“ХОХИРОГЧ ГЭГДЭХ ОХИН ӨНГӨРСӨН ХАВАР СУРГУУЛИА ТӨГССӨН”

    СУИС-ийн харьяа "Бадмаараг" ахлах сургуулийн сурагчийг сургалтын менежерийнх нь нөхөр хүчирхийлэхийг завдсан гэх хэрэг өнгөрсөн оны арваннэгдүгээр сард гарчээ. Охин тус асуудлыг эцэг, эх, багш нартаа хэлэхгүй нууж явсаар өнгөрсөн зургадугаар сард цагдаад мэдэгдсэн байна.  Мөн хохирогч гэгдэх охиныг хүчирхийлэхээс гадна гэрийнхээ ажилд зардаг, цагаан сарынхаа буузыг хийлгэж байсан гэх шүүмжлэл гарсан. Харин тус хэрэг хэрхэн шийдэгдсэн, сургалтын менежер С-т ямар арга хэмжээ авсан талаар "Бадмаараг" сургуулийн захирал Л.Мөнхтөрөөс тодруулсан юм. 

     Тэрбээр “Сургалтын менежерийн нөхрийн хүүхэд хүчирхийлсэн байж болзошгүй хэргийг Чингэлтэй дүүргийн цагдаагийн газраас шалгаж байсан. Тус хэргийн гэмт хэргийн бүрдэлгүй хэмээн үзэж, хаасан байна лээ. Харин сургуулийн зүгээс Сургалтын менежер С-д зөрчлийн арга хэмжээ авч, мөнгөн торгууль ногдуулсан. Үүнээс гадна хүүхэд хамгаалалын газар болон хэд хэдэн газар сургалтын менежерийг шалгуулахаар хүсэлт өгчихсөн байгаа. Зарим газраас хариу тайлбар ирээгүй байна. Бүх газраас хариу ирчих юм бол тэднийг нэгтгэж үзээж, тухайн сургалтын менежерт ямар арга хэмжээ авахыг шийдвэрлэнэ. Мөн тухайн сургалтын менежертэй болон нөхөртэй нь холбоотой асуудлаар сонсгол хийх ажлыг зохион байгуулна. Тиймээс сургалтын менежер С  одоогоор ажлаа хийж байгаа” гэсэн юм. 

      Харин сургалтын менежер С-тэй холбогдож  үүсээд буй нөхцөл байдлын талаар тодруулахад “Би тайлбар мэдээлэл өгөх боломжгүй байна. Сэтгэл зүйгээ бэлдэж байгаад мэдээлэл өгнө” гэсэн юм. 

ЦЕГ: Сургалтын менежерийн нөхөр хүүхэхд хүчирхийлсэн гэх хэргийг хаасан 

     Тухайн хэргийг хэрхэн шийдвэрлэсэн талаар ЦЕГ-ын Хэвлэл мэдээллийн төвийн мэргэжилтнээс тодруулахад “Тухайн хэрэг өнгөрсөн оны арваннэгдүгээр сард гарсан юм билээ. Харин өнгөрсөн гуравдугаар сард цагдаагийн газар мэдэгдэж, хэрэг бүртгэл нээж шалгасан. Тухайн хэргийг гэмт хэргийн бүрдэлгүй хэмээн үзэж хаасан  байна” гэсэн юм. Мөн тус сургуулийн сургалтын менежер  С нь хүүхдүүдийг гэрийнхээ ажилд зардаг байж болзолшгүй гэх. Тухайлбал, цагаан сарынх нь буузыг хийж өгдөг, гэрийнх нь ажлыг хийж байгаад оройтчихоороо хонодог хэмээн хохирогч охин ярьсан байдаг. 

ХҮҮХЭД ХҮЧИРХИЙЛСЭН ГЭХ А: ТЭР ОХИН МИНИЙ НЭР ХҮНДЭД ХАЛДАЖ БАЙНА. МАНАЙД ИРЖ БУУЗ ХИЙЖ БАЙГААГҮЙ

    Харин хүүхэд хүчирхийлсэн гэх А нь "Тэр охин миний нэр хүндэд халдаж байна. 17 настай ч гэсэн том хүнээс дутахааргүй зантай. Сургуулийн бусад хүмүүсийг шалгасан юм уу. Би хувьдаа манай эхнэрийг ажлаас нь халах гээд ийм юм хийгээд байна гэж хардаж байна. Тэр охин манайд ирж цагаан сарын бууз хийж байгаагүй" гэх тайлбарыг өгсөн байдаг.