Хөгжмийн зохиолч, төгөлдөр хуурч Б.Чинбатыг хууль хяналтын байгууллагаас шалгах уу гэдэг асуулт хариултгүй байна. Тодруулбал, өнгөрсөн долоо хоногт жүжигчин Б.Мишээл, Б.Номин, Т.Бадамжав нарын ёс зүйгүй үйлдэл, бусдыг хүчирхийлдэг байсан талаарх мэдээлэл цахим сүлжээнд цацагдаж, олон нийтийн дургүйцлийг хүргэсэн. Үүний дараахан Хөгжмийн зохиолч, төгөлдөр хуурч Б.Чинбат бусдыг зодсон, хүн худалдаалах гэмт хэрэг үйлдэхийг завдсан талаар нь дуучин И.Мишээл шүгэл үлээсэн билээ. Дуучин Ч.Мишээлийн цахим сүлжээнд оруулсан мэдээлэлд ноцтой хэд хэдэн мэдээлэл байсан. Тодруубал, Б.Чинбат И.Мишээлийн биед халдаж, зодсон, мөн түүний нэрийг барьж бусадтай гэрээ хэлэлцээ байгуулж, их хэмжээний мөнгө залилсан, хүн худалдаалах гэмт хэрэг үйлдэхийг хоёр ч удаа завдсан талаар нь бичсэн юм.

           Дуучин И.Мишээл Ц.Сарнай, Б.Чинбат нарт зодуулж, ашиглуулж ирсэн тухайгаа цахим хуудастаа “Миний бие И.Мишээл нь Ц.Сарнай( Sweetymotion хамтлагийн дуучин) Б.Чинбат( МУГЗ) гэх хүмүүстэй долоо, найман жилийн амьдралаа үрээд, сэтгэл санаа, мөнгө төгрөгөөрөө хохироод эцэст нь хамтран ажиллахаа больсон нь үнэн. Энэ бүх цаг хугацаанд гэрт нь цэвэрлэгч, цүнх баригч, хүүхэд асрагч, жолооч, түшээ хийсээр цаг хугацаа өнгөрсөн. Тэдний гэр бүлд туслах хүн хүч хэрэг болсон, өвчин зовлон ч тохиосон бүх цаг үед нь хамт байж хамаг сэтгэл, алтан цагаа зориулсан юм шүү. Гэр бүл, хамаатан садан, найз нөхөд тэр ч бүү хэл урлагийн ойр байсан ах эгч нар маань ч мэдэхийн дээдээр мэднэ. Мөн надад санал тавьсан олон хувь уран бүтээлчид, продакшинтай уран бүтээл хийж, хамтран ажиллахыг минь зөвшөөрдөггүй хааж боодог байсан. Инээсэн, мэндэлсэн, бараг зөрөөд өнгөрсөн хүнтэй намайг хардаж есөн бусаараа доромжлуулж, хүсэхгүй байгаа зүйлээ илэрхийлэх, санал бодлоо хэлэх, уран бүтээл хийж өгөхийг хүсэх, зүгээр л бараг оршиж байхдаа ч Б.Чинбат гэж хүнд хараалгуулж маш их дарамт дунд байсан. Урт хугацаанд сэтгэл санаагаар унаж, амиа хорлох бодол ч орж ирж байсан хүнд хэцүү цаг надад бий.  Эцэст нь, иргэн Б.Чинбат нь миний биед халдаж, зодож миний итгэл цаашдын ажил түүгээр эцэслэгдсэн. Мөн ээж дүү хоёр руу маань “Танай охиныг урлагт хэн ч биш, гишгэх газаргүй болгоно” гэх санаатай дарамталсан, бусад дуучид, уран бүтээлчдийг доромжилсон, хаана ч хэзээ ч болоогүй зүйлсийг бичсэн мессежүүд нь одоо ч бий.

Мөн хоёр ч удаа намайг ажил ярих нэрийдлээр танихгүй эрэгтэй хүнтэй уулзуулж, орхиж зугтаж байсан, сүүлд л би үүний учрыг тунгааж олов. Би харамсалтай нь тэдний бодсон шиг, ашиглаж болно гэж зорьсон хүн нь биш байв. Миний нэр хүндийг ашиглаж дууны албумыг нь хийж өгнө гэж хөрөнгө оруулалт авсан 100 давсан сая төгрөгөө хүмүүст нь буцааж өгөөрэй. (Тэндээс би нэг төгрөгийг ч уран бүтээлдээ ашиглаагүй болно) Мөн миний тоглолтын орлогоос( мэдээж тэдний зохиосон дуу биш ковер дуу дуулж олсон орлого) зээлж авдаг байсан мөнгийг эргүүлж өгөхийг найрсагаар хүсье. Би мөнгө тарьдаг хүн биш. Чаддаг хүмүүст нь төлөх ёстойгоо төлөөд дуунуудаа одоо хиймээр байна” гэх агуулга бүхий постыг бичсэн байдаг.

Харин энэ талаар ”Sweetymotion” хамтлагийн гишүүн асан Т.Солонго “Танил түүх байх чинь вэ. “Sweetymotion” хамтлагт орж, хамт амьдарч, ажиллаж байсан сайхан гэхээсээ илүү гунигтай, аймшигтай он жилүүд нүдний минь өмнүүр өчигдөрхөн болсон үйл явдал шиг дурайж байдаг шүү. И.Мишээл дүү минь хүчтэй зоригтой байгаарай. Юунаас ч битгий айгаарай. Улам эрч хүчтэйгээр олон сайхан уран бүтээл хийгээрэй” гэж бичсэн нь анхаарал татаж байгаа юм.

ЦЕГ: ДУУЧИН И.МИШЭЭЛЭЭС ГОМДОЛ, ӨРГӨДӨЛ ИРВЭЛ Б.ЧИНБАТЫГ ШАЛГАНА

Б.Чинбаттай холбоотой мэдээлийг хууль хяналтын байгууллагаас шалгаж магадгүй байна. Учир нь, гэмт хэргийн шинжтэй хэд хэдэн ноцтой үйлдэл И.Мишээлийн олон нийтийн сүлжээнд бичсэн мэдээллээр ил болоод байгаа юм. Тэгвэл хууль хяналтын байгууллагаас Б.Чинбатыг шалгах эсэх талаар тодруулахад “Одоогийн байдлаар нэр холбогдоод байгаа хүмүүсээс гомдол, мэдээлэл ирээгүй байна. Гэрэл зураг, видео болон бусад баримтыг хавсаргаагүй учраас дуучин И.Мишээлийн олон нийтийн сүлжээнд бичсэн гомдлоор Б.Чинбатыг шалгах боломжгүй. Харин дуучин И.Мишээл болон бусад хүнээс гомдол, санал ирвэл Б.Чинбат нарыг хуулийн дагуу шалгана” гэсэн юм.

Мөн бид уг асуудалтай холбоотойгоор төгөлдөр хуурч Б.Чинбаттай холбогдож тодруулах гэсэн боловч гар утсаа аваагүй юм.