Сэлэнгэ аймгийн Хүдэр сумын ерөнхий боловсролын сургуулийн зургадугаар ангийн сурагчдад Умайн хүзүүний хорт хавдрын эсрэг вакцин хийжээ. Вакцины улмаас хэд хэдэн хүүхэд өндөр халуурч, биеэр нь тууралт, таталт өгч, хүнд байгаа талаар эх сурвалж мэдээллээ.

      Өнгөрсөн арваннэгдүгээр сарын сүүлчээр 11 настай хүүхдүүдэд вакцин хийх тов гарч, эцэг эхчүүдтэй нь уулзалт хийсэн байна. Ингээд эцэг, эх нь зөвшөөрсөн хүүхдүүдэд вакцин хийж эхэлжээ. Харин хоёр хоногийн өмнө ар гэрийнхэн нь зөвшөөрөөгүй хүүхдүүдэд хүчээр вакцин хийж, үүний улмаас хүүхдүүдийн биеийн байдал муудаж эхэлжээ. Энэ талаар Хүдэр сумын зургадугаар ангийн сурагч хүүгийн аав холбогдож, манай сайтад мэдээлэл өглөө.

-Юу болсон талаар та ярихгүй юу. Хүүгийн тань биеийн байдал ямар байгаа вэ?

     -Биеэр нь тууралт гарч, өндөр халуурч байна. Хүү минь зургадугаар ангид сурдаг. 30 хоногийн өмнө ангийн багш, эмнэлгийн ажилтан нар хамтраад вакцины талаар сургалт орсон юм байна лээ. Ингэхдээ хүүхдүүдийн эцэг, эхийг дуудаж, мэдээлэл өгсөн байдаг. Бид уурхайд ажилладаг учраас тэр өдөр хуралд очиж чадаагүй. Харин фэйсбүүкээс вакцин тарих гэж байгааг нь мэдээд хүүгийнхээ ангийн багш руу нь залгасан. Ингээд “Энэ вакцины талаар бид өмнө нь судалж, мэдсэн. Хор уршгийг нь мэдэж байгаа учраас хүүдээ вакцин хийлгэхгүй” гэж хэлсэн. Ангийн багш нь “Хийж болох, болохгүйг би мэдэхгүй байна. Та хариуцсан эмнэлгийн ажилтан руу нь холбогдоорой” гэсэн. Би эмч н.Түмэнцэцэг рүү холбогдоод, “Миний хүүд вакцин хийхгүй шүү. Ар гэрийнхэн нь зөвшөөрөхгүй” гэхэд “Хуулиар тогтоогдсон товлолт вакциныг хийлгэх ёстой” гээд бид маргаж эхэлсэн. Ямар ч хамаагүй аргаар хийлгэхгүй, хийсэн байвал хатуу хариуцлага тооцно гэдгээ хэлээд салгасан. Тэгээд вакцин хийх өдөр нь хүүгээ хичээлд нь явуулаагүй, таслуулсан. Ангийн багш руу нь залгаад, “Би хариуцлагаа хүлээнэ. Хүүхдээ өнөөдөр албаар хичээлд нь явуулаагүй” гэхэд “Та гарч болох эрсдлийг бүрэн хариуцна” гэх утга бүхий өргөдөл гараараа бичиж өгөөрэй” гэсэн. Тэгээд би багшийн хэлсний дагуу өргөдөл бичиж, тэр өдөр миний хүү вакцинаас мултарсан.

-Тэгээд хоёр хоногийн өмнө хийсэн юм уу?

        -Бид уг нь вакцин хийх хугацаа нь өнгөрсөн, дуусчихсан гээд санаа амар байж байлаа. Гэтэл өчигдөр (уржигдар) хичээл тарсны дараа сургуулийн нийгмийн ажилтан, ангийн багш, эмнэлгийн ажилтан гурав нийлж байгаад хүчээр хүүд минь вакцин тарьчихлаа. Хичээл тараад, жижүүр хийж байсан хоёр хүүхдийг нийгмийн ажилтны өрөөнд хүчээр оруулж, вакцин тарьсан байгаа юм. Нэг хүүхдэд нь бүүр гар хүрсэн ч байж болзошгүй. Нөгөө бүлгийнх нь хүүхдүүд вакцин тарьж байгааг мэдээд, зугтаасан гэсэн. Ингээд албан хүчээр шахуу 10 гаруй хүүхдэд тарьсан.

-Хүүхдүүдийн биеийн байдал ямар байгаа вэ?

        -Хүүхдүүд өндөр халуурч, таталт өгсөн. Нэг хүүхдийн халуун буухгүй, эмнэлэгт үүр цайлгасан. Биеэр нь тууралт өгч, зовуурьтай байна. Хүүхдүүдийн ар гэрийнхэн гомдолтой байгаа. Сургуулийн захиргаанаас дуудаж, эмч нартай уулзалт хийсэн. Халуун нь буухгүй байхад эмнэлгийнхэн яаж ч чадахгүй байна. Бүр эмнэлгийн эмч нар “Вакцин хийлгэхгүй бол эмнэлгийн тусламж дахиж авна гэж саналтгүй шүү” гэж дарамталж байна лээ, эцэг, эхчүүдийг.

-Одоо нөхцөл байдал хэрхэн өрнөж байгаа вэ?

        -Сэлэнгэ аймгийн Эрүүл мэндийн төвөөс Ажлын хэсэг ирж, шалгалтын ажиллагаа явуулж байна. Хүүхдүүдэд тарьсан вакцины хугацаа 20 хоногийн өмнө дууссан байж болзошгүй. Хадгалалтын горим алдагдаж, хугацаа нь дууссан вакцин шахсан байж болзошгүй гэж хардаж байгаа. Бид үнэхээр гомдолтой байна” гэлээ.