Сүхбаатарын талбай дээр баяр гуниг хосолсон хүнд өдөр байлаа, өчигдөр. Ерөнхийлөгчийн зарлигаар одон медаль, шагнал хүртсэн хүмүүс Төрийн ордноос гарч ирцгээж байв. Гэр бүл, хамт олон нь цэцэг барьчихсан, баяр хөөр, цэнгэл дүүрэн угтаж байсан жаргалтай цаг мөч. Хаврын эхэн сар гарах гэж байгаа болоод ч тэр юм уу өвлийн жавар уяссан тунгалаг өдөр байсан юм. Харамсалтай нь, баярлаж хөөрсөн хүмүүсийн  байгаа газраас ердөө 20 метр хүрэхгүй зайд, хамгаалалтад гарсан цагдаа нарын нүдэн дээр идэрхэн залуу яах ийхийн зуургүй өөрийгөө галдан шатааж, харамсалтайгаар нартаас буцлаа.

ЯМАР ШАЛТГААНЫ УЛМААС СҮХБААТАРЫН ТАЛБАЙ ДЭЭР ӨӨРИЙГӨӨ ГАЛДАН ШАТААСАН БЭ

            Юунаас болж өөрийнхөө амь насыг золих болов. Түүнд бусдаас ирсэн ямар нэгэн дарамт байсан уу,  цар тахлын хүнд цаг үед хоногийн хоолоо олж чадахгүй болтлоо хэцүүдсэн үү. Өр зээлээ төлж чадахгүй болов уу. Монголын төр засгийн  хүнд суртал, буруу шийдвэрт  голдоо ортол гомдож,  сүүлчийн бүлээн амьсгалаа золих болов уу. Эсвэл хэн нэгэн улстөрчийн бохир тоглоомын золиос болж, “Амьдрахын төлөө юм чинь арай ч үхчихгүй байлгүй” гээд болчимгүй үйлдэл хийчихсэн юм биш байгаа даа гээд л түмэн хариулт нэхсэн асуултыг олон нийтэд үлдээгээд энэ хорвоог үүрд орхин одлоо.

ТАЛИЙГААЧИЙН АР ГЭР :11 ЦАГ ӨНГӨРӨӨД  ГЭРЭЭСЭЭ ГАРСАН

          Харамсалтай байна, үнэндээ. Хайран сайхан залуу. Алдаа оноон дундуур туулж ирсэн хүний сайхан үр, хүүхдийн сайн аав байсан юм билээ, тэр. Аав, ээж нь түүнийг хайраар дутаахгүй өсгөж, хөлийг нь дөрөөнд, гарыг нь ганзганд хүргэсэн нь гарцаагүй.   Алдаагүй амьдрал  гэж хүний амьдралд байдаггүй юм гэнэ лээ. Гэхдээ Э.Энхтөгс гэх эгэл даруухан залуу гэгээн сайхан амьдрал өөд тэмүүлж, хэнээс ч дутахааргүй сайхан амьдарчих юм сан гэсэн мөрөөдлөөр жигүүрлэж  байсан гэдгийг найз, нөхөд нь хэлж байна лээ. Бас амьдрахын төлөө зун нь барилга дээр ажиллаж, өвөл хавартаа кино, дууны CD зардаг. Мөн түүнд машины үнэртүүлэгч борлуулахаар замын голоор алхаж явсан өдрүүд олон байсан гэсэн. Хэдийгээр анхны амьдрал нь бүтэлгүйтсэн ч тэр амьдралд хайртай байсныг ар гэрийнхэн нь дурсан ярьж байна.  Олсон хэдэн төгрөгөө хүүхдэдээ өгдөг. Бас аав, дүүгээ авч явдаг байсан юм билээ. Түүний ар гэрийнхний хэлж буйгаар талийгаач өчигдөр унтаж байгаад 10:00 цаг өнгөрөөд боссон байна. Өглөөнийхөө цайг уучихаад “Ажилдаа явлаа” гэж хэлээд гэрээсээ гарсан гэнэ. Гэвч хэдхэн цагийн дараа түүнийг ертөнцийн мөнх бусыг үзүүлснийг цагдаа нар ар гэрийнхэнд нь хэлсэн байдаг. Аав, дүү хоёр нь, ахан дүүс нь “Юунаас болж, яагаад, ямар учраас” хэмээх асуултыг өөрсдөөсөө мянга түмэн удаа асуухаас өөрийг хийж чадахгүй сууна.   

ЭРГҮҮЛИЙН  ЦАГДАА, ЭРЭЛХЭГ ЗОРИГТОЙ ХОЁР ЗАЛУУД БАЯРЛАЛАА

            Сүхбаатарын дүүргийн цагдаагийн нэгдүгээр хэлтсийн алба хаагч Б.Даваажав нас барсан залууг өөр дээрээ шатахуун асгаад, шүдэнз зурах гэж байгааг анх ажлаа хийж зогсохдоо харсан байдаг. Тэрбээр талийгаачийг жир бус байдлаар алхаж явааг харсан даруйдаа ухасхийн гүйж, болиулах гэж оролдсон ч өөдөөс нь гал дүрэлзтэл ассан нь дүрс бичлэгт тодоос тод үлджээ. Хажуугаар нь өнгөрч явсан хоёр ч залуу цагдаатай уралдаж шахуу очоод талийгаачийн биед дүрэлзэж буй галыг унтраахаар гадуур хувцсаараа бүтээгээд авсан. Даанч оройтсон байлаа. Гэхдээ тэд эрэлхэг зоригтой байсан. Хэдхэн секунт, долиор хэмжигдсэн богинохон мөчид тэд талийгаачийн амийг аврахыг оролдсон, чадах бүхнээ хийсэн. Тэдэнд эрдэнэт хүний амийг аврах гэж оролдсонд нь баяр хүргэх ёстой.

ГАР УТСААРАА БИЧЛЭГ ХИЙН  ЗОГСОХ  ЭМЭГТЭЙ БУЮУ НИНЖИН СЭТГЭЛ ХААЧИВ

           Талийгаачийн халуун гал дунд тарчилж, амьсгал хурааж буйг нэгэн эмэгтэй гар утсаараа бичлэг хийн зогсож байлаа. Үнэндээ тэр эмэгтэйн хийсэн үйлдэл, олныг цочирдуулсан. Эмэгтэй хүн мөртлөө хэн нэгэн амьсгал хурааж байхад яагаад юу ч болоогүй юм шиг жишим ч үгүй хэнэггүй царайлан бичлэг хийж зогсож зүрхлэв. Галыг нь унтраахад туслалцаа үзүүлдэггүй юм аа гэхэд гар утсаараа бичлэг хийхгүй байж болоогүй гэж үү. Эх хүний, ээжийн нинжин сэтгэлээ хаанаа гээчихээд зогсож байгаа вэ гэдэгт олон хүний дургүй хүрч байлаа.

ТАЛИЙГААЧ ЗАЛУУ  ХЭНТЭЙ УТСААР ЯРЬЖ, УУЛЗСАН, СҮХБААТАРЫН ТАЛБАЙ ДЭЭР ХЭНЭЭР ХҮРГҮҮЛСЭН БОЛОХЫГ ШАЛГАЖ БАЙНА

            Цагдаа нар дээрх хэргийг нягтлан шалгаж байна. Харамсалтайгаар амь насаа алдсан Э.Энхтөгс уг үйлдлийг хийхээсээ өмнө гар утсаараа болон цахим хаягаараа хэн хэнтэй холбогдсон уу, холбогдсон бол юу ярьсан. Ямар нэртэй шатахуун түгээх станцаас цэвэр усны саванд шатахуун авсан бэ, хэн түүнд өгсөн бэ гэдгийг мөрдөгчид тогтоохоор шалгаж байна. Түүнчлэн талийгаачийг гэрээсээ гараад хэнтэй уулзсан, Сүхбаатарын талбай дээр ямар машинаар хүргүүлж ирсэн болохыг баримтаар тогтоох ажиллагаа хийгдэж байгааг албаны эх сурвалж онцолж байлаа. Мөн Шүүх шинжилгээний үндэсний хүрээлэн дээр  талийгаачийн нас барсан шалтгаан болон түүний цуснаас дээж аван шалгаж байгаа аж. Хэргийг шалгаж байгаа цагдаа нарын хэлж буйгаар түүний өмсөж явсан хувцас,  гэрээс нь ямар нэгэн гэрээслэл олдоогүй гэх мэдээлэл байна.  

            Олон нийтийг сэрдхийлгэсэн энэхүү хэргийг хууль, хяналтын байгууллагынхан улстөржүүлэлгүй үнэн зөв шалгаж, тогтоогоосой хэмээн олон нийт хүсч байна.