Т.Бадамжунайд холбогдох хэргээс Ц.Анандбазарын хэргийг тусгаалаад байсан ч нэгтгэн шалгахаар болжээ. Тодруулбал, Т.Бадамжунайн хэргийг нэмэлт мөрдөн байцаалтад буцааж, Ц.Анандбазарыг хамт шалгаж эхэлсэн талаар эх сурвалж мэдээллээ.

       УИХ-ын гишүүн асан Ц.Ананбазар өнгөрсөн дөрвөн жилийн хугацаанд мөн ч завгүй ажиллаж, амьдарсан. Айрагны хөшөө босгохоос эхлээд олон дуулиант хэрэгт холбогдож, тойргынхоо иргэдийн чихийг халуулцуулсан. Одоо ч түүний хэрэг дуусаагүй, мөддөө дуусахгүй шинжтэй байна. Тэр дөрвөн жилийн хугацаанд “хүчирхийлэгч”, Хөгжлийн банкны найдваргүй зээлдэгч, Т.Бадамжунайн нэрлэсэн эрхэм гээд мөн ч олон хэрэгт тэр шалгагдаж байсан. Тэгвэл одоо Т.Бадамжунайд холбогдох хэрэг нэмэлт мөрдөн байцаалтад буцаж, Ц.Анандбазар хамт шалгуулахаар болж. Тойрог ч үгүй, суудал ч үгүй үлдсэн Ц.Анандбазарыг хамгаалах хүнгүй болсон учир тэр хууль хяналтын байгууллагад дахин ээрэгдээд эхэлсэн бололтой.

        Засгийн газраас хэрэгжүүлж байгаа "Шувуу" ажиллагааны хүрээнд Филиппин Улсаас авчирч, шалгаад буй ХХААХҮ-ийн сайд асан Т.Бадамжунай нийслэл хотыг таван жил удирдахдаа Зайсан толгойн урдах газрыг УИХ-ын гишүүн асан Д.Өнөрболорт, Маршалын гүүрний ардах газрын "Чингис хаан" банкны эзэн Д.Батаа зэрэг дотнын, харилцаа, хамаарал бүхий хүмүүстээ баруун, солгойгүй тараасан гэдэг. УИХ-ын гишүүн асан Ц.Анандбазар ч эл жагсаалтад багтсан.Ц.Анандбазарыг Бага тэнгэрийн аманд тансаг зэрэглэлийн хаус, хороололтой болгосон эх үүсвэрүүдийнх нь нэг Т.Бадамжунай байж болзошгүй гэж хамаатуулан шалгаж байгаа гэсэн үг л дээ. Гэхдээ тэрбээр өдгөө Бага тэнгэрийн аманд 160 айлын тансаг зэрэглэлийн хаус, 172 айлын орон сууц барьж, түүнийгээ хэдийнэ борлуулчихсан.

      Т.Бадамжунайд холбогдох хэрэг шүүхэд шилжээд байсан ч нэмэлт мөрдөн байцаалтад буцлаа. Угтаа Т.Бадамжунай хамтрагч, харьяалагч, “захиалагч”-аа Ц.Анандбазарыг гэж цохож, зарласан ч тусгаарлаж авч үлдсэн нь олны анхааралд байсан юм. Харин шүүх бүрэлдэхүүн хоёр үндэслэлээр Т.Бадамжунайд холбогдох хэргийг нэмэлт мөрдөн байцаалт хийлгэхээр болжээ.

         Тодруулбал, “Хэргийг буруу тусгаарласан”, “Шүүх хуралдаанаар нөхөн гүйцэтгэх боломжгүй мөрдөн шалгах ажиллагааг хийлгэх”-ээр прокурорт буцаасан байна. Өөрөөр хэлбэл, Т.Бадамжунайд холбогдох хэрэгт шалгагдаж байсан Ц.Анандбазарын хэргийг тусгаарласан нь буруу гэж үзсэн. Мөн үүнээс гадна УИХ-ын гишүүн асан Ц.Анандбазар Т.Бадамжунайг Улаанбаатар хотын менежерээр ажиллаж байхад Дархан цаазат Богдхан уулын Бага тэнгэрийн аманд газар авахаар их хэмжээний хахууль өгсөн байж болзошгүй гэх сэжүүр бий.