зам тээврийн яамны Төрийн нарийн бичгийн дарга Н-д холбогдох эрүүгийн хэргийн мөрдөн шалгах ажиллагааг дуусгаж, шүүхэд шилжүүлэх саналтай прокурорын байгууллагад хүргүүлэхээр шийдвэрлэлээ. Н нь Эрчим хүчний яамны Төрийн нарийн бичгийн даргаар ажиллаж байхдаа нэр бүхий аж ахуйн нэгжид техникийн нөхцөл олгохдоо холбогдох журмыг зөрчиж бусдад давуу байдал бий болгосон, албаны чиг үүргээ хэрэгжүүлсний хариуд нэр бүхий аж ахуйн нэгжүүдээс 281,0 сая төгрөгийн үнэлгээтэй орон сууц, 100,0 сая төгрөг, 30,0 мянган ам.долларын хахууль авсан, түүний хөрөнгө, орлого нь их хэмжээгээр буюу 3,4 тэрбум төгрөгийн үнэлгээтэй 4 үл хөдлөх хөрөнгө, 2 тээврийн хэрэгсэл болон 80,0 мянган ам.доллараар нэмэгдсэнийг хууль ёсны болохоо тайлбарлаж чадаагүй буюу үндэслэлгүйгээр хөрөнгөжсөн болох нь мөрдөн шалгах ажиллагааны явцад тогтоогдсон. Мөрдөн шалгах ажиллагааны явцад 6,9 тэрбум төгрөгөөр үнэлэгдэх 17 үл хөдлөх хөрөнгө, 635,7 сая төгрөгийн үнэлгээтэй 3 тээврийн хэрэгслийг битүүмжлэн шилжилт хөдөлгөөнийг хязгаарласан бөгөөд уг хэрэгт 7 хүн, 1 хуулийн этгээдийг яллагдагчаар татан шалгаснаар гэмт хэргийн шинжтэй 10 үйлдэлд 3,7 тэрбум төгрөгийн үндэслэлгүй хөрөнгөжсөн үйлдлийг тогтоосон. Түүнчлэн 53 хүнээс гэрчийн мэдүүлэг авч, 47 баримтад үзлэг хийж, аж ахуйн нэгж, байгууллагуудаас 65 лавлагаа болон арилжааны банкнаас 35 дансны хуулга гаргуулан авсны зэрэгцээ санхүүгийн мөрдөгчийн магадлагаа хийлгэсэн” гэв.

Б.НАСАНТОГТОХЫГ ХАДАМ ДҮҮ Ч.АМГАЛАНТӨГСТЭЙ ХАМТ ШАЛГАЖ БАЙНА

      Б.Насантогтох үндэслэлгүйгээр хөрөнгөжсөн нь тогтоодсон. Тэгвэл түүнийг хадам дүү Ч.Амгалантөгс, түүний нөхөр Г.Баатар нартай хамт шалгаж байгаа. Учир нь, хамжигчаар оролцсон, мөнгө угаасан хэрэгт буруутгажээ.

Б.Насантогтохын эхнэр Ч.Ариунтунгалаг “Эн Ар Жи хөгжил” ХХК-аа 2015 онд байгуулсан. Үндсэн үйл ажиллагаа нь ломбард ажиллуулах. “Эрдэнэт үйлдвэр”-ийн Уян зэс голтой дамжуулагч кабель нийлүүлэх 2.9 тэрбумын тендерт ороод, хасагдсан. Бусдаар цагаан түүхтэй, Б.Насантогтохын халаасны компани гэсэн үг л дээ. Б.Насантогтох Баянхонгор аймгийн гаралтай. Ийм ч учраас гурван үсэгтэй компанийн эзэдтэй ойрхон нэгэн.