Өвөрхангай аймгийн Зүүнбаян-Улаан сумын ЕБС-ийн багш, ажилчдын амьдардаг 22 дугаар байрны дээвэр нуржээ. Тодруулбал, өнгөрсөн тавдугаар сард 22 дугаар байрны дээвэр, гадна пасад, дотор засвар хийх тендер зарласан байна. Харамсалтай нь, гүйцэтгэлийн ажил дуусаагүй байхдаа шинээр засварласан дээвэр нь нуржээ. Бид энэ талаар дараах мэдээлллийг бэлтгэлээ.

СУМЫН ИРГЭД: ХУЙ САЛХИНД ДЭЭВЭР НУРЖ, ЦАХИЛГААН ТАСАРСАН

Зүүнбаян-Улаан сумын ЗДТГ-аас өнгөрсөн тавдугаар сард 22 дугаар байрыг засварлах тендер зарлажээ. Тендерт “Сод-Ээл” ХХК шалгарч, 50 сая төгрөгөөр уг ажлыг хийж гүйцэтгэхээр болсон байна.

Сумын иргэдийн хэлж буйгаар “Өнгөрсөн амралтын өдрүүдэд бага зэргийн салхи гарсан. Гэтэл шинээр засварласан дээвэр нь хуй салхинд нураад уначихлаа. Азаар хүний амь эрсдэж, эрүүл мэнд хохирсонгүй. Гэхдээ олон айл цахилгаангүй, гэртээ амьдрах нөхцөлгүй болоод байна. Нар, салхи сийгсэн, дээвэр нь нураад уначихсан байшинд хасах хэмийн хүйтэнд яа хүн амьдрах юм бэ. Одоо засварлахаасаа өнгөрлөө. Энэ олон айлыг хааш нь нүүлгэж, хаана багтаахыг мэдкү байна. Хүүхдүүд нь ханиад хүрч, хөгшчүүл нь гэртээ даараад сууж байх нь” хэмээн бухимдсан юм.

Хамгийн ноцтой нь, уг орон сууцыг засварлаж дуусаагүй байгаа ажээ. Өнгөрсөн наймдугаар сард эхэлсэн ажил нь дуусаагүй байхдаа нурж унасан гэсэн үг л дээ.

“СОД-ЭЭЛ” ХХК-ИЙН ЗАХИРАЛ М.ЛХАГВАТОГТОХ: ОРОН НУТГИЙН САНГААС ОЛГОСОН 21 САЯ ТӨГРӨГИЙГ БУЦААЖ, СУМЫГ ХОХИРОЛГҮЙ БОЛГОНО

Улсын төсвийн 50 сая төгрөг салхинд хийсэж, олон айл орон оронгүй болсон нь “Сод-Ээл” гэх компанитай шууд холбоотой. Уг ажлыг М.Лхагватогтох захиралтай “Сод-Ээл” компани гүйцэтгэж байсан.

Бид энэ талаар “Сод-Ээл” компанийн захирал М.Лхагватогтохтой холбогдож тодрууллаа.

-Таны хариуцаж ажилладаг компани Зүүнбаян-Улаан сумын 22 айлын орон сууцыг засварлах тендерт шалгарсан юм байна. Засварласан дээвэр нь нураад унажээ?

-Үнэндээ, энэ ажлын тендерт манай компанийн нэрээр сумынх нь залуучууд оролцсон. Зүүнбаян-Улаан суманд амьдардаг хэдэн залуу холбогдоод “Засаг дарга ямар нэгэн компани олоод, энэ тендерийг ав. Төсөв нь татагдах гээд байна” гэнэ. Та компанийнхаа бичиг, баримтыг өгч туслаач” гэсэн. Би хүний сайхан сэтгэл гаргаж өнөөх залуучуудад компанийнхаа нэрийг түр ашиглуулсан. Түүнээс биш, манай компанийн ажилтнууд уг чанаргүй ажлыг хийж гүйцэтгээгүй.

-Компаниа хүнд ашиглуулж болдог юм уу. Уг ажлыг 50 сая төгрөгөөр хийж гүйцэтгэсэн үү?

-Өнгөрсөн наймдугаар сард манай компанийн дансанд 21 сая төгрөг орон нутгийн сангаас орж ирсэн. Би мөнгө орж ирсэн даруй ажил хариуцаж хийж байгаа залуугийн данс руу шилжүүлсэн. Энэ нь зөвхөн дээвэр засварын мөнгө байсан юм билээ. Дотор заслынх нь төсөв орж ирээгүй байсан. Тендер нь 50 сая төгрөг байсан нь үнэн.

-Дээврийн ажлыг дахин засварлах уу?

-Манай компанийн инженер өчигдөр Зүүнбаян-Улаан суманд ажиллаж, нөхцөл байдалтай танилцсан. Дээврийг дахин шинэчлэх ажлыг хийж гүйцэтгэнэ. Гэхдээ хуучирсан, ашиглалтын хугацаа дууссан байшинг дахин засварлах уу, ийм дээвэр хийх нь зөв байсан уу гэдэгт албаныхан дүгнэлт хийх байх. Ямартай ч орон нутгийн төсвөөс орж ирсэн 21 сая төгрөгийг буцаана.

ЗҮҮНБАЯН-УЛААН СУМЫН ЗАСАГ ДАРГА Б.БААСАН: НУРААД УНАСАН ДЭЭВРИЙГ ХОЁР САРЫН ӨМНӨ ХИЙСЭН

Харин бид энэ асуудлаар Зүүнбаян-Улаан сумын Засаг дарга Б.Баасантай холбогдож тодрууллаа.

Тэрбээр “Хоёр сарын өмнө засварласан байрны дээвэр нураад унасан нь үнэн. Дээврээ тавиад, дотоод заслын ажил хийж байсан. Засварын ажил дуусаагүй учраас сумын комисс хүлээж аваагүй байсан. Уг ажлыг тухайн компани бүрэн хариуцаж ажиллана” гэлээ.