Сүхбаатар дүүргийн ЗДТГ-ын даргыг түр орлон гүйцэтгэгч Н.Одончимэг ажлын байрандаа бусдаас их хэмжээний мөнгө авч байгаад үйлдэл дээрээ баригдаж, хуулийнханд саатуулагдсан. Хууль, хяналтын байгууллагын зарим эх сурвалж “Н.Одончимэг дүүргийнхээ “Сэлбэ” нэгдсэн эмнэлгийг барих тендерт ялсан барилгын компанийн удирдлагуудаас их хэмжээний мөнгө хахуульд авч байсан бололтой. Тус компаниас удаа дараа хахууль авч байсан байх магадлалтай баримтууд олдсон” гэсэн юм.

         Албан тушаалын байдлаа ашиглан бусдаас их хэмжээний хахууль авсан нь тогтоогдвол Н.Одончимэгийг Эрүүгийн хуулийн 22 дугаар зүйлийн 4-р зүйлд зааснаар “Хясан боогдуулах аргаар, эсвэл их хэмжээний хахууль авсан бол нийтийн албад ажиллах эрхийг 5-8 жилээр хасаж, 5-12 жил хорих ял шийтгэнэ" гэсний дагуу шийтгэнэ. Түүнчлэн тус хуульд “Хэрвээ уг гэмт хэргийг улс төрд нөлөө бүхий этгээд, эсвэл зохион байгуулалттай бүлэг үйлдсэн бол нийтийн албанд ажиллах эрхийг 20 жилийн хугацаагаар хасаж, 12-20 жилээр хорих ял шийтгэнэ” хэмээн заасны дагуу ял ногдуулах юм. Өөрөөр хэлбэл, гэм буруутай нь тогтоогдвол Сүхбаатар дүүргийн ЗДТГ-ын даргыг түр орлон гүйцэтгэгч Н.Одончимэг багадаа 12 жилийн ялаар шийтгүүлэх аж.

Ташрамд дурдахад, Эрүүгийн хуулийн нэмэлт өөрчлөлтөөр “Улс төрд нөлөө бүхий этгээдийн үйлдсэн гэмт хэргийг хялбаршуулсан журмаар хянан шийдвэрлэхгүй” болсон билээ.