Засгийн газраас Монгол Улсын 2025 оны төсвийн тухай хуулийг дахин боловсруулж, УИХ-аар хэлэлцүүлж байна. Үндсэндээ, УИХ таван сар төсвийн тухай хуулийг хэлэлцэж байгаа гэхэд хилсдэхгүй болов уу.

Тэгвэл дахин өргөн мэдүүлсэн төсвийн тухай хуульд Засгийн газрын зарим тусгай санг татан буулгахаар тусгажээ. Тодруулбал, Кино урлагийг дэмжих сан, Соёлын бүтээлч үйлдвэрлэлийг дэмжих санг татан буулгахаар тусгасан байна.

Иймд Кино урлагийг дэмжих сангаас зээл авсан албан байгууллага, уран бүтээлчдийг танилцуулж байна. Ташрамд дурдахад, Кино урлагийг дэмжих сангаас 11 албан байгууллага, уран бүтээлч нэг тэрбум төгрөгийн санхүүжилт авчээ.   

1. Иргэдийн цахим оролцоо ТББ нь- 2023 оны дөрөвдүгээр сарын 11-нд "Кино нүүдэл сургалт" кино зохиол, кино төслийн сургалт зохион байгуулахаар 240 сая төгрөгийн санхүүжилтийг Кино урлагийг дэмжих сангаас авчээ.

Тус төрийн бус байгууллагын өмчлөгчөөр нь сэтгүүлч, яруу найрагч Раднаадоржийн Улам-Оргих бүртгүүлтэй байдаг. Харин гүйцэтгэх захирлаар нь Төмөрбаатарын Ганцэцэг ажилладаг. Иргэдийн цахим оролцоо ТББ нь 2021 онд Оюуны өмч, зохиогчийн эрх, түүнд хамаарах асуудлын шийдэл, олон улсын төсөл зохицуулалтыг судлах, сурталчилан таниулах, олон нийтэд мэдээ мэдээлэл түгээх, төсөл хөтөлбөр хэрэгжүүлэх чиглэлээр үйл ажиллагаа явуулахаар улсын бүртгэлд бүртгүүлжээ.

2. “Ю Тийм” ХХК нь- 2023 оны тавдугаар сарын 1-нд "Амира" хүүхэлдэйн олон ангит кино бүтээхээр 240 сая төгрөгийн санхүүжилт авчээ.

 “Ю Тийм” ХХК нь жүжигчин Гончигийн Ундармаагийн нэр дээр бүртгэлтэй байдаг. Тус компани нь 2008 онд хүнсний дэлгүүр, бичиг хэргийн худалдааны чиглэлээр үйл ажиллагаа явуулахаар бүртгүүлж, 2021 оноос Урлаг соёлын арга хэмжээ зохион байгуулах, Дуу,дүрс авиа бичлэг хийх, Зар, сурталчилгаа хийх, Бүтээл туурвих, урлаг, үзвэр үйлчилгээ чиглэлээр үйл ажиллагаагаа өргөжүүлж, улсын бүртгэлд бүртгүүлжээ.

3. Гурумедиа ХХК нь- 2023 оны тавдугаар сарын 1-нд "Зэ" уран сайхны  кино бүтээхээр 120 сая төгрөгийн санхүүжилт авчээ.

Тус компани нь найруулагч  Сахъяа Бямбаагийн нэр дээр бүртгэлтэй байдаг. 2012 оноос Баримтат болон уран сайхны кино хийх, гадаад худалдааны чиглэлээр үйл ажиллагаагаа явуулж эхэлжээ.

4. “Айсити” ХХК нь- 2023 оны тавдугаар сарын 1-нд "Цагаан хадны өнгө" баримтат кино бүтээхээр 84 сая төгрөгийн санхүүжилт авчээ.

Тус компани нь найруулагч Чойжоованчиг Хоролдоржийн эзэмшлийнх. 2010 онд зар сурталчилгаа явуулахаар улсын бүртгэлд бүртгүүлж, 2023 оны арванхоёрдугаар сард буюу КИно  урлагийг дэмжих сангаас санхүүлжилт авсныхаа дараа Уран сайхны болон баримтат кино хийх, Кино дэлгэцийн бүтээл туурвих, Дуу, дүрс бичлэг хийнэ хэмээн үйл ажиллагааны чиглэлээ өөрчилжээ.

5. “Хүлэгү пикчерс” ХХК нь 2023 оны наймдугаар сарын 10-нд "Өмнөдийг зорих замд" уран сайхны кино бүтээхээр 80 сая төгрөгийн санхүүжилт авчээ.

Тус компанийн гүйцэтгэх захирлаар нь Нанзаддоржийн Отгонбат ажилладаг бол эцсийн өмчлөгч нь “Голомт”-ын буюу Данзандорж Баясгалан.  2014 оноос кино, дуу, дүрсний бичлэг хийх, гадаад худалдааны чиглэлээр үйл ажиллагаагаа явуулж байна.

6. “Цогийн наран” ХХК нь- 2023 оны тавдугаар сарын 1-нд "Зундарь" уран сайхны кино бүтээхээр 84 сая төгрөгийн санхүүжилт авчээ.

Тус компанийн гүйцэтгэх захирлаар нь Маамын Дэлгэрмаа ажилладаг бол хувьцаа эзэмшигчээр нь жүжигчин Балжиннямы Амарсайхан бүртгэлтэй байдаг. “Цогийн” наран компани нь 2013 оноос Кино, телевизийн нэвтрүүлэг бэлтгэх, Урлаг, соёлын арга хэмжээ зохион байгуулах, гадаад худалдаа, зар сурталчигаа явуулахаар улсын бүртгэлд бүртгүүлсэн байна.

7. Иргэн Баянжаргалын Гарамханд нь 2023 оны дөрөвдүгээр сарын 20-нд "Алдагдсан өдрүүд" хүүхдийн кино бүтээхээр 75.2 сая төгрөгийн санхүүжилт авчээ.
8. Иргэн Нямсайханы Тэмүүлэн нь 2023 оны дөрөвдүгээр сарын 20-нд ""Хөг-жим тээгч" баримтат кино бүтээхээр 32 сая төгрөгийн санхүүжилт авчээ.