Хотын дарга Х.Нямбаатарын зургийг шатааж, зан үйл хийж буй бичлэг цахим сүлжээнд цацагдсан. Мөн уг үйлдлийг Баянзүрх дүүргийн ИТХ-ын төлөөлөгч Ж.Батболд үйлдсэн болохыг цагдаагийн байгууллагаас тогтоож, шалгаж байгаа гэх мэдээлэл цацагдаад дөрөв хонолоо. Бид үүнтэй холбоотойгоор дараах мэдээллийг бэлтгэлээ.

БАЯНЗҮРХ ДҮҮРГИЙН ТӨЛӨӨЛӨГЧ Ж.БАТБОЛД: БИ ХОТЫН ДАРГЫН ЗУРГИЙГ ШАТААГААГҮЙ

        Зарим хэвлэл мэдээллийн хэрэгслээр Хотын даргын зургийг шатаасан этгээдийг нэрлэж, хууль хяналтын байгууллагаас тогтоосон гэсэн. Тодруулбал, Баянзүрх дүүргийн ИТХ-ын төлөөлөгч Ж.Батболдыг хууль хяналтын байгууллагаас шалгаж, Хотын даргын зургийг шатаасан гэсэн юм.

Тэгвэл бид түүнтэй өчигдөр холбогдож, энэ талаар тодруулахад “Хотын даргын зургийг шатааж, зүй бус авирлаж байгаа хүн би биш. Ор үндэслэлгүй худал мэдээлэл тарааж байна. Цагдаагийн байгууллагаас тогтоогоод, намайг шалгаж байгаа асуудал байхгүй. Хүнийг харлуулж, гүтгэж байна шүү дээ. Би хуулийн байгууллагад хандана. Одоогоор хойшлуулашгүй хуралтай байгаа учир үдээс хойш арга хэмжээ авна. Хуулийн хүнтэй уулзаж, зөвлөгөө авах хэрэгтэй байх. Би чинь хуулийн мэдлэгтэй хүн биш шүү дээ. Гэрийнхэн, ойр дотныхныг минь маш их хямраачихлаа. Хүний нэр төрд халдсан энэ аймшигт үйлдэлд зохих арга хэмжээг заавал авах болно” гэсэн юм.

Х.НЯМБААТАР: Э.БАТ-АМГАЛАНГИЙН ЭХНЭРИЙНХ НЬ ДҮҮ БАЙНА БИЛЭЭ

        Харин зургаа шатаалгасан Хотын дарга өчигдөр мэдээлэл өгсөн. Тэрбээр “Ерөнхий сайд Г.Занданшатар өрөөндөө дуудаад нийгмийн сүлжээн дэх зүйлээ боль гэсэн. Би Баянзүрх дүүрэг дээр хүмүүс жагсаагаад байгаа юм байхгүй шүү дээ. Э.Бат-Амгалан л тийм үйлдэл хийгээд байгаа. Би бол ганц удаа шууд дамжуулалт хийсэн, өөр юу ч хийгээгүй. Би ер нь дахиж тийм хэрүүл хийж, ярьмааргүй байна. Надад энэ хавар хийх ажил байна, хүн цуглуулах зав алга. Миний зургийг шатаавал шатаагаад явж байг. Өдөр болгон бөөлөөд явж байсан ч яах вэ, би урдах ажлаа л хийгээд явъя. Э.Бат-Амгалан яагаад ингээд байгааг мэдэхгүй байна. Э.Бат-Амгалангийн эхнэрийнх нь дүү байна билээ. Цагдаад гомдол гаргаагүй. Шатаавал шатаана биз” гэсэн юм.

Тэгвэл энэ хэргийг “үйлдсэн” этгээдийг хууль хяналтын байгууллагаас олж, тогтоожээ. Тодруулбал, Баянзүрх дүүргийн төлөөлөгч үү, Э.Бат-Амгалан сайдын хадам дүү юу гэдгийг хууль хяналтын байгууллагаас шалгажээ.

ЦЕГ-ЫН ХЭВЛЭЛ МЭДЭЭЛЛИЙН ТӨВИЙН ДАРГА: ХОТЫН ДАРГЫН ГОМДЛООР ХЭРЭГ ҮҮСГЭН ШАЛГАЖ БАЙГАА

Энэ талаар ЦЕГ-ын Хэвлэл мэдээллийн төвөөс тодруулахад “Энэ хэргийг Хан-Уул дүүргийн цагдаагийн газарт шалгаж байгаа. Гуравдугаар сарын 14-нд Хотын дарга Х.Нямбаатар амь насанд занилхийлсэн байж болзошгүй гэх гомдол бүртгэгдсэн. Ингээд гуравдугаар сарын 15-наас цагдаагийн байгууллага шалгаж эхэлсэн” гэлээ.