Сүхбаатар дүүргийн иргэд арав гаруй жил тендерчин бэлтгэж, УИХ-д сойж, уралдуулж, эцэст нь гишүүнээр сонгоод байгаа. Дахиад ч тендерчдийг бэлтгэж байна. Харамсалтай нь, иргэдийн амьдрал ядууралд идэгдэж, өдрөөс өдөрт дордсон хэвээрээ. Гэр хорооллын зам нь шавартай, гэр нь үерт урсдаг, цахилгаангүй, хаягжилтгүй, сургууль, цэцэрлэгийн хүртээмжгүй байдал арван жил бүү хэл дөрвөн жилийн өмнөхөөсөө ч дордсон.

            Сүхбаатар дүүргийн иргэдийг сайхан амьдруулж, хүний хөгжлийн бодлогыг хөгжүүлж, элгээрээ хэвтсэн эдийн засгийг сэргээнэ гэх том амлалттай ИТХ-ын тэргүүлэгч, төлөөлөгчдийн баг хуулрах гээд сандралдаж байгаа энэ үед хэн, юу хийснийг уншигч танд цувралаар хүргэж байна. Энэ удаад эрх мэдэл, албан тушаалын байдлаа урвуулан ашиглаж, өөрийн болон ах, дүү, хамаарал бүхий этгээдийнхээ компаниар дамжуулж тендер тонодог Сүхбаатар дүүргийн ИТХ-ын төлөөлөгч А.Ганхуяг тэргүүтний баримтыг хүргэх болно.

СҮХБААТАР ДҮҮРГИЙНХНИЙ “БОЙЖУУЛСАН” ТЕНДЕРЧИН Х.БОЛОРМАА

          УИХ-ын гишүүн Х.Болормаа хоёр сарын өмнө Сүхбаатар дүүргийн Засаг дарга, ИТХ-ын төлөөлөгч байлаа. Тэр Сүхбаатар дүүргийг найман жил удирдсан. Хоёр ч удаа гурил, будаа тарааж, УИХ-д хүч үзсэн. Иргэдийн амьдрал хэцүү, өдрөөс өдөрт дордож, элгээрээ хэвтэж байгааг мэдэхийн дээдээр мэдэж байгаа хүн бол Х.Болормаа гишүүн. Гэвч тэр төрийн албанд ажиллаж эхэлсэн цагаасаа л өөрийнхөө халаасыг түнтийлгэж, тендер цохиж байлаа.

Х.Болормаа гишүүн угтаа анх “Улаанбаатар” рестораны зохион байгуулагч байсан. Дараа нь “Гүег” ХХК-ийг байгуулж, бизнест орсон. Улмаар 2012-2016 онд Сүхбаатар дүүргийн Засаг дарга Д.Бадарсангийн орлогчоор дөрвөн жил ажилласан. Ингээд 2016 оноос хойш тус дүүргийн Засаг даргаар найм дахь жилдээ ажиллаад УИХ-ын гишүүн болсон. Х.Болормаа гишүүн хөрөнгөөрөө аймаг, дүүргийн Засаг дарга нарыг тэргүүлдэг байсан бол одоо гишүүдтэй ч өрсөлдөх нь тодорхой. Хамгийн сүүлийн буюу 2023 оны ХОМ-тээ 2.3 тэрбум төгрөгийн дөрвөн орон сууц, 582 сая төгрөгийн үнэт эдлэл, 746 сая төгрөгийн хадгаламж, өөрийн орлого нь 390 сая, гэр бүлийн жилийн орлого нь 359 сая төгрөг мэдүүлсэн байдаг. Мөн найман компанийн хувь, хувьцаа эзэмшигч, хамаарал бүхий “эзэн” аж.  2012 оноос хойш Сүхбаатар дүүргийн Засаг даргын орлогчоор дөрвөн жил, Засаг даргаар найман жил, нийт 12 жил тухлахдаа хөлжиж, хөрөнгөжсөн түүх нь өнөөх л тендертэй холбогдоно. Тодруулбал, Х.Болормаагийн “Эй Би Жи Энерго” ХХК нь эрчим хүчний салбарын төрийн тендерүүдэд оролцож шалгардаг бөгөөд томоос нь дурдвал, Дархан-Уул аймагт дэд станц өргөтгөх 4.0 тэрбумын тендер, Нийслэлийн гэр хорооллын цахилгаан шугам сүлжээг шинэчлэх 24.6 тэрбум төгрөгийн тендерийн 1.2 тэрбум төгрөгийн багц, Баянхошууны дэд станцыг өргөтгөх 1.7 тэрбум төгрөгийн тендерт зэрэгт шалгарч байсан түүхтэй.

СҮХБААТАР ДҮҮРГИЙН ИТХ-ЫН ТӨЛӨӨЛӨГЧ А.ГАНХУЯГИЙН ГЭРЭЛТҮҮЛГИЙН КОМПАНИ ГЭР ХОРООЛЛЫГ ГЭРЭЛТҮҮЛЭГТЭЙ БОЛГОХ ТЕНДЕР “ТҮҮЖ” БАЙНА

         Дүүргийн Засаг дарга нь тендер тоносоор УИХ-ын гишүүн болсон юм чинь хяналт тавих ёстой ИТХ-ын төлөөлөгчид нь тендерчин болох нь “хууль” юм биш үү дээ. Х.Болормаагийн шийрийг хатааж байгаа дараагийн тендерчин бол Сүхбаатар дүүргийн ИТХ-ын төлөөлөгч А.Ганхуяг ажээ. Сүхбаатар дүүрэгт АН ялсан, угтаа. АН, МАН-аас бүрдсэн тус дүүргийн ИТХ-ынхан тун удахгүй ард түмэнд дүнгээ тавиулна. Орон нутгийн сонгууль болоход ердөө 40 хоног үлдээд байгаа хэрэг л дээ.

Арилдийрагчаагийн Ганхуяг нь 2004-2024 оны хугацаанд буюу 20 жил Сүхбаатар дүүргийн ИТХ-ын төлөөлөгчөөр сонгогдон ажиллаж байгаа. 2012-2016 онд МАН-ын жагсаалтаар дүүргийн ИТХ-ын төлөөлөгч болсон. 2016-2024 онд тус дүүргийн зургадугаар хорооноос сонгогдон иргэдийг төлөөлж суугаа. Түүнийг судалж үзвэл, төлөөлөгчөөр ажиллаж байхдаа буюу 2011 онд Сүхбаатар дүүргийн Засаг даргын орлогчоор нэг жил ажиллажээ. Төлөөлөгч болж, улс төрд хүч үзэхээсээ өмнө сурвалжлагч, нарийн бичиг, соёлын төвийн эрхлэгч, “Ганбагана пүүс”, “ОМЭГА”, “Филипс гэрэлтүүлэг” ХХК-ийн захирлаар ажиллаж байсан намтартай.

20 жил дүүрэгт “суусан” А.Ганхуяг төлөөлөгч хөрөнгө, орлогын мэдүүлэгтээ “Жилийн нийт орлого нь 213 сая, гэр бүлийн орлого нь 28 сая, 1.3 тэрбумаар үнэлэгдэх нийтийн хоёр орон сууц, амины орон сууц, авто гарааш, зуслангийн байшин, хашаа байшин зэрэг зургаан үл хөдлөх хөрөнгөтэй. 135 сая төгрөгөөр үнэлэгдэх хоёр автомашинтай гэж мэдүүлжээ. Мөн 80 сая төгрөгөөр үнэлэгдэх 21 үхэр, 171 хонь, 100 ямаа, 14 адуутай. Эзэмших эрхийн таван газартай, дотоодын хадгаламждаа 559 сая төгрөгтэй, бусдаас 137 сая төгрөгийн авлагатай аж. “Омега” ХХК, “Филипс гэрэлтүүлэг” ХХК, "Номун далай" сургуулийн үүсгэн байгуулагч, хувьцаа эзэмшигчээр бүртгүүлжээ.

А.Ганхуяг өөрийн хамаарал бүхий компаниараа дамжуулж, гэр хорооллыг гэрэлтүүлэгтэй болгох тендерийг “түүсэн” баримтыг энд хүргэе. Тодруулбал, А.Ганхуяг 100 хувь эзэмшдэг “Филипс гэрэлтүүлэг” ХХК-иа 2006 онд байгуулж байжээ. Гадаад худалдаа, гэрэлтүүлэг, засвар үйлчилгээ, хулдаасан хэвлэлийн чиглэлээр үйл ажиллагаа явуулахаар 2006 оны нэгдүгээр сарын 6-нд улсын бүртгэлд бүртгүүлжээ.

            Шуудхан хэлэхэд, А.Ганхуяг гэрэлтүүлгийн бизнесээ хамгаалж, 20 жил Сүхбаатар дүүргийн ИТХ-ын төлөөлөгч сэтэртэй суугаа. Тэгвэл түүний 100 хувийн эзэмшлийн “Филипс гэрэлтүүлэг” ХХК гэр хорооллыг гэрэлтүүлэгтэй болгох дараах тендерт ногоон гэрлээр шалгарчээ.

Тодруулбал,

1. Налайх дүүргийн 4-р хорооны Алтай, Туулын гудамжийг гэрэлтүүлэгтэй болгох ажил- 28 сая төгрөг
2. “18 дугаар хороо Бэлхийн гудамжнуудын гэрэлтүүлэг" ажил- 115 сая төгрөг
3. Сүхбаатар дүүргийн 9, 11-р хороонд гэрэлтүүлэг хийх- 185 сая төгрөг
4. Сүхбаатар дүүргийн 16-р хороо, Бэлхийн 33-5-р гудамжны баруун хэсэгт гэрэлтүүлэг- 61 сая төгрөг
5. Чингэлтэй дүүрэг 19 дүгээр хороо Тахилтын 1,2,3,4 Дээд салхит гудамжинд гэрэлтүүлэг тавих ажил- 118 сая төгрөг
6. Чингэлтэй дүүргийн 15 дугаар хорооны гудамжны гэрэлтүүлэг- 133 сая төгрөг
7. Чингэлтэй дүүрэг 4 дүгээр хороо Барилгачдын талбайн орчны гэрэлтүүлэг- 59,8 сая төгрөг
8. Гэрэлтүүлэг камержуулалт /СБД 11 12 13 дугаар хороо/-388 сая төгрөг /илгээгдсэн/
9. Хөвсгөл аймгийн Мөрөн сумын 8-р багт байрлах Хөл бөмбөгийн талбайн 25 метрийн өндөртэй цамхагт гэрэлтүүлгийн ажил-2- 68 сая төгрөг
10. Хөвсгөл аймгийн Мөрөн сумын 8-р багт байрлах Хөл бөмбөгийн талбайн 25 метрийн өндөртэй цамхагт гэрэлтүүлгийн ажил-1- 68 сая төгрөг
11. Гэрэлтүүлгийн засварын материал /ДЦС2/- 48.7 сая төгрөг
12. Сонгинохайрхан дүүргийн 1-р бүс нийтийн эзэмшлийн гудамж, зам талбайн гэрэлтүүлэг засвар үйлчилгээ- 122 сая төгрөг
13. Гоёлын гэрэлтүүлэг СХД//- 147 сая төгрөг
14. Гэрэлтүүлэг /СХД, 35 дугаар хороо/- 86 сая төгрөг
15. Гэрэлтүүлэг /СХД, 2 дугаар хороо/- 45 сая төгрөг
16. Барилга байгууламжийн гадна фасадыг гэрэлтүүлэх- 304 сая төгрөг
17. Гэрэлтүүлгийн засварын материал /ДЦС2/- 26 сая төгрөг
18. Сүхбаатар дүүрэгт Цэцэгт байгууламжийн гэрэлтүүлэг, чимэглэл хийх ажил (3D байгууламж)- 96 сая төгрөг
19. ХУД Цэцэгт байгууламжийн гэрэлтүүлэг, чимэглэл хийх ажил (3D байгууламж)- 98 сая төгрөг

Дүүргийн төлөөлөгчөөр сууж, гэр хорооллыг гэрэлтүүлэгтэй болгох тендерийг өөрийнхөө эзэмшлийн компаниар дамжуулж авах нь хуульд нийцэх эсэхийг хууль хяналтын байгууллага шалгах биз ээ.

Үргэлжлэл бий.