БУСДЫГ ХӨНӨӨЧИХӨӨД ЦОГЦСЫГ НЬ ЧЕМОДАН, ШҮҮГЭЭНДЭЭ НУУЧИХДАГ ГЭМТ ХЭРЭГ ОЛНЫГ АЙДАСТ АВТУУЛЖ БАЙНА 

   Хамтран амьдрагчаа хөнөөж, цогцсыг нь шүүгээнд нуусан онц ноцтой гэмт хэрэг энэ сарын 21-нд гарчээ. Тодруулбал, 45 настай эрэгтэй нь өөрийн хамтран амьдрагч болох 30 настай эмэгтэйг хөнөөж, олон хоног нуусан байна. Мөн саяхан  нийгмийг цочирдуулсан онц ноцтой гэмт хэргийн талаар амиа алдсан 16 настай охины ээж О цахим орчинд шүгэл үлээлээ. Хэргийг эргэн сануулбал, 2024 оны зургадугаар сард 20 настай Ц.Дагвадорж нь 32 настай эмэгтэй болон 16 настай охиныг хэдхэн хоногийн зайтай онц хэрцгийгээр хөнөөсөн байдаг. Өөрөөр хэлбэл, 2024 оны зургадугаар сарын 8-9 шилжих шөнө З гэх 32 настай эмэгтэйг гэрт нь хөнөөж, хүнсний скочоор ороон хувцасны шүүгээнд нь хийсэн байсан гэх. Талийгаач эмэгтэйг ар гэрийнхэн нь болон хууль хяналтынхан ололгүй олон хоносон учир цогцос нь өмхийрсөн байдалтай гэрээсээ олджээ. Харин дээрх хэрэг болсноос 12 хоногийн дараа буюу 2024 оны зургадугаар сарын 21-ний шөнө Ц.Дагвадорж нь архидан согтуурсан үедээ Хан-Уул дүүргийн II хороонд оршин суух 16 настай Ш гэх охиныг онц хэрцгийгээр хөнөөж, цогцсыг нь чемоданд хийсэн байсныг цагдаагийнхан илрүүлсэн байдаг.

ЦЕГ: ХАМТРАН АМЬДРАГЧАА ХӨНӨӨСӨН ХЭРЭГТ ХОЛБОГДОГЧИЙГ ХҮНД ГЭМТ ХЭРЭГТЭЙ ТЭМЦЭХ ХЭЛТЭСЭЭС ШАЛГАЖ БАЙНА

      Хамтран амьдрагчаа хөнөөгөөд, олон хоног нуусан гэх хэргийн талаар Цагдаагийн Ерөнхий газрын мэргэжилтнээс тодруулахад “Нийтийн байранд 30 настай эмэгтэйн амийг хөнөөсөн этгээдийг дайчлан баривчилсан. Манай ах хамтран амьдрагчаа хөнөөсөн хэмээн хоёр, гурав хоног архи уугаад байна гэх мэдээлэл цагдаагийн байгууллагад бүртгэгдсэн. Дуудлагын дагуу шалгалтын ажиллагааг явуулахад нийтийн байрны ... тоот өрөөний шүүгээнд эмэгтэй хүний цогцос байсныг илрүүлж, хэрэгт холбогдогч этгээдийг дайчлан баривчиллаа. Тухайн хэргийг Мөрдөн байцаах албаны Хүнд гэмт хэрэгтэй тэмцэх хэлтэс, Шүүх шинжилгээний байгууллагын шуурхай бүрэлдэхүүн шалгаж байна” гэлээ.

АХ МИНЬ “ХАМТРАН АМЬДРАГЧАА ХӨНӨӨЧИХЛӨӨ ГЭЭД АРХИ УУГААД БАЙНА” ГЭХ ДУУДЛАГЫГ ХЭРЭГТ ХОЛБОГДОГЧИЙН ДҮҮ ЦАГДААД МЭДЭГДЖЭЭ

     Талийгаач эмэгтэй хамтан амьдрагчаасаа 15 насаар дүү байжээ. Хэрэгт холбогдогчийн дүү ахыгаа цагдаад мэдэгдэхдээ “Манай ах хамтран амьдрагчаа хөнөөчихөлөө гээд хоёр, гурван хоног архи уугаад байна” хэмээн дуудлага өгч, цагдаагийн газар хэргийг бүртгүүлсэн байна.  Харин Мөрдөн шалгах ажиллагаа, шүүх шинжилгээний байгууллагын дүгнэлт гараагүй учир юунаас болж дээрх харамсалтай хэрэг гарсныг цагдаагийн газраас мэдээллэх боломжгүй гэв. Цогцсыг өнгөрсөн бямба гарагт буюу зургаа хоногийн дараа олсон байна.