"МАНАЙ АЛБА ХААГЧ ХУУЛИЙН ДАГУУ ҮҮРЭГТ АЖЛАА ГҮЙЦЭТГЭЖ ЯВААД АМИА АЛДСАН" 

     Архангай аймгийн нутаг дэвсгэр, Цагаан давааны ар руу уруудах замд “Howo” маркийн тээврийн хэрэгсэл онхолдож, хоёр хүн нас барсан харамсалтай хэрэг энэ сарын 20-нд гарсан. Тодруулбал, “Тэсэрч дэлбэрэх бодис тээвэрлэж явсан ААН-ийн жолооч, Дотоодын цэргийн албан хаагч хоёр нас баржээ. Аль аймаг, сум руу ямар зорилгоор тэсэрч, дэлбэрэх бодис тээвэрлэж яваад осолдсон талаар Дотоодын цэргийн 809 дүгээр ангийн алба хаагчаас тодрууллаа. Тэрбээр “Манай алба хаагч тэсэрч, дэлбэрэх бодис хариуцан тээвэрлэх үүргээ гүйцэтгэж яваад амиа алдсанд харамсаж байна. Харин хааш нь ямар зорилготой тээвэрлэж явсан нь нууц байдаг учир энэ талаар дэлгэрэнгүй мэдээлэл өгөх боломжгүй. Алба хаагч маань үүрэгт ажлаа гүйцэтгэж яваад осолдсон. Халтиргаа, гулгаанаас болж осолдсон гэдэг урьдчилсан таамаг байгаа” гэсэн юм. Амиа алдсан алба хаагч ахлагч цолтой байжээ. Хуулийн байгууллагаас хэргийн газарт хяналт, шалгалтын ажиллагаа явуулж, үргэлжлүүлэн шалгаж байгаа аж. 

ДОТООДЫН ЦЭРГИЙН ТУХАЙ ХУУЛЬД

     Дотоодын цэргийн алба хаагчид хуулийн дагуу буюу чиг үүргийнхээ хүрээнд тэсэрч, дэлбэрэх бодис хариуцан тээвэрлэх үүрэгтэй байдаг эсэхийг хуульд дараах байдлаар тусгасан байдаг. Тодруулбал, Дотоодын цэргийн тухай хуулийн 11 дүгээр зүйл дэх чиг үүрэгт зааснаар шаардлагатай зарим үед обьектийг түр хугацаагаар хамгаалах, зорчигч, ачаа тээшийг харгалзан хүргэх хэмээн заасан байдаг. Мөн 

15 дугаар зүйл. Обьектыг түр хугацаагаар хамгаалах, зорчигч, ачаа тээшийг харгалзан хүргэх

15.1.Дотоодын цэргийн командлагчийн шийдвэрээр их хэмжээний үнэт зүйл, мөнгөн тэмдэгт, цацраг идэвхт үүсгүүр, химийн хорт бодис, эсхүл хүний амь нас, эрүүл мэнд, байгаль экологийн тэнцвэрт байдалд шууд хохирол учруулах эрсдэлтэй болон гэмт халдлагад өртөж болзошгүй бусад обьектыг түр хугацаагаар хамгаалах, зорчигч, ачаа тээшийг харгалзан хүргэнэ.

15.2.Дотоодын цэргийн командлагчийн шийдвэрээр энэ хуулийн 15.1-т заасан хамгаалалтыг гэрээгээр гүйцэтгэж болно.

15.3.Хамгаалалтад авсан зорчигч, ачаа тээш аюулгүй газарт хүрсэн, эсхүл бусад байгууллага, албан тушаалтны хамгаалалтад орсон, эсхүл учирч болзошгүй эрсдэл, аюул арилсан тохиолдолд түр хамгаалалтыг зогсооно.

15.4.Обьектыг түр хугацаагаар хамгаалах, зорчигч, ачаа тээшийг харгалзан хүргэх аюулгүйн ажиллагааны журмыг дотоодын цэргийн штабын дарга эрх бүхий албан тушаалтантай хамтран батална.

Хохирогчийн эгч: Бүх нийтийн амралтаар бусад нь баярлаж байхад, бид зул ширтээд хагацал дунд сууж байна

     Тэгвэл хохирогчийн эгч цахим хуудастаа “Өнөөдөр бүх нийтийн амралтын өдөр. Бусад нь баярлаж, амарч байхад бид зул ширтээд, хагацал дунд сууж байна. Энэ төрд, энэ хариуцлагагүй нийгэмд үнэхээр гомдож байна. Миний дүү ердөө л 20 настай, ээжийнхээ өврөөс ч гараагүй шахуу балчирхан амьтан байлаа шүү дээ. Цэргийн албаа нэр төртэй хаагаад, эх орондоо зүтгэнэ гээд улирч үлдээд жил л болж байсан юм. Гэтэл тэр "томчууд", тэр дарга нар яав. Туршлага муутай, залуухан жолоочтой хамт энэ их цас мөстэй, халтиргаа гулгаатай үед Архангайн айхтар даваа руу, тийм хол газар, тэсрэх бөмбөг тээвэрлэх аюултай даалгаварт явуулчихжээ. Мэдсээр байж... Тэр их эрсдлийг мэдсээр байж яагаад туршлагатай хүмүүсээ явуулсангүй вэ. Яагаад 20-хон настай, амьдрал үзээгүй жаахан дүүг минь ийм аймшигтай эрсдэл рүү түлхчихээд өөрсдөө дулаан хөнжилдөө тайван амарч чадаж байна аа. Хөөрхий ижий минь ухаан санаа нь орон гаран, "Хүүгийнхээ замыг усан зам татуулчихгүй юмсан" гэсэндээ ламын үгэнд итгэж, энгэр цээжнээ нулимсаа дотогшоо залгиад, унтаж ч чадахгүй зулын гэрэлд бөхөлзөж сууна. Уйлж ч болохгүй, унтаж ч болохгүй энэ их шаналлыг яалтай билээ. Бидэнд одоо зураг, зул, маанийн ерөөл гурав л үлдлээ. Энэ хариуцлагагүй байдлын төлөөсийг яагаад дандаа энгийн ард түмэн, ид хийж бүтээх насандаа яваа сайхан залуус амиараа төлөх ёстой гэж. Гомдолтой байна. Үнэхээр их гомдож байна" гэжээ.