Төрийн албанаас “хөөгдөөд” төрийн өмчит үйлдвэрт даргаар томилогддог инээдтэй ч юм шиг, эмгэнэлтэй ч юм шиг үзэгдлийг зөвхөн Монголоос л харж болох байх. Өдийгөөс жилийн өмнө Булган аймгийн Орхон сумын хэсгийн төлөөлөгч О.Цэлмэг Булган аймгийн цагдаагийн газар алба хаагчдынхаа цалинг үндэслэлгүй хассан, суутгасан мөн өөрийнх нь утасны орох, гарах ярианы түүхийг албан тоот боловсруулж авсан зэрэг асуудлыг илчилж, шүгэл үлээж байлаа.

         Тодруулбал, Булган аймгийн цагдаагийн газарт хэсгийн төлөөлөгчөөр ажиллаж байсан, ахмад О.Цэлмэг Фэйсбүүк дэх хаягтаа байгууллага, удирдлагуудынхаа талаар "2023 оны эхний улиралд Булганы цагдаа улсын хэмжээнд "Хүүхэд хамгаалал" арга хэмжээний хүрээнд 21 аймгаас 21-т орсон байна гээд 20 гаран алба хаагчдын цалинг 20 хувь хассан. Хүүхэд хамгаалал арга хэмжээ 2023 оны нэгдүгээр сараас эхлээд 2023 оны хоёрдугаар сарын 25-ны өдөр тайлан өгөх ёстой байсан боловч Монголын уламжлалт цагаан сарын баяр гээд амралтын өдөр таарсан. Энэ бол цэвэр удирдлагын зохион байгуулалт муу байна гэж л харсан. Хажуугаар нь алба хаагчдын цалингаас хууль бусаар мөнгө татдаг асуудлаа яах вэ. Тавдугаар сарын 9-нд байгууллагын үүд хаалга янзлах нэрийдлээр бүх албан хаагчдаас нэг өдрийн цалин гээд хураагаад л авсан. Дээрх асуудлаар ЦЕГ-ын Дотоод хяналт-аюулгүй байдлын газраас шалгалт хийгээд хоёр даргыг нь өөрчилсөн" гэж бичсэн нь шуугиан тарьсан юм.

О.Цэлмэгийн гомдлоор шалгалтын ажиллагаа явуулж, Булган аймгийн Цагдаагийн газрын дарга Л.Ганбатыг ажлаас нь чөлөөлж, төрийн албанаас “хөөсөн” байдаг.

Энэ талаар ЦЕГ-ын Дотоод хяналт, аюулгүй байдлын газрын дарга, хурандаа Д.Манлайбаатар "Булган аймгийн цагдаагийн газрын Орхон сум хариуцсан хэсгийн төлөөлөгч, Цагдаагийн ахмад О.Цэлмэг нь энэ оны долдугаар сард цагдаа, дотоодын цэргийн алба хаагчдын ашиг сонирхлын гэмт хэргийн зөрчил үйлдсэн эсэх, мөн алба хаагчдын эрх зөрчигдөж байгаа эсэх талаарх мэдээллийн утсанд гомдол гаргасан. Тухайн гомдол, мэдээллийн дагуу ажлын хэсэг томилж, тус аймгийн цагдаагийн газарт биечлэн ажилласан. Шалгалтын явцад гомдол мэдүүлэгчийн мэдүүлсэн тодорхой асуудлууд үндэслэлтэй болж таарсан. Тухайлбал, алба хаагчдаас цалингийн суутгал авсан нь тогтоогдсон. Үүнтэй холбоотойгоор Булган аймгийн цагдаагийн газрын даргыг үүрэгт ажлаас нь чөлөөлсөн. Мөн тухайн газрын удирдах болон бусад үүрэг гүйцэтгэгч албан тушаалтнуудад хариуцлага тооцсон” гэж мэдэгдэж байсан юм.

            Тэгвэл Булганы цагдаагийн газрын даргаас “хөөгдсөн” Л.Ганбаатар жилийн дараа “Эрдэнэт үйлдвэр” ТӨҮГ-т орлогч даргаар томилогдсон байж болзошгүй мэдээллийг эх сурвалж мэдээллээ. Тодруулбал, Л.Ганбаатар нь “Эрдэнэт үйлдвэр”-ийн Гамшгаас хамгаалах шуурхай штабын орлогч даргаар томилогдсон гэнэ.

         Эх сурвалжийн мэдээлж буйгаар “Цагдаад ажиллаж байсан, сайдын дүү, үйлдвэрийн удирдлагуудын хүн” гэх тодотголтой эрэгтэй Гамшгаас хамгаалах штабын орлогчоор нь томилогдож байгаа гэнэ лээ. Үйлдвэрт ажилд орохын тулд эмчийн үзлэгт заавал хамрагдсан  байх шаардлагатай. Л.Ганбаатарыг эмчийн үзлэгт ордог өдөр үйлдвэрийн эмнэлгийн эмч багагүй хугацаанд хүлээлгэсэн гэсэн. Үүнээс болоод асуудал үүссэн юм шиг байна лээ. Энэ мэдээллээс хойш Л.Ганбаатар хүмүүс андахгүй болсон. Ах нь Боловсрол, шинжлэх, ухааны сайд Л.Энх-Амгалан шүү дээ. Тэгээд дүүгээ томилуулсан байж болзошгүй. Мөн Л.Ганбаатарыг Булган аймгийн цагдаагийн газрын даргаар ажиллаж байхдаа зам тээврийн ноцтой ослыг нуун дарагдуулсан, үүнийхээ хариуд үйлдвэрт албан тушаалд томилогдож байж ч болзошгүй гэх мэдээлэл цацагдаж байна лээ. Үүнийг нь хууль хяналтын байгууллагынхан тогтоох биз. Ямартай ч төрийн албанаас хөөгдөөд, төрийн өмчит үйлдвэрт ажилд орж байгаа нь том артай гэдгийг нотолж байгаа хэрэг. Түүнээс биш, албан тушаалаасаа хөөгдсөн хүмүүсийг үйлдвэр ажилд авахгүй шүү дээ” гэсэн юм.

       Л.Ганбаатарын төрсөн ах нь Л.Энх-Амгалан сайд. Тэдний ах, дүүгийн харилцаа Болосвролын зээлийн сангийн асуудлаар ил болсон. Л.Энх-Амгалан сайдаас сэтгүүлчид ингэж асуухад тэрбээр дүүтэй гэдгээ “мэдсэн” гэх.

-Таны төрсөн дүү бас БЗС-аас зээл авч суралцсан юм байна лээ?

        -Миний төрсөн дүү юм байна лээ. 2004 онд ОХУ-ын цагдаагийн академид явсан юм байна лээ. Тэгээд би одоо яах вэ. 2004 онд би бизнес эрхлэгч хүн байсан. Манай дүү 12 мянган долларын зээлээр суралцсан. Булган аймгийн цагдаагийн дарга хийдэг. Хамгийн гол нь хууль зөрчсөн үү, үгүй юү гэдэг нь чухал” гэж хариулсан нь анхаарал татаж, шүүжмлэлд өртөж байсан юм.

Ямартай ч албан хаагчдынхаа цалинг хууль бусаар хурааж, эрх мэдэл, албан тушаалын байдлаа урвуулан ашигласан Л.Ганбаатар хурандаа төрийн өмчит үйлдвэрт томилогдож байгаа аж. Аймгийн цагдаагийн газрыг “самарч”, цагдаагийн албан хаагчдын нэр хүндийг шавартай хутгасан сайдын дүү төрийн өмчит үйлдвэрт даргаар нь томилогдох нь юу л бол. Дахиад мөнгө төгрөг халааслаад, үйлдвэрийг тоноод эхлэх юм биш биз...

Бид дээр дурдагдсан зам тээврийн ослын талаар дэлгэрэнгүй мэдээлэх болно.

Үргэлжлэл бий.