Баянгол дүүргийн нутаг дэвсгэрт энэ сарын 4-ний өдөр 21 настай эмэгтэй найз залуудаа дайруулж, эмнэлэгт хүргэгдэж чадахгүй удсан байна. Тэрээр осол болсны маргааш буюу тавдугаар сарын 5-ны өглөө ГССҮТ-д хүргэгдэж эмчлүүлж байгаад энэ сарын 25-нд нас барсан харамсалтай хэрэг гарчээ. Тухайн үед юу болсон талаар талийгаачийн ар гэрийнхэнтэй холбогдож тодрууллаа.

-Танай гэр бүлийнхэнд эмгэнэл илэрхийлье. Дүүгийнхээ шарилыг нутаг руугаа авч явах унааны зардал байхгүй тул ард түмнээс хандив хүссэн байсан. Та хэд нутаг руугаа явж чадсан уу?

-Ард түмнийхээ буянаар бид өчигдөр өглөө нутагтаа ирсэн. Одоогийн байдлаар зургаан сая төгрөг цуглараад байгаа. Ямартай ч буяны ажлаа хийчих хэмжээний мөнгө цугларсан. Гэхдээ хандивын аяныг зогсоохыг албан ёсоор мэдэгдээгүй байгаа. Үлдсэн мөнгийг нь өмгөөлөгч авах, хууль хяналтын байгууллагаар явахдаа зарцуулна гэж бодож байгаа. Буяны ажлаа дуусгачихаад гурав хоноод Улаанбаатар орж, хэргийг үнэн зөв шийдүүлж өгөх талаар хөөцөлдөнө.

-Та дүүгийнхээ найз залууг таньдаг байсан уу. Тухайн үед юу болсон талаар та мэдсэн үү?

-Би түүнийг харж байсан. Тэд үерхээд сар гаран болж байсан байх. Саяхан утсаар ярьсан. Цагдаа нар прокуророос түүнийг баривчлах зөвшөөрөл ирээгүй тул баривчлах боломжгүй гэсэн тайлбар өгсөн. Тухайн үед найз залуу нь согтуу байсан гэсэн. Согтуу байсан болохоор эмнэлэгт хүргэж өгөөгүй, гэрээсээ гаргаагүй юм шиг байна лээ.

-Дүүг нь ямар байдалтай эмнэлэгт хүргэгдсэн гэж эмч нар хэлсэн бэ?

-Дүү минь найман удаа хагалгаанд орсон. Тийм болохоор бие нь даагаагүй байх. Элэг нь бяцарсан байсан тул талыг нь тайрсан, ходоодыг нь тайрсан, нойр булчирхайг нь авсан, нарийн, бүдүүн гэдсийг нь холбож оёсон гээд гэдэс, дотрыг нь сэгэлчихсэн байсан. Тий болохоор шархаа даагаагүй байх. Бид дүүгээ эмнэлэгт хүргэгдсэний маргааш нь мэдэж, Дорнодоос гарсан. Тэгээд Улаанбаатарт тавдугаар сарын найманд ирсэн. Тэр үед дүү минь хагалгаанд ороод ухаан орчихсон байсан. Уг нь дүүгээ аав, ээждээ хэдхэн хоног харагдаасай гэж хүсэж байсан юм.

-Эмнэлэгт хүргэгдээгүй хугацаа алдсан шалтгаан нь түүнийг дайрсан найз залуутай нь холбоотой юу?

-Дүү надад хэлэхдээ түүнийг албаар дайрсан гэж хэлсэн. Бас явж чадахгүй байхад нь “Битгий баашлаад бай” гээд нэмж зодоод эмнэлэгт хүргээгүй гэртээ хорьсон юм билээ. Уг нь даруйхан эмнэлэгт хүргэсэн бол хэд хоног аав, ээждээ харагдах байсан байх. Би дүүтэйгээ хоёр сар хамт амьдарч байгаад өнгөрсөн хоёрдугаар сард Дорнод руу нүүгээд ирчихсэн юм.

-Талиийгаачийн аав, ээж нь эрүүл мэндийн шалтгааны улмаар ажил хийх чадваргүй хүмүүс байдаг гэж сонссон. Тэр тухай та ярьж болох уу?

-Ах минь хорт хавдартай, хар тамхины хольцтой эм, тариагаар амьдардаг. Эгч минь зам, тээврийн осолд ороод ажил, хөдөлмөр хийх чадваргүй болсон. Талийгаач охин нь тэдний эм, тариа, эмчилгээний төлбөрийг олдог байсан юм. Ах, эгч минь Дорнодод хүний хашаа, гэрт амьдардаг. Одоо тэдний эм, тариаг авч өгөх хүнгүй хэцүүдэх байх.