Тайландад суугаа Элчин сайд А.Төмөрийн эхнэр Л.Орхон Бангкок хотын 17 давхар барилгаас унаж амиа алдсан харамсалтай хэрэг гараад байгаа. Талийгаач бүсгүй амиа хорлосон уу, эсвэл нөхөр нь амиа хорлоход хүргэсэн үү гэдэг асуулт эдгээр өдрүүдэд хариултгүй байна. Хэргийн үнэн зөвийг тогтоохоор Тайландын Бангкок хотын Цагдаагийн газраас мөрдөн шалгаж байгаа. Одоогоор шүүх шинжилгээний дүгнэлт гараагүй байгаа юм. Хэрэг Тайландын Бангкок хотод болсон учир Монголын хуулийн байгууллага шалгалт хийх, анхаарал тавих боломжгүй. Тэгвэл уг хэргийн эргэн тойронд дараах мэдээллийг бэлтгэлээ.

         Талийгаач О гурван хүүхэдтэй. Хамгийн бага хүүхдээ асарч, хөгжлийн бэрхшээлтэй хүүхдийг хэрхэн асрах, түүнтэй харилцах чиглэлээр магистр хамгаалсан байжээ. Тэрээр 41 настай, 2007 онд МУИС-ийн Олон улсын харилцааны сургуулийг төгссөн. Элчин сайдын яаманд атташегаар ажиллаж байсан нэгэн. Харин 2019 оны арваннэгдүгээр сард Ерөнхийлөгч Х.Баттулга Тайландын Хаант Улсад суух Онц бөгөөд Бүрэн эрхт Элчин сайдаар А.Төмөрийг томилох санал гаргаж, УИХ дэмжсэн байдаг. Тухайн үед Гадаад харилцааны сайдаар Д.Цогтбаатар, дэд сайдаар нь Б.Батцэцэг ажиллаж байлаа. Улмаар 2020 оны долдугаар сараас А.Төмөр албан ёсоор Тайландын Хаант Улсад суух Онц бөгөөд Бүрэн эрхт Элчин сайдаар ажиллаж эхэлсэн ажээ. Ингээд тэд 2020 оноос гэр бүлээрээ Тайланд Улсад ажиллаж амьдарч байжээ. Элчин сайд А.Төмөрийн Тайландад суух бүрэн эрхийн хугацаа өнгөрсөн 2024 оны долдугаар сард дууссан. Гэсэн ч Гадаад харилцааны яамнаас А.Төмөрийн бүрэн эрхийн хугацааг нэг жилээр сунгасан. Ирэх долдугаар сард энэ хугацаа нь дуусна. 

       Талийгаач О хэрэг гардаг өдөр 19:30 цагт гэртээ харьжээ. Ингэхдээ биеийн гаднах байдал хэвийн, сэтгэл санаа нь тогтвортой байсныг хяналтын камерын бичлэг нотолж байгаа аж. Харин Элчин сайд А.Төмөр 00:00 цаг өнгөрч байхад гэртээ харьсан. Ингээд эхнэр нь 00:56 цагийн үед тагтнаас унаж, Банкокын цагдаад 01:09 цагт дуудлага өгсөн байдаг. Эмнэлэг, цагдаагийн албан хаагчдыг очиход талийгаач 17 давхраас дөрвөн давхарт унаж, амьсгал хураасан байсан. Ингээд цогцсыг эмнэлэг рүү авч явжээ.

    Одоогийн байдлаар А.Төмөрийг цагдаагийн байгууллагаас шалгаж байгаа эсэх нь тодорхойгүй. Мэдүүлэг, байцаалт авсан эсэх нь ч тодорхойгүй байгаа юм. Харин талийгаачийн цогцсыг хэрэг гарсны маргааш нь буюу тавдугаар сарын 20-нд чандарласан. Талийгаачийн ар гэрийнхэн 20-21-нд шилжих шөнө Тайландад очжээ.

ТАЛИЙГААЧИЙН ЭГЧ Л.ОНОН: А.ТӨМӨР БИДНИЙГ ОЧИХООС ӨМНӨ ДҮҮГИЙН МИНЬ ЦОГЦСЫГ ЧАНДАРЛААД, ГАР УТСЫГ НЬ НУУЧИХСАН БАЙСАН

Талийгаачийн ар гэрийнхэн хэргийг гадны нөлөөтэй буюу Элчин сайд А.Төмөрийг уг хэрэгт буруутай гэж үзэж байгаа. Мөн А.Төмөрийг хариуцлага хүлээж, Элчин сайдын суудлаас нь буулгахын тулд олон нийтээс дэмжлэг хүсэж, гарын үсэг цуглуулж байгаа юм.

       Талийгаач О-ны эгч Л.Онон цахим хуудастаа “Хайртай дүүгээ алдсан нь зүгээр нэг харамсал биш. Энэ бол завхайрал, ёс зүйгүй харилцааны харанхуй сүүдэрт өртөн амьдралаа алдахад хүрсэн гашуун үнэн. Хүний нутагт хэн нэгний зугаа цэнгэл, ёс суртахууны уналтаас болж гурван хүүхдийн ээж амьдралын төлөө тэмцэж явсан сайхан дүү минь амь насаа алдсан нь үнэхээр эмгэнэлтэй. Бид үнэнийг нэхэх, шударга ёсыг шаардах эрхтэй. Хэргийн талаар мэдээлэл гармагц өмнө нь эмгэнэл ч илэрхийлээгүй А.Төмөрийн аав Үндсэн хуулийн цэцийн дарга асан Ж.Амарсанаа бидэнтэй холбогдсон. Миний дүүг хайрлаж, хамгаалж чадахгүй байсан бол зүгээр салчихгүй яасан юм бэ, А.Төмөр. Түүний нэр төрийг сэвтээж, төрийн албанаас нь хөөгдүүлэхгүй гэсэндээ ээж, эгч нь миний дүүгээс “Битгий салаач” гэж гуйж байсан. А.Төмөр биднийг Тайландад очихоос өмнө дүүгийн минь цогцсыг чандарлачихсан байсан. Бид дүүгээ ямар байдалтай байсныг хараагүй. Хүмүүст хэлэхдээ “Толгой нь эргээд тагтнаас унасан. Золгүй явдал байсан” гэж байна лээ. Гэсэн хэрнээ дүүгийн минь гар утсыг нуугаад бидэнд өгөөгүй. Бид маш их гомдолтой байна. Дүүгийнхээ хийж чадаагүй бүгдийг хийхийн төлөө хичээх болно. Гэм буруутай хүмүүст хариуцлага тооцуулна” гэж удаа дараа бичсээр байгаа юм.

ЭЛЧИН САЙД А.ТӨМӨРИЙН ААВ Ж.АМАРСАНАА: БЭРИЙН МИНЬ ҮХЭЛ ЗОЛГҮЙ ЯВДАЛ БАЙСАН, ХУУЛИЙН БАЙГУУЛЛАГА ШАЛГАЛТ ХИЙЖ БАЙГАА

       Харин Элчин сайд А.Төмөрийн аав Үндсэн хуулийн цэцийн дарга асан Ж.Амарсанаа хэвлэлд мэдээлэл өгөхдөө “Бидэнд тохиолдсон уй гашууг хуваалцаж байгаа та бүхэндээ баярлалаа. Миний охиноос ялгаагүй хүүхэд, хүүгийн эхнэр, гурван ачийн минь ээж золгүй байдлаар өөд боллоо. Золгүй явдал тохиолдсон гэж хэлмээр байна. Тайландын хууль шүүхийн байгууллага хянаж, шалгаж байна гэж ойлгосон. Асуудал дуусаагүй байна, үүний дараа албан ёсны хууль зүйн шийдвэрүүд гарах байх. Бурхан болоочийн 49 хоног ч болоогүй байхад энэ тэнд мэдэгдэл хийж, хүмүүсийн толгойг эргүүлэх хэрэггүй бодож байгаа. Гэхдээ сүүлийн үед цахим сүлжээнд буруутгасан олон мэдээлэл гарч байна. Албан ёсны шийдвэр гараагүй байхад  нийгмийг сандралгүй байхыг хүсэж байна. Бэр, хүү, ач нарын зургийг гаргаж байгаад харамсаж байна, тэр хүүхдүүд буруугүй шүү дээ. Миний зургийг ч тавьсан байна лээ, би бол зүгээр. Та бүхнийг хүлээцтэй, хүн чанартай байгаач гэж хүсэх гэсэн юм” гэсэн юм.

Одоогийн байдлаар Элчин сайд А.Төмөрийг огцруулах асуудал хөндөгдөөгүй. Хууль хяналтын байгууллага шалгаж дууссаны дараа уг асуудлыг хэлэлцэх ажээ.