Өнгөрсөн амралтын өдрүүдэд нийслэлд хэд хэдэн байршилд зам хааж, засварын ажил хийлээ. Үүний нэг нь Энхтайваны гүүрээс тэмээтэй хөшөө хүртэлх авто замын ажил байлаа. Харамсалтай нь, дээр дурдсан чиглэлийн авто замд технологийн алдаа гарсан нь олон нийтийн шүүмжлэл дагуулаад байна. Тэгвэл дээрх чиглэлийн замын шинэчлэлийг "Трүйрөүд" ХХК хийж гүйцэтгэжээ. Тодруулбал, уг компани Энхтайваны гүүрээс тэмээтэй хөшөө хүртэлх замыг нийслэлийн төсвийн 2.8 тэрбум төгрөгөөр засварласан гэнэ.

З.БАТЖАРГАЛ: Манай компанийн зассан зам овон, товон болсон нь хүйтэнтэй холбоогүй, технологийн алдаа гарлаа

Энэ талаар "Трүйрөүд" ХХК-ийн захирал З.Батжаргалтай холбогдоход дараах тайлбарыг өгч байна.

-Энхтайваны гүүрнээс Тэмээтэй хөшөө хүртлэх автозамын шинэчлэлтийг танай компани гүйцэтгэж байгаа юу?

-Тэгсэн

 -Сошиал зам засвартай холбоотой зураг цацагдаад байна. Энэ талаар тайлбарлахгүй юу?

-Цутгалтын үед  яалт ч үгүй   техкинийн жаахан саатал гарсан юм. Техникийн саатал гардаг шүү дээ. Техникээс улбаатай тйимэрхүү зүйл болсон. Тэрийг нь бид даруйхан засна. 

-Автозамын хөдөлгөөнийг маргааш (өнөөдөр) нээх ёстой, тийм үү?

-Уг нь тийм. Гэхдээ бид хөдөлгөөнийг өнөөдөр (өчигдөр) нээх гэж байна.

-Ийм нөхцөл байдалд нээж болох уу?

-Ийм байхад нь нээж болохгүй гэсэнзүйл байхгүй.  Бороо, цастай үед зам хаж, ачаалал үүсгэж  байснаас хөдөлгөөнийг нээе гэсэн бодолтой байна. Энэ чинь айхтар саатал биш шүү дээ.

-Техникийн саатал гэдэг нь ямар учиртай вэ. Хүйтнээс  улбаатайгаар ийм асуудал гарч болох уу?

-Хүйтнээс улбаатайгаар биш. Бид хүйтний улиралд ч хучит хийдэг шүү дээ. Тэгэхээр хүйтнээс бол ингэсэн гэвэл буруу болно. Техникийн саатлаас болоод бид гараар татаж, ийм зүйл болчихлоо.

Б.Одбаяр: “Трүйрөүд” компанийн засварласан замыг хүлээж авахгүй

 Нийслэлийн хэмжээнд энэ онд нийт 87 байршилд 162 км авто зам шинэчлэхээр төлөвлөн ажиллаж байгаа. Бид дээрх чанаргүй замын асуудлаар Нийслэлийн Замын хөгжлийн газрын дарга Б.Одбаяртай холбогдож, тодрууллаа.

     Б.Одбаяр "Тэгш байдал алдагдсан учраас өнгө, биеийнхээ асфалтыг хуулж аваад өөрсдөө дахин засварлана. Тэгж байж хүлээж авна.  Одоогоор ямар ч хүлээж авсан зүйл байхгүй байгаа. Гүйцэтгэгч компани нь  өөрсдөө засварлаад, хэвийн байдал оруулж, тэгш байдлыг хангаж байж хүлээж авна. Цас ороод зам нойтон байгаа учраас засварлах боломжгүй. Үлдэгдэл асфальт  нь дутуу байгаа. Ийм учраас хөдөлгөөнийг нээгээд ирэх долоо хоногт цаг агаарын нөхцөл байдлыг харгалүзээд засварлуулна" гэв 

“Трүйрөүд” компани нийслэлийн гурван байршилд авто зам засварлах, шинэчлэх тендерт шалгарчээ. Тодруулбал,

-Богд уулын арын авто замын баруун хэсгийн засвар, шинэчлэлт- 2.5 тэрбум төгрөг

-Чингисийн өргөн чөлөөний авто замын хэсэгчилсэн засвар, шинэчлэлт. (120-ын Тэмээтэй хөшөөний уулзвараас ТЭЦ-3-ийн уулзвар)- 7.4 тэрбум төгрөг

-Чингисийн өргөн чөлөөний авто замын хэсэгчилсэн засвар, шинэчлэлт. (Энхтайваны гүүрээс дунд голын гудамж, Тэмээтэй хөшөө)- 2.8 тэрбум төгрөгөөр засварласан байна.