Унаач хүүхдүүд амиа алдсан харамсалтай хэрэг гарчээ. Тодруулбал, Хэнтий, Өвөрхангай аймагт хурдан морины уралдаан зохион байгуулж, зургаа, найман настай хоёр хүү амиа алджээ. Үндэсний их баяр наадам болон аймаг, сумдын ойн баяр наадам дөхөж буйтай холбоотойгоор хурдан морины уралдаан, сунгаа болж байна. Иймд бид сэрэмжлүүлэг болгох үүднээс энэхүү мэдээллийг бэлтгэлээ.

Унаач хүүхдүүд амиа алдсан хэргийн талаар ЦЕГ-ын Хэвлэл мэдээллийн төвийн мэргэжилтнээс тодруулахад “Өвөрхангай аймагт зургадугаар сарын 19-ний өдөр зургаан настай эрэгтэй хүүхэд мориноос унаж, нас барсан. Мөн энэ сарын 23-нд Хэнтий аймагт болсон сунгааны үеэр найман настай эрэгтэй хүүхэд мориноос унаж, амиа алдсан харамсалтай хэрэг гарсан. Урьдчилсан байдлаар зургаан настай хүү эмчлэгдэж байх үедээ нас барсан. Харин найман настай хүү эмнэлгийн тусламж авч чадаагүй нас барсан. Одоогоор шалгалтын ажил үргэлжилж байна. Хэнтий, Өвөрхангай аймгийн цагдаагийн газраас мөрдөн шалгах ажиллагаа явуулж байна” гэв.

ТОД МАНЛАЙ УЯАЧ ОНОНГИЙН БАТБИЛЭГИЙН ГАЛ ХЭНТИЙ АЙМГИЙН ДАРХАН СУМАНД БАЙРЛАЖ БАЙНА

     Хэнтий аймгийн Дархан сумын нутагт Тод манлай уяач Ононгийн Батбилэгийн гал байрлаж байгаа аж. Тэрбээр хэд хоногийн өмнө Дархан сумын нутагт уяагаа төвхнүүлжээ. Үндэсний их баяр наадамд зорьж яваа бөгөөд хэд хоногийн дараа явна гэдгээ сумын удирдлагуудад хэлсэн байна. Харин зургадугаар сарын 23-нд галынхаа сунгааныг зохион байгуулж, уяач Г-ийн хариуцаж байсан найман настай унаач нас барж болзошгүй байна.

Эх сурвалжийн бидэнд өгсөн мэдээллээр “Талийгаач хүү олон жил энэ галд морь унаж байсан. Тэр өдөр Ононгийн Батбилэгийн галынхан хоорондоо уралдаан зохион байгуулсан. Ингэхдээ сум, аймгийн уяачдыг оролцуулаагүй, зөвхөн гал дотроо зохион байгуулсан байдаг. Уралдааны үеэр найман настай хүүхэд унаж, газар дээрээ амиа алджээ. Талийгаач хүү эмнэлгийн тусламж, үйлчилгээ авч чадаагүй. О.Батбилэгийн гал Дархан сумаас 40 гаруй км-ийн зайтай учраас эмнэлэг рүү явах гэж цаг алдсан байх. Мөн тэд эмнэлэг рүү дуудлага өгөөгүй, шууд хүүхдээ аваад сумын төв явсан юм байна лээ. Талийгаач хүүд хамгаалалтын хувцас хэрэгсэл өмсүүлсэн эсэх нь одоогоор тодорхойгүй байна. Зөвхөн галынхаа сунгааныг зохион байгуулсан учраас хувцас, хэрэгсэл нь бүрэн бүтэн байсныг албаныхан шалгах боломжгүй байсан. Албан ёсны уралдаан биш байсан гэсэн үг. Ийм учраас хүүд хамгаалалтын хувцас хэрэгслийг нь гүйцэт өмсүүлээгүй байж болзошгүй. Үүнийг хууль хяналтын байгууллага шалгаж тогтооно биз” гэв.

ДАРХАН СУМЫН ЗАСАГ ДАРГА: АЛБАН ЁСНЫ УРАЛДААН БОЛООГҮЙ

Тод манлай уяач О.Батбилэгийн уяа Дархан сумаар дамжин өнгөрч байгаа. Ингэхдээ тус сумын удирдлагуудад бүртгүүлж, мэдээлэл өгсөн эсэх нь тодорхойгүй байна. Бид Дархан сумаас дараах эх сурвалжуудаас мэдээлэл авлаа.

Хэнтий аймгийн Дархан сумын Засаг дарга:

            -Улаанбаатарын уяачид манай сумын нутагт байрлаж байгаа. Түр хугацаанд байрлаж байгаа юм билээ. Би тэр үед хөдөө ажилтай явж байсан учраас очиж уулзаагүй. Сонгуулийн сурталчилгаа эхэлсэн учраас сумын төвдөө бараг байсангүй. Харин манай сумын ЗДТГ-ын дарга уяачидтай очиж уулзсан байх. Тэр үедээ уяагаар нь очиж, хэн гэдэг уяачид явж байгааг бүртгэж авсан юм билээ. Харин талийгаач хүүхдийн асуудлыг Хүүхдийн хамтарсан багийн хүрээнд шалгалтын ажиллагаа явуулж, шаардлагатай бүх бичиг баримтаа Хэнтий аймаг руу явуулсан байгаа. Надад өөр мэдэх мэдээлэл алга. Албан ёсны уралдаан зохион байгуулагдаагүй. Бидэнд мэдэгдээгүй.

ДАРХАН СУМЫН ЗДТГ-ЫН ДАРГА: ТАЛИЙГААЧ ХҮҮ ОНОНГИЙН БАТБИЛЭГИЙН ГАЛЫН УЯАЧ Г-ИЙН УНААЧ БАЙСАН ЮМ БИЛЭЭ

Хэнтий аймгийн Дархан сумын ЗДТГ-ын дарга:

                        -Ононгийн Батбилэг, Ононгийн Баттуул, Дашкагийн Эрдэнэбат нарыг дагасан дагуул уяачид манай суманд байрлаж байгаа. Би тухайн үед нь очиж уулзаж, мэдээлэл авсан. Гэхдээ албан ёсоор бүртгэл, мэдээлэл аваагүй. Хөл, толгой нь олдохгүй олон уяач байдаг. Талийгаач хүү Г гэдэг уяачийн унаач байсан юм билээ. Ононгийн Батбилэгийн галын уяач л гэсэн үг. Тэд хоорондоо ийм уралдаан зохион байгуулж, хүүхэд эрсэдсэн.

ДАРХАН СУМЫН ЭМНЭЛГИЙН ДАРГА: УНААЧ ХҮҮ НАС БАРСАН БАЙДАЛТАЙ ИРСЭН

Хэнтий аймгийн Дархан сумын Эрүүл мэндийн төвийн дарга:

-Тэр өдөр амралтын өдөр байсан учраас би ажилдаа очоогүй. Манай эмчилгээ эрхэлсэн дарга жижүүртэй байсан. Зургадугаар сарын 23-ны 10:00 цагийн үед мориноос унасан хүү эмнэлэгт ирсэн юм байна лээ. Гэхдээ нас барсан байдалтай, ямар ч эмнэлгийн тусламж үзүүлэх боломжгүй байсан гэсэн. Тэгээд бид цагдаагийн байгууллагад мэдэгдэж, аймгаас шүүх шинжилгээний баг дуудсан. Шүүх шинжилгээнийхэн талийгаач хүүгийн цогцост задлан шинжилгээ хийгээд явсан. Шинжилгээний хариу 14-21 хоногт гарна. Бид талийгаач хүүгийн ар гэрийнхэнд нас барсан бичгийг нь гаргаж өгсөн. Ингээд эцэст нь, талийгаачийн цогцсыг ар гэрийнхэн нь аваад явсан” гэлээ.

Бид энэ талаар Тод манлай уяач Ононгийн Батбилэг болон түүний галынхнаас мэдээлэл авахаар залгасан боловч утас нь холбоогдоогүй юм.