Үндэсний их баяр наадмаар Улсын арслан М.Бадарчид өвдөг шороодсон бөхчүүдэд цол нөхөн олгох зарлиг Ерөнхийлөгч У.Хүрэлсүх гаргаж, өнөөдөр Үндэсний баяр наадмын комиссоос бөхчүүдэд цол чимгийг нь олголоо. Тодруулбал, Үндэсний баяр наадмын барилдаанд барилдсан Ховд аймгийн Мөнххайрхан сумын харъяат Б.Баянмөнхөд улсын начин цол, Дундговь аймгийн Эрдэнэдалай сумын харъяат Э.Дашид улсын харцага цол, Архангай аймгийн Хашаат сумын харъяат С.Сүхбатад улсын заан, Өвөрхангай аймгийн Төгрөг сумын харъяат Ц.Бямба-Отгонд улсын арслан цол нөхөж олголоо. Мөн Үндэсний баяр наадамд шөвгийн дөрөвт шалгарсан улсын аврага О.Хангайд Үлэмж бадрах чимэг олгох зарлиг гаргажээ.
 

Энэ үеэр Шадар сайд С.Амарсайхан "Зуны дунд сарын билэгт сайн өдрийн мэнд хүргэе. Үндэсний баяр наадам бол тусгаар тогтнол, бүрэн бүтэн байдал, төрт ёсны  үйл хэргийн салшгүй хэсэг оршихуйн баталгаа билээ. Та бидний нэгэн том бахархал нь нүүдэлчдийн соёл, баяр наадам юм. Өнгөрсөн жилийн баяр наадмын түрүү бөх сэргээш хэрэглэсэн нь мэргэжлийн байгууллагаар тогтоогдсон тул Үндэсний баяр наадмын тухайн хуулиар Үндэсний баяр наадам зохион байгуулах комиссын санал дүгнэлтийг үндэслэн тавын даваанаас хойш түүний давсан бөхчүүдэд шинээр цол олгох зарлиг гаргалаа. Иймд Үндэсний баяр наадмыг зохион байгуулах комиссыг ахалж ажилласан миний бие Ерөнхийлөгчийн зарлигаар бөхчүүдэд цол чимгийг нь нөхөн олгож байна" гэлээ.