"ЗУНЫ ЗУГАА" ШОУНЫ ҮЕЭР АРХИДАН СОГТУУРСАН ЗАЛУУС ТААЛАГДСАН ОХИДОО БУЛААЦАЛДАЖ, ЗОДОЛДСОН

      “Зуны зугаа” буюу артист 113-ийн тоглолт тавдугаар сарын 31-нд болсон билээ. Шоуны үеэр үзэгчид хоорондоо зодолдож, нэгнийгээ хутгалсан гэх мэдээлэл олон нийтийн сүлжээгээр цацагдаж, хохирогчид өөрсдийн цахим хуудастаа хэрхэн гэмтсэн тухайгаа илэрхийлж байна. Үүгээр зогсохгүй зочин уран бүтээлчид хүртэл тайзан дээр зодолдсон дүрс бичлэг олон нийтийн сүлжээнд ил болж, тус шоуг эмх замбараагүй болсон тухай үзэгчид шүүмжилж байлаа. Бид шоуны үеэр бусдад хутгалуулж, эрүүл мэнд, сэтгэл санаагаараа хохирсон хохирогчийн найз А-тай ярилцлаа.

-Зуны зугаа шоуг хэдүүлээ үзсэн бэ. Тухайн үед юу болсон болоод найз нь бусдад хутгалуулсан юм бэ?

      -Би нэг эмэгтэй дүүтэйгээ хохирогч найз минь найз залуу болон найз залуугийнхаа найзтай явж байсан юм. Бид шоун дээр тааралдаад удаагүй байсан. Бид эрчүүдийгээ ариун цэврийн өрөөний гадаах асрын үүдэнд юм яриад хүлээж байсан юм. Гэтэл 2-3 залуу хажуугаар зөрөхдөө найзын минь ташаа руу хутгалчихаад зугтаачихсан. Би түүнийг нь өгзөг рүү нь цохьчихлоо гэж бодтол найз минь ёолоод сөхрөөд суучихсан. Тэгээд би цус гарсных нь дараа тэднийг хутгалчихлаа гэж мэдсэн. Тэднийг ямар хүн байсныг нь харах сөхөө байгаагүй. 

-Найзынх нь  буруутай үйлдлээсээ болоогүй гэсэн үг үү?

     -Бид хоорондоо юм яриад зогсож байсан. Бидэнд тохиолдсон явдлаар бол тэд зүгээр зогсож байсан хүмүүсийг хажуугаар нь зөрөхдөө хутгалсан. Ер нь хэн нэгэн буруутай үйлдэл гаргалаа ч гэсэн хүйтэн мэстэй олон нийтийн газар явах нь зөв үү. Тэгээд хэнийг ч хамаагүй хутгална гэдэг аймшигтай биз дээ. Би олон нийтийн газраар явахдаа айдаг болчихсон. Айдас маань хэзээ арилж, дахин хэзээ тоглолт үзэхээ мэдэхгүй байна. 

-Найзынх нь биеийн байдал ямар байгаа вэ. Та анхан шатны тусламжаа яаж авсан бэ?

       -Найзыгаа хутгалуулсныг мэдээд цэнгэлдэхийн үүдэнд байсан түргэний машин дээр очиж, наалт наалгуулаад такси барьж, ГССҮТ-д очсон. Эмнэлэгт очоод гурван сантиметр оёдол тавиулсан. Одоо гэрээрээ эмчлүүлж байгаа. Тухайн үед цус алдсан байдалтай эмнэлэг дээр очсон. 

-Тоглолтын үеэр согтууруулах ундаа хэрэглээгүй хүн бараг байгаагүй гэх яриа гарсан?

      -Биднийг 19:00 цагийн үед очиход эрүүл хүн бараг байгаагүй. Ихэнх нь согтууруулах ундаа хэрэглэчихсэн сургуулийн хүүхдүүд байсан. Тийм замбараагүй байдалтай байсан нь цэнгэлдэхийн үүдээр ороход л мэдэгдсэн. Тэгээд удаа ч үгүй найз минь гэмтсэн. Тэр шоу ямар ч зохион байгуулалтгүй байсны улмаас олон хүн бэртэж, гэмтсэн. 

-Найзынх нь сэтгэл зүй ямар байна. Ойрд холбогдсон уу?

       -Олон нийтийн газар хутгалуулсан “шок”-ноосоо гарч чадаагүй байгаа гэсэн. Хамт амьдардаггүй болохоор ямар байгааг нь сайн мэдэхгүй байна. Шоу үзэх гэж яваад бусдад хутгалуулж, эрүүл мэнд, сэтгэл санаагаар хохирно гэдэг аймшигтай явдал биз дээ. 

    Харин бусад эх сурвалжийн мэдээллээр "Зуны зугаа" шоуны үеэр архидан согтуурсан залуус уусан зүйлдээ халамцаж, таалагдсан охидоо буцаалдаж хоорондоо зодолдсон гэв.

ЦЕГ: “ЗУНЫ ЗУГАА” ТОГЛОЛТЫН ДАРАА 10 ХУТГА, ЗОДООНЫ ХОЁР ХЭРЭГСЭЛ ХУРААН АВЧ, ГЭЭГДСЭН 18 ЭД ЗҮЙЛИЙГ ХҮЛЭЭЛГЭЖ ӨГСӨН

      Тус шоуны үеэр болсон хэргүүдтэй холбоотойгоор ЦЕГ-аас  өчигдөр мэдээлэл өгөхдөө" Бид "Зуны зугаа" тоглолтын үеэр ажилласан байгууллагуудад албан шаардлага хүргүүлж ажилласан. Тоглолтын үйл ажиллагаа, гэмт үйлдлээс урьдчилан сэргийлэх чиглэлээр цагдаагийн байгууллагын бусад төрөл, мэргэжлийн албадаас, харьяа дүүргийн цагдаагийн газраас нийт 140 албан хаагч хяналт тавьж ажилласан. Энэ үеэр 10 хутга, зодооны хоёр хэрэгсэл хураан авч, гээгдсэн 18 эд зүйлийг хүлээлгэж өгсөн. Мөн төөрсөн, насанд хүрээгүй мөртлөө архи согтууруулах ундааны зүйл хэрэглэсэн 22 хүүхдийг ар гэрийнхэнд нь хүлээлгэж өгсөн. Мөн тухайн тоглолтын үеэр бие, эрүүл мэндэд хохирол учруулсан гурван иргэнд шалгалтын ажиллагаа явуулж байна. Баян-Өлгий аймгийн Өлгий сумын нутагт болсон харамсалтай ослыг шалгаж байгаа. Шалгалтын явцаар нарийн тодорхой мэдээлэл гарах байх. Ослын үеэр гэмтсэн хүүхдүүд эмнэлгийн тусламж гарсан. Одоогоор биеийн байдал гайгүй байгаа" гэв.

ГССҮТ-ИЙН ИХ ЭМЧ Г.ЛХАГВАДОРЖ: “ЗУНЫ ЗУГАА” ШОУНЫ ҮЕЭР ИРСЭН ГУРВАН ҮЙЛЧЛҮҮЛЭГЧИД ЗӨВЛӨГӨӨ ӨГЧ ДҮҮРГИЙН ЭМНЭЛЭГ РҮҮ НЬ БУЦААСАН

      ГССҮТ-ийн их эмч Г.Лхагвадорж  цаг үеийн асуудалтай холбоотойгоор сэтгүүлчдэд мэдээлэл өгсөн билээ. Тэрбээр “ГССҮТ-ийн яаралтай тусламжийн тасгаар “Зуны зугаа” шоуны үеэр гэмтсэн гурван үйлчлүүлэгч анхны тусламж авсан. Тэд гуяны өнгөц шархтай байсан учир шарханд ариутгал, халдваргүйтэл хийгээд зөвлөгөө өгч, харьяа дүүргийн эмнэлэгт буцаасан. Гэмтлийн эмнэлэгт хэвтэх заалт буюу судас, мэдрэлийн гэмтэл байгаагүй учраас гурван үйлчлүүлэгчийг буцаасан. “Зуны зугаа” шоутай холбоотойгоор ирж үзүүлсэн тэднээс өөр үйлчлүүлэгч байхгүй. Зуны цагт болдог шоу, арга хэмжээтэй үед ачаалал нэмэгддэг. Цэнгэлдэх хүрээлэнд архи согтууруулах ундаа зараад шоу цэнгээн болдог учир хүмүүс хөөрлийн байдалд орж биенийгээ санаатай болон санамсаргүй байдлаар гэмтээх тохиолдол их гардаг гэв.