Эцэг, эх нь архидан согтуурч, алга болсны улмаас ой дөрвөн сартай хүүхэд осгосон гэх харамсалтай хэрэг гараад байгаа. Одоогийн байдлаар хүүхэд ээжтэйгээ Эх, хүүхдийн үндэсний эрүүл мэндийн төвд хэвтэн эмчлүүлж, хэргийг Баянзүрх, Дархан-Уул аймгийн цагдаагийн газарт шалгаж байгаа юм. Бид сэрэмжлүүлэг болгох үүднээс дараах мэдээллийг бэлтгэлээ.

            Ой дөрвөн сартай охин эцэг, эхийн хамт гуравдугаар сарын 14-нд Дархан-Уул аймгаас Баянзүрх дүүргийн 31 дүгээр хорооны дугаар тоотод түр хугацаанд иржээ. Осол гуравдугаар сарын 15-16-нд шилжих шөнө болсон байна. Тодруулбал, Баянзүрх дүүргийн цагдаагийн газрын нэгдүгээр хэлтэст гуравдугаар сарын 16-ны 08:38 цагийн үед “Ой гарантай хүүхэд нас барчихсан юм шиг байна” гэх дуудлага, мэдээлэл бүртгэгджээ. Уг дуудлагыг Баянзүрх дүүргийн нэгдсэн эмнэлгээс өгсөн байна.

            Эх сурвалжийн бидэнд өгсөн мэдээллээр “Охиныг осгосон байдалтай байхад нь эмнэлэгт хүргэсэн юм шиг байна лээ. Ухаангүй, амьсгалахгүй байсан учраас нас барчихсан байж болзошгүй гэх дуудлага өгсөн гэсэн. Тэгээд эмч нар анхан шатны тусламж маш яаралтай үзүүлж, шаардлагатай арга хэмжээг авсан. Охиныг Баянзүрх дүүрэгт гурав хоног эмчлээд Эх нялхас руу шилжүүлсэн байна лээ. Тэнд эмчлүүлээд, биеийн байдал нь дээрдэж байгаа гэсэн” гэлээ.

            Өөр нэг эх сурвалжийн мэдээлж буйгаар “Охины ээж найзуудтайгаа Цэргийн баяр тэмдэглэхээр гэрээс гарсан. Энэ хооронд хүүхэд ээжийгээ хайж, гэрээс гараад осгосон. Эмнэлэгт хүргэгдэхдээ зүрх нь зогссон, осголтын байдалтай байсан. Баянзүрх дүүргийн эмч нар хоёр цаг гаруй иллэг, массаж, эмчилгээ хийж байж охиныг амьдруулсан” гэсэн юм.

АЙЛЫН ЭЗЭН: ЭХ, ЭЦЭГ НЬ ХҮҮХДЭЭ ХӨЛДӨӨЧИХӨӨД БАЙХАД НАМАЙГ ШАЛГААД БАЙГААД ГАЙХАЖ БАЙНА

            Манай сурвалжлах баг өчигдөр 15:00 цагийн үед Баянзүрх дүүргийн 31 дүгээр хорооны дугаар хэсгийн дугаар тоотод очлоо. Уг хашаанд гурван айл байх бөгөөд түрээсэлж амьдардаг гэнэ.

Зүүн талын гэрээс 35 орчим насны эмэгтэй гарч ирээд “Хүүхдээ тэврээд ирсэн хүмүүсийг би гэртэй оруулахгүй байсан юм уу. Сайхан сэтгэл гаргасан биш, гай боллоо. Би энэ хашааг гурван хүүхэдтэйгээ хамт түрээсэлж амьдардаг. Энэ асуудлаас болоод хашаанаасаа хөөгдөхөд хүрээд байна. Эцэг, эх нь хүүхдээ хөлдөөчихсөн байхад цагдаа нар намайг шалгаж, байцаагаад байгаад гайхаж байна. Би өчнөөн удаа очиж, мэдүүлэг, тайлбар өглөө. Бүгдийг нь үнэнээр нь хэлсэн. Хөлдсөн гээд байгаа охин тэр өдөр манай гурван хүүхэдтэй хамт гэрт үлдсэн. Тэгээд гараад явчихсан юм байлгүй. Мөн ээж нь гэрийн гадаа байж байсан шүү дээ. Архидан согтуураад алга болчихсон зүйл байхгүй. Хүмүүсийг биднийг элдвээр бичиж, харааж байна. Тэгээд ч тэр өдөр би гэртээ байгаагүй, байхгүй байсан учраас юу болсныг мэдэхгүй. Монголчууд юу болсныг нь мэдэхгүй байж харааж, нийгмээрээ шүүж байна. Одоо охины биеийн байдал дээрдэж байгаа байх. Өнөө, маргаашгүй эмнэлгээс гараад гэр рүүгээ буцна гэсэн. Би ямар ч мэдээлэл өгмөөргүй байна. Тэр эцэг, эхээс нь, цагдаагаас нь тайлбар, ярилцлага ав” хэмээн уурлаж, хаалгаа хаасан юм.  

ХҮҮГИЙН ЭЦЭГ, ЭХИЙГ ДАРХАН-УУЛ АЙМГИЙН ЦАГДААГИЙН ГАЗРААС ШАЛГАЖ БАЙНА

            Гэрийн эзэн эмэгтэйг Баянзүрх дүүргийн цагдаагийн нэгдүгээр хэлтсээс шалгаж байгаа аж. Хүүхдийн дэргэд архидан согтуурсан, үл хайхрах хүчирхийлэл үйлдсэн гэх үндэслэлээр тайлбар, мэдүүлэг авчээ. Харин хөлдсөн охины аав, ээжийг Дархан-Уул аймгийн цагдаагийн газраас шалгаж байна. Гэрийн хаяг нь тус аймагт бүртгэлтэй, тэнд амьдардаг учраас харьяаллын дагуу шалгаж байгаа талаар эх сурвалж мэдээллээ.

ОХИНЫГ АВАРСАН ЭМЧ: ХӨЛДӨЖ, ЗҮРХ НЬ ЗОГССОН ОХИН ДАХИН АМЬДАРСАН НЬ ГАЙХАМШИГ

          Охиныг аварсан Баянзүрх дүүргийн нэгдсэн эмнэлгийн хүүхдийн эмч “30 гаруй жил эмчээр ажиллахдаа ийм тохиолдолтой тулгарч байсангүй. Манай эмнэлэгт хүргэгдэж ирсэн ой дөрвөн сартай хүүхэд хөлдчихсөн, бие нь мод шиг болчихсон байсан. Манай эмч нар сэхээн амьдруулах арга хэмжээг яаралтай авсан. Бид охиныг амьдруулахын тулд нэг цаг орчмын хугацаанд арга хэмжээ авсан ч найдвар харагдаагүй. Тэгээд охины ар гэрийнхэнд ч найдваргүй боллоо гэдгийг анхааруулж хэлсэн. Хоёр цаг орчим арга хэмжээ авсны дараа охины зүрхний цохилт маш бүдэг мэдрэгдэж, амьсгалж эхэлсэн. Охины судас олдсон даруйд шаардлагатай эм, тариаг хийсэн. Энэ бүхэн тийм амархан байгаагүй. Судас нь олдохгүй, амьсгалж эхэлсэн ч буцаад тасалдсан гээд эрсдэл өндөр байсан. Амьсгал, судас жигдрээд эмчилгээ хийсний дараа охин “Мөөмөө идье” гэж хэлсэн.Эмнэлгээс гарахдаа охин “За баяртай” гээд явсан нь сайхан байсан” гэж ярьжээ.