“Дүнжингарав”-ын дэлбэрэлтийн гол буруутан нь “Дашваанжил” ХХК-ийн захирал Н.Баатаржав, жолооч Ч.Ренцэндорж нар болжээ. Тэднийг 5.4 тэрбум төгрөгийн хохирол учирсан галын хэрэгт тав жилийн хорих ялтай зүйл ангиар яллагдагчаар татаад байна. Харин зам тээврийн осолд өртсөн “Патрол” машины жолооч ор сураггүй болж, хэргээс мултарч байгаа бололтой.

        Тодруулбал, арван сарын өмнө Баянзүрх дүүргийн 26 дугаар хорооны нутаг дэвсгэрт өчигдөр 60 тонн газ тээвэрлэж явсан том оврын автомашин зам тээврийн ослын улмаас дэлбэрч, галын улмаас гурван аврагч, ослын бүсэд зорчиж явсан дөрвөн хүн амиа алдаж, 60 өрх орох оронгүй болсон байдаг. Дэлбэрэлтийн хэрэгт Цагдаагийн ерөнхий газрын Мөрдөн байцаах алба, Тээврийн цагдаагийн албаны хамтарсан ажлын хэсгээс мөрдөн шалгах ажиллагаа явуулж, Нийслэлийн прокурорын газраас хяналт тавин ажиллаж байгаа.Ажлын хэсэг байгуулагдсанаас хойш гал түймрийн улмаас иргэн, аж ахуйн нэгжид учирсан хохирлын хэр хэмжээ, гал гарсан шалтгаан нөхцөлийг тогтоохоор зургаан төрлийн 76 шинжилгээ хийлгэхээр шинжээч томилж 75 дүгнэлтийг гаргуулж, 350 гаруй хүнээс мэдүүлэг авчээ. Гал түймрийн улмаас Онцгой байдлын газрын гурван албан хаагч, явган болон автомашинаар зорчиж явсан дөрвөн иргэн нас барж, таван хүн хүнд, нэг хүн хүндэвтэр, 35 хүнд хөнгөн зэргийн гэмтэл болон угаарын хийн хордлогын шинж илэрсэн бол 36 тээврийн хэрэгсэл, 3 барилга байгууламж шатаж, 228 иргэн, 15 аж ахуйн нэгж байгууллагын эд хөрөнгөд 5.4 тэрбум орчим төгрөгийн хохирол учирсан болох нь тогтоогдсон талаар албаныхан мэдээлээд байна.

“ДАШВААНЖИЛ"-ЫН ЗАХИРАЛ Н.БААТАРЖАВ: ЗАМ ТЭЭВРИЙН ОСОЛ БОЛЧИХООД БАЙХАД НАМАЙГ ЯЛЛАГДАГЧААР ТАТААД БАЙХ ЮМ. “ПАТРОЛ” МАШИНЫ ЖОЛООЧ ХААЧСАН ЮМ БЭ

Уг осолтой холбоотогоор "Дашваанжил"-ын захирал Н.Баатаржаваас тодрууллаа.

              Тэрбээр “Олон хүний эрсдэж, хохирол учирсанд бид харамсаж байгаа. Маш аймшигтай осол болсон. Зам тээврийн осолд намайг яллагдагчаар татсанд гайхаж байна. Энэ бол хууль зөрчсөн туйлын буруу зүйл. Би тэр машин дотор суугаад, зогсоож байгаад, савнуудыг задлаад, гал гаргаад, хохирол учруулчихсан юм шиг яллагдагчаар татчихаад байна. Зам тээврийн осол болчихоод Батлан хамгаалахын яамны ажилтан, “Патрол” машины жолоочийг дурдахгүй байна. Хоёр машин мөргөлдчихөөд байхад нэгнийг нь буруутгаад байгаа шүү дээ. Зам тээврийн ослоос шалтгаалсан осол гэдгийг манай хуулийн багийнхан тайлбарлаж байгаа. Тухайн үед хяналтын камерыг шүүхэд манай компанийн машин 5-8 км цагийн хурдтай л явж байсан юм билээ. Тэгээд харагдахгүй нөхцөл байдалд мөргөчихсөн” гэлээ.

ГАЗ ТЭЭВЭРЛЭЖ ЯВСАН ЖОЛООЧ ХЭВИЙН АЖЛАА ХИЙЖ БАЙГАА ГЭВ

60 тонны газ тээвэрлэж явсан жолооч Ч.Ренцэндоржийг гадуур шалгаж, ажлаа хийж байгаа талаар эх сурвалж мэдээллээ.

         Тэрбээр “Патрол” автомашины жолоочийг сураггүй алга болж, хэргээс мултарсанд нь мөн гайхаж байгаагаа тайлбарласан байна. Бид түүний ойрын хүнтэй холбогдоход мэдээлэл өгөхөөс эрс татгалзаж, хууль хяналтын байгууллагынхан үнэн зөвөөр шийдэж өгөх хүсэлтэй байгаагаа илэрхийлэв.

Э.МӨНХНАРАН АЖЛААСАА ЧӨЛӨӨЛӨГДӨЖ, УТСАА САЛГАЖЭЭ

Батлан хамгаалах яамны Барилга захиалагчийн алба ТӨААТҮГ-ын дарга асан Э.Мөнхнарангийн унаж явсан “Ниссан патрол” загварын автомашин нь байгууллагын нэр дээр бүртгэлтэй буюу Батлан хамгаалах яамны нэр дээр бүртгэлтэй байдаг. Тэрбээр Төв аймагт албан ажлаар яваад, гэр рүүгээ харих замдаа осолд өртсөн талаар албаныхан тайлбарладаг.

Тэгвэл Э.Мөнхнаран осолтой холбоотойгоор ажлаасаа чөлөөлөгдөөд найман сар болжээ. Хэргийн яллагдагчаар татагдаагүй учраас эргэн ажилдаа орох хүсэлт өгсөн байж болзошгүй байна. Түүнтэй холбогдох гэсэн боловч утсаа салгасан байлаа.

Хамгийн сүүлд бидэнд өгсөн тайлбартаа “Нууцын баталгаанд гарын үсэг зурсан учир мэдээлэл өгөхгүй” гэж байсан билээ.

Харин Улсын ерөнхий прокурорын газрын Олон нийттэй харилцах хэлтсийн мэргэжилтэнтэй холбогдоход “Тодруулаад эргээд мэдээлье” гэлээ.