Энэ удаа онцлон бичиж байгаа дуулиант, онц ноцтой хэргүүд нь сонгуулийн сургаар л "амь орж", олны анхаарлын төвд өртдөг. Үнэндээ, үүнийг улстөрчид өөрийнхөө карьерийг өсгөх пиараа болгож, хэдэн санал ахиухан зулгаахын төлөө зохион байгуулалттайгаар хийдэг юм. Тийм технологи ашигладаг болоод удаж байна. Тэд сонгуулийн өмнөх хэдэн өдрүүдэд л ард түмэнд хандаж “Энэ хэргийг эцэслэн шийдвэрлүүлнэ. Хууль хяналтын байгууллагынхныг шударгаар ажиллуулна”  гээд л  олны өмнө хоолой зангируулж, уйлж дуулан ярина. Харин сонгуулийн маргаашнаас тус хэргүүдийг ор тас мартчихдаг нь гэм биш, зан болчихоод байгаа юм. Олон сонгуулийн нүүр тахалж, эрх баригчдын аминд ордог хэргүүдийн эрэн үе үргэлжилсээр байна.

60 тэрбумын хэрэг

Ердөө тавхан сарын дараа Ерөнхийлөгчийн сонгууль болох нь. 60 тэрбумын хэргийн захиалагч, гүйцэтгэгчийг илрүүлсэн, илэрсэн “сонгодог” жүжиг Монгол Улсын төв тайзнаа тоглогдох гээд бэлтгэлээ базааж буй. 2016 оны УИХ-ын сонгуулийн үеэр УИХ-ын дарга асан М.Энхболд, Нийслэлийн МАН-ын хорооны дарга асан Ц.Сандуй болон Н.Ганбаатар нарын 60 тэрбум төгрөгийн талаарх ярианы бичлэг цацагдаж, сөрөг хүчний хувьд “шижир алт” болж байлаа. Тэр өдрөөс хойш УИХ, орон нутгийн нийлсэн дөрвөн ч сонгуулийн шоу болсон эл хэрэг өнөөдөр ч бүрэн шийдэгдээгүй, Ерөнхийлөгчийн сонгуультай учран золгох нь. Сонгууль болохоор л 60 тэрбумын хэргийг сэргээн шалгаж, эзэн холбогдогчийг нь хайж эхлэх юм. Уг нь эл хэрэгт Ц.Сандуй, А.Ганбаатар нарыг буруутгаж,  Баянгол дүүргийн Эрүүгийн хэргийн анхан шатны шүүхээс дөрвөн жилийн хорих ял оноосон ч албажуулсан хүмүүст нь ямар нэг хариуцлага тооцоогүй өдийг хүрсэн. Гэтэл одоо эл хэрэг сонгуульд нэр дэвшигчдийн гол бамбар болчихсон “тууж” явна. МАН-ыг харлуулах сөрөг хүчний сонгуулийн шоу болсон 60 тэрбумын хэрэг олны анхааралд дахин орж ирлээ. Тодруулбал, 60 тэрбумын хэргийг албажуулсан эзнийг хайхаар хэргийг хоёр дахь удаагаа сэргээж, Тагнуулын ерөнхий газраас шалгаж байна.

С.Зоригийн хэрэг

1998 оны аравдугаар сарын 2. Энэ бол төр, нийгмийн нэрт зүтгэлтэн С.Зоригийн бусдын гарт амиа алдсан өдөр. Ерөнхийлөгчийн сонгууль хаяанд ирсэн энэ өдрүүдэд  С.Зориг агсныг онц хэрцгийгээр хөнөөсөн хэрэг эргэн сөхөгдөх нь гарцаагүй. Монголын цагдаа С.Зоригийг хөнөөсөн хэрэгтнийг илрүүлэх гэж 23 жил ажиллаж байна. Энэ хугацаанд хэд хэдэн хүнийг баривчилж, саатуулан, эцэст нь Б.Содномдаржаа, Ц.Амгаланбаатар, Т.Чимгээ нарын гурван хүнд шүүхээс 24-25 жилийн хорих ял оноосон байдаг. Гэвч УИХ, Ерөнхийлөгчийн сонгууль бүрийн өмнө нэр дэвшигчид эл хэргийн захиалагч, жинхэнэ эзний эрэлд гардаг. Өөрөөр хэлбэл, С.Зоригийн хэргийн захиалагчийг илрүүлэх ажиллагаа сонгуулийн үеэр ид өрнөдөг. Нэр дэвшиж байгаа хэн гуай ч дөрвөн мөчөөрөө тэмцээд ч болтугай “Хэргийн жинхэнэ эзнийг илрүүлнэ” хэмээн төв талбайн индэр дээрээс голынхоо дуугаар хашхирч, нэр хүндээ өсгөдөг болоод удсан.

“Дубайн гэрээ”

Монгол Улсын Засгийн газраас “Дубайн гэрээ”-нд хамтран ажиллаж буй “Rio Tinto” корпорацид гэрээгээ цуцлах санал илгээсэн талаар олон улсын хэвлэлүүд мэдээллээд байна. Сонгууль бүрээр л “Дубайн гэрээ” Монгол Улсад ашигтай, ашиггүй гэх хэрүүлийн алим шидэгддэг. Мөн “Засаж сайжруулах зүйл их байгаа учраас “Оюутолгойн гэрээ”-нд нэлээд өөрчлөлт оруулах ёстой” хэмээн их мэдэгчид дуугарч, далд уурхайн бүтээн байгуулалтын гэрээг цуцлах санал хөвөрдөг. Гэтэл өнөөдрийг хүртэл “Дубайн гэрээ” цуцлагдаагүй, цуурхал дундуур явж байна.

“Эрдэнэт" үйлдвэр ТӨҮГ

ОХУ-ын Засгийн газрын эзэмшлээс “Монголиан Коппер Корпорейшн” ХХК-д шилжсэн “Эрдэнэт" үйлдвэр ТӨҮГ, “Монголросцветмет” ХХК-ийг төрийн өмчид буцааж авах шийдвэр гарсан нь улс төрийн эрх мэдэл горилогч эх баригчдын хамгийн том олз байлаа. Тэгвэл энэ удаа ч мөн "Эрдэнэт" үйлдвэр Ерөнхийлөгчийн сонгуулийн гол бамбар болох нь. Энд, тэндэхийн өр тэглэх, эх баригчдын “Саалийн ганц үнээ” болж хувирсан "Эрдэнэт" үйлдвэр Ерөнхийлөгчийн сонгууль хүртэл талхих нь тодорхой юм.