Баянгол дүүргийн 309 дүгээр цэцэрлэгийн туслах багш хоёр настай хүүхдүүдийг зодож байгаа бичлэг олон нийтийн сүлжээнд ил болоод байна. Тодруулбал, тус цэцэрлэгийн “Бага-А” бүлгийн туслах багш Г.Одончимэг нь хоёр настай хүүхдүүдийг зодож, заримыг нь хүлж, алгадаж, чимхэж байгаа нь камерын бичлэгт үлджээ.  Хүүхдийн эх, эцэг гомдол гаргаж, цэцэрлэгийн камерын бичлэгийг шүүснээр эл хэрэг ил боллоо.

Хүүхэд зодсон гэх Г.Одончимэг нь 1970 онд төржээ. Тэрбээр цэцэрлэгийн туслах багшийн 45 хоногийн дамжааг 14 жилийн өмнө төгссөн юм байна. Улмаар цэцэрлэгийн туслах багшаар гурван сар ажиллаад ажлаасаа гарчээ. Түүнээс хойш 14 жил барилгын засал чимэглэл, туслах ажилтнаар ажиллаж байгаад 309 дүгээр цэцэрлэгийн туслахаар багшаар ажилд ороод удаагүй байжээ.

         Энэ талаар тус цэцэрлэгийн "Бага А" бүлгийн эцэг, эхчүүдийн өгсөн мэдээллээр “Цэцэрлэгийн туслах багш О нь хүүхдүүдийг ор, хөнжлийн даавуугаар хөдөлгөөнгүй болтол нь ороож, хоёр, гурван цагаар хэвтүүлчихдэг байсан байна. Үүнийг нь ангийн багш н.Эрдэнэцэцэг мэдэж байсан хэрнээ зогсоогоогүй. Бүүр өөрөө даавуугаар хүлж, ороож байгааг нь бичлэгээр үзлээ. Өнөөдөр 10:00 цагаас хойш бичлэг үзэж, хянаж байна. Хүчирхийлэлд өртөөгүй, багшдаа зодуулаагүй хүүхэд алга. Туслах багш нь хүүхдүүдийг байнга нударч, алгадаж, нуруу руу нь цохиж, унтаж байхад нүүр рүү нь алгадаж, татаж босгох, орноос унагах, түлхэж, хүчирхийлдэг байжээ. Үүнээс болоод хүүхдүүд айдастай, багшаасаа зугтаж байгааг бичлэгээр харлаа. Ангийн багш нь Эрдэнэцэцэг “Эмнэлэгт хэвтсэн хойгуур ийм асуудал гарсан байна” гэж хэлж, өөрийгөө өмөөрч байсан. Гэтэл энэ туслах багштайгаа нийлээд ийм зүйл хийж байсан нь камерын бичлэгээр нотлогдсон. Үнэхээр харамсаж, гомдож, хүүхдүүдээ өрөвдөж байна. Эцэг, эхчүүд Баянгол дүүргийн цагдаагийн газарт гомдол гаргаж, энэ асуудлыг шалгуулж байна. Нуруу руу нь чанга цохиж, хацар руу нь алгадсан хоёр хүүхдийн сэтгэл зүй, биеийн байдал хүнд байгаа. Бид Хүний эрхийн үндэсний комисс болон Боловсрол, шинжлэх ухааны яаманд хандана. Туслах багш 14 жил боловсролын салбарт ажилласан гэдэг нь худлаа. Харин 14 жил барилгачин хийсэн хүн байсан нь өнөөдөр тодорхой боллоо. Энэ багшийг харахаар хүүхдүүд айж, уйлдаг. Эцэг, эхчүүд бид холбогдох бүх байгууллагад хандаж, хуулийн хариуцлага хүлээлгэх болно” гэлээ.