МҮХАҮ-ийн танхимын гүйцэтгэх захирлаар томилогдон ажиллаж байсан Т.Дүүрэн 2024 онд  гүйцэтгэх захирлын албан тушаалд томилогдон ажиллах хугацаандаа хууль, холбогдох дүрэмд заасныг зөрчиж, их хэмжээний мөнгийг хувьдаа завшсан хэрэгт холбогдон, шалгуулж байсан билээ. Улмаар удирдах албан тушаалтан нь хувьдаа ашиг хонжоо олох зорилгоор хууль, түүнд нийцүүлэн гаргасан захиргааны хэм хэмжээний акт, дүрмээр олгогдсон албан тушаалын эрх мэдлээ урвуулан ашигласныг хууль хяналтын байгууллагаас тогтоогоод байна.

Хэргийг тодруулбал, МҮХАҮ-ийн танхимын гүйцэтгэх захирал асан Т.Дүүрэн нь Монголын Үндэсний Худалдаа Аж үйлдвэрийн танхимын Капитрон банк дахь ....... тоот хадгаламжийн дансанд байршиж байсан нэг сая ам.долларын гэрээг 2021 оны аравдугаар сарын 18-нд цуцалжээ.

       Ингээд  998,191.77 ам.долларыг /тухайн үеийн ханшаар 2849.73 төгрөг буюу 2,844,636,924.22 төгрөг/ бэлнээр зарлагдан  П.Х-ийн эхнэр болох Б.Н-ийн Хаан банкны ….... тоот дансаар дамжуулан Б.Б, Б.У, Б.М, Д.А нарын дансанд шилжүүлсэн нь тогтоогдсон байна.

         Улмаар Сейшелийн Арлууд улсад бүртгэлтэй, бүртгэлийн 23......дугаартай “Nest Services Limited” компанийн “Binance” криптовалют арилжааны биржид бүртгэлтэй, Б.Н-ийн дүүгийн дансаар дамжуулан  11.3 ширхэг биткойн худалдан авсан нь тогтоогоод байна.

      Иймд МҮХАҮ-ийн танхимын гүйцэтгэх захирал асан Т.Дүүрэнг  хувьдаа ашиг хонжоо олох зорилгоор хууль, түүнд нийцүүлэн гаргасан захиргааны хэм хэмжээний акт, дүрмээр олгогдсон албан тушаалын эрх мэдлээ урвуулан ашигласны улмаас тус танхимд их хэмжээний хохирол учруулсан. Мөн гэмт хэргийн улмаас олсон мөнгө гэдгийг мэдсээр байж түүний хууль бус эх үүсвэрийг нь нуун далдлах, бодит шинж чанар, эх үүсвэр, байршил, захиран зарцуулах арга, эзэмшигч, эд хөрөнгийн эрхийг нуун далдалсан гэмт хэрэг үйлдсэн хэрэгт буруутгагдан, шалгуулж байгаа юм.