-ХҮЧИЛТӨРӨГЧ, ХӨТӨЧГҮЙ ЭВЕРЕСТИЙН ОРГИЛД ГАРАХААР МОРДСОН МОНГОЛ УУЛЧИД СУРАГГҮЙ БОЛЛОО-

        Дэлхийн дээвэр Эверестийн оргилыг зорьсон хоёр уулчин сураггүй алга болоод 72 цаг болж байна. Тодруулбал, хүчилтөрөгчийн баггүй, шерпа буюу хөтөчгүйгээр Эверестийн оргилд гарахаар Монголын гурван уулчин алхалтаа эхлүүлээд байсан. Харамсалтай нь, уулчин Д.Отгонхүүгийн бие муудаж, алхалтаа зогсоосон бол Ц.Өсөхжаргал, Л.Пүрэвсүрэн нар  сураггүй алга болоод байна. Д.Отгонхүү, Ц.Өсөхжаргал, Л.Пүрэвсүрэн дөрөвдүгээр сарын 5-нд эх орноосоо мордсон. Тэд уулын алхалт, дэлхийн дээвэрт гарч, Монгол Улсын далбаагаа мандуулаад эх орондоо зургадугаар сарын 5-нд ирэхээр төлөвлөөд байжээ.Тэд нэмэлт хүчилтөрөгч хэрэглэхгүй, хөтөч болон шерпагийн тусламжгүйгээр авирна гэдгээ мэдэгдэж байсан юм.

ЭВЕРЕСТЭД ЭРЭН ХАЙХ АЖИЛЛАГААГ ЭХЛҮҮЛЭЭД БАЙНА

        Уулчдын талаар хөтөч үйлчилгээний “8K Expeditions” компанийн шерпа "Ц.Өсөхжаргал, Л.Пүрэвсүрэн нар тавдугаар сарын 12-нд оргилд гарахаар явж байгаад сураггүй алга болсон. Эрэн хайх ажилд шерпа буюу туслах уулчныг дайчлан ажиллаж байна. Тэд зөвхөн үндсэн баазын үйлчилгээ авсан. Өөрсдөө бие даан авиралтыг эхлүүлсэн. Өөрөөр хэлбэл, авиралтын хугацаанд шерпа буюу туслах хөтөч авахаас татгалзсан” гэж мэдэгджээ.

Харин Монголын Уулчдын холбооноос дараах тайлбарыг өгөөд байна. Тодруулбал, “Дэлхийн дээвэр Эверест (8848 м д.т.д) оргил руу авиралт хийхээр гурван уулчид маань явсан билээ. Авиралтаа эхлүүлсэн гурван уулчны нэг Д.Отгонхүүгийн бие муудаж үндсэн кэмпт ирсэн бол авиралтаа үргэлжлүүлсэн Л.Пүрэвсүрэн, Ц.Өсөхжаргал нар дөрөвдүгээр кемпээс дээш яваад хоёр хоногийн турш холбоогүй, сураггүй байгаа тул эрэн хайх ажиллагааг өнөөдөр (өчигдөр) нэн яаралтай эхлүүлж байна. Непалийн уулын холбооноос ирүүлэх мэдээг цаг алдалгүй хүргэх болно” гэжээ. Бид энэ талаар Уулчдын холбооны тэргүүн Б.Гангаамаатай холбогдож дэлгэрэнгүй мэдээлэл авахыг хүссэн ч тэрбээр утсаа аваагүй билээ.

Зарим хэвлэл мэдээллийн хэрэгслийн мэдээлж буйгаар “Монгол уулчдыг алга болсноос хойш өөр улсын уулчид харсан, тэд оргил руу алхаж байсан” гэх мэдээлэл байгаа ажээ. Мөн уулчдын алга болсон дөрөвдүгээр бааз нь нисдэг тэрэг очих боломжгүй учир агаарын хайлт хийх боломжгүй. Өөрөөр хэлбэл, явганаар эрэн хайх ажиллагааг эхлүүлээд байна.

ЭВЕРЕСТИЙН ОРГИЛЫГ ЗОРЬСОН ГУРВАН УУЛЧИН “ХҮННҮ ХАЙКИНГ” КЛУБЫН ТАМИРЧИД БАЙЖЭЭ

  Уулчид Эверестийн оргилд гарах тухайгаа өнгөрсөн нэгдүгээр сард зарлаж, замын зардлаа олохоор байгалийн үзэсгэлэнт газруудыг зургаар бүтээсэн цаг тооны бичгийг зарж, түүнчлэн уулын спортыг дэмждэг олон түмнээс хандив тусламж хүсэж байжээ. Мөн өнгөрсөн жилээс бэлтгэл, сургуулилалтаа базааж эхэлсэн байна.

Уулчин Д.Отгонхүү, Ц.Өсөхжаргал, Л.Пүрэвсүрэн нар нь уулын спортын “Хүннү хайкинг” клубынх байжээ. Эверестийн оргилын алхалтыг уулын спортын мастер Д.Отгонхүү ахалж явсан байна. Харин сураггүй алга болсон уулчин Ц.Өсөхжаргал нь “Хүннү хайкинг” клубын тэргүүнээр ажилладаг байжээ.

Бид энэ талаар “Хүннү хайкинг” клубынхантай холбогдож тодруулахад “Одоогийн байдлаар бидэнд ямар ч мэдээлэл ирээгүй байна. Уг гурван тамирчин нь манай клубынх. Клубын тэргүүн маань уг алхалтад оролцож байгаа. Эсэн мэнд буугаад ирээсэй гэж Монголын мянга мянган уулчин залбирч байна” хэмээгээд дэлгэрэнгүй мэдээлэл өгөхөөс татгалзлаа. Сураггүй алга болсон уулчин Л.Пүрэвсүрэн нь 31 настай, Ц.Өсөхжаргал нь 53 настай ажээ. Тэдний хувьд уулын спортоор олон жил хичээллэж байгаа бөгөөд манай улсын туршлагатай уулчид юм.

УУЛЧИН Д.ОТГОНХҮҮГИЙН ЭЭЖ ЭНХТУЯА: ХҮҮТЭЙ МИНЬ ХАМТ ЯВСАН ХОЁР УУЛЧИНГ ЭСЭН МЭНД ОЛДООСОЙ ГЭЖ ЗАЛБИРЧ СУУНА

Бид уг мэдээллийн дагуу алга болсон уулчдын ар гэрийнхэнтэй холбогдсон боловч тэд мэдээлэл өгөхөөс татгалзлаа. Харин уг багийн ахалж явсан уулчин Д.Отгонхүүгийн ээж Энхтуяатай холбогдож, дараах тайлбарыг авсан юм.

-Та хүүтэйгээ холбоо барьж чадсан уу?

         -Хүү минь уулын спортоор арав гаруй жил хичээллэж байгаа. Өөрөө сонирхолтой, дуртай учраас бид хорьж, цагдаж байгаагүй. Уулчин хүн бүрийн л мөрөөддөг оргил нь дэлхийн дээвэр гэгддэг Эверест байх. Энэ ч утгаараа миний хүү багийнхантайгаа хамт бэлтгэл хийж, Эверестийг зорьсон. Монголоос яваад нэг л удаа холбоо барьсан. Дөрөвдүгээр сарын эхээр хүү минь залгаад “Сайн явж байна. Авиралт хийх газраа ирсэн, санаа зоволтгүй. Одоогоор авиралтаа эхлүүлээгүй, бэлтгэлээ хийж байгаа” л гэж хэлсэн. Ганц, хоёрхон минут яриад утас нь тасарчихсан. Түүнээс хойш холбоо барьж чадаагүй. Хүү минь эхнэртэйгээ холбоо барьж, бидэнд хэл дуулгаж байсан. Гэхдээ сүүлийн хэд хоног ямар ч чимээ алга байна. Санаа зовж, уулчдын төлөө залбираад л сууж байна.

-Хамт явсан хоёр уулчин нь алга болж, эрэн хайх ажиллагааг эхлүүлээд байна. Хүүгийн тань бие муудаж, алхалтаа зогсоосон гэдэг мэдээлэл бий. Та энэ талаар мэдэж байсан уу?

         -Хоёр хоногийн өмнө бэр охин маань хэлсэн. Тэд алхалтаа эхлүүлсэн ч хүүгийн нүд нь өвдөж, цааш алхах бломжгүй болсон юм билээ. Тэгээд отог дээрээ ирээд, бэр охинд хэл дуулгасан байна лээ. Хүү минь хамт явсан хоёр уулчиндаа санаа зовоод, олигтой ярьж чадахгүй байна гэж хэлсэн. Бэр охин хэлэхдээ “Нэмэлт хүчилтөрөгчгүй явсан хоёр уулчиндаа санаа зовж байна. Нүд нь өвдөөд, тогтворгүй байна” гэсэн. Нөгөө хоёрыгоо л яриад, сэтгэл санаа нь маш тогтворгүй байсан гэсэн. Тэгээд тэрнээс хойш охин руу яриагүй, холбоогүй байгаа гэсэн. Хүүдээ санаа зовохоос гадна хамт явсан хоёр уулчныг нь эсэн мэнд буугаад ирээсэй л гэж залбирч байна. Бидэнд ямар ч мэдээлэл алга. Сумын төвд байгаа бид телевиз, радио чагнахаас өөр сонголт алга.