“Туулын хурдны замтай холбоотойгоор голын ойролцоо өрөмдлөгө хийсэнээс болж амьтад эхнээсээ хордож, үхэж эхэллээ” гэх тайлбартай үхсэн бугын зураг, мэдээлэл цахим орчноор цацагдсан. Үүнийг ихэвчлэн “Хатан Туулаа аваръя” тэргүүтэй Туулын хурдны замыг эсэргүүцэгсэд өмнө нь хэзээ ч гол дагуу амьтан үхсэж байгаагүй аятай сүр дуулиантайгаар олон нийтэд түгээж байна. Туул голын ойролцоо үхсэн буга үнэхээр голын уснаас хордож үхсэн үү, үгүй юү гэдгийг холбогдох мэргэжлийн хүмүүсээс тодрууллаа. 

БОГДХАН УУЛЫН ДАРХАН ЦААЗАТ ГАЗРЫН ХАМГААЛАЛТЫН ЗАХИРГААНЫ ДАРГА Э.ЦОГБАДРАЛ: ЖИЛД ДУНДЖААР НИЙТ АМЬТДЫН 60-70 ХУВЬ НЬ ХОРОГДОХ, ГЭМТЭХ ЭРСДЭЛТЭЙ БАЙДАГ

       Мөн Туул голын зарим хэсэг нь Богдхан уулын дархан цаазат газар хамаардаг учир тус бүс нутагт жилд дунджаар хэдий хэмжээний амьтан бэртэж, хорогддог, тэдэнд ямар арга хэмжээ авдаг талаар Богдхан уулын дархан цаазат газрын Хамгаалалтын захиргааны дарга Э.Цогбадралаас тодрууллаа. Тэрбээр Богдхан уулын дархан цаазат газарт буга, гөрөөс, согоо зэрэг 55 зүйлийн туурайтан бүртгэлтэй байдаг. Мөн 200 гаруй төрлийн шувуу, 500 гаруй ургамлын төрөл байдаг. Тэдгээрийн дундаас туурайтан амьтад хамгийн их бэртэж, гэмтэж, хорогддог. Одоогийн байдлаар манайд бэртсэн, хорогдсон амьтдын тухай 30 орчим дуудлага мэдээлэл ирсэн байна. Ингэснээр жилд дунджаар нийт амьтдын 60-70 хувь нь хорогдох, гэмтэх эрсдэлтэй байдаг. Үүнд туурайтан амьтдаас гадна шувуу, могой, хэрэм, зурам гээд олон төрлийн амьтан ордог гэсэн үг. Харин Туул голын ойролцоо үхсэн гэгдээд байгаа буга манай бүсэд хамаардаггүй учир бид юунаас болж хорогдсоныг нь мэдэхгүй байна. Тухайн бүсийг Нийслэлийн байгаль орчны газар хариуцдаг учир тэдний багийнхан дүгнэлт гаргахаар ажиллаж байгаа. Дархан цаазат газрын амьтад гаднын нөлөөтэй хорогдохоос илүүтэй байгалийн жамаараа хорогдох тохиолдол элбэг байдаг. Дулаан орж байгаатай холобоотойгоор Богдхан уулын орчимд зэрлэг амьтан гэмтсэн, осолдсон, суурьшлын бүс рүү орж ирсэн тохиолдолд иргэд яаралтай манайх руу мэдэгдэх хэрэгтэй" гэсэн юм.

НИЙСЛЭЛИЙН БАЙГАЛЬ ОРЧНЫ ГАЗРЫН ДАРГА Б.МӨНХБАЯР: ТУУЛЫН ОЙРОЛЦОО ӨРӨМДЛӨГӨ ХИЙСНЭЭС БОЛЖ БУГА ХОРДОЖ ҮХЭЭГҮЙ

      Харин Нийслэлийн байгаль орчны газрын дарга Б.Мөнхбаяр “Туул голын ойролцоо өрөмдлөгө хийсэнтэй холбоотойгоор буга хордож үхсэн гэж иргэд яриад байгаа. Тухайн буга усанд хордож үхээгүй болохыг мэргэжлийн багийнхан урьдчилсан байдлаар тогтоосон. Маршалын гүүрнээс дээш 400-500 метрийн зайд хорогдсон буга хамраараа мод хатгаад үхсэн байна гэсэн. Мөн тухайн амьтан өрөмдлөгө хийж байгаа газраас 500-600 метрийн зайтай хорогдсон байна лээ. Туул голын хурдны замтай холбоотойгоор худал мэдээлэл их гарч байна” гэв.

    Сүүлийн үед Туулын хурдын замтай холбоотойгоор УИХ-ын гишүүд болон Нийслэлийн удирдлагуудын хооронд ширүүн маргаан өрнөж байгаа. Учир нь эдийн засаг хүндрэлтэй, олон улсын нөхцөл байдал амаргүй байгаа цаг үед 2.3 их наяд төгрөгөөр хурдны зам барихыг УИХ-ын зарим гишүүд төдийгүй ард иргэд эсэргүүцэж байгаа билээ.