С.Зориг агсны амийг хөнөөсөн хэрэгт буруутгагдан гурван шатны шүүхээс ял авсан Т.Чимгээ, Б.Содномдаржаа нарын хэргийг хэрэгсэхгүй болгож, нэмэлт мөрдөн байцаалтад буцаасан байдаг. Тодруулбал, Т.Чимгээ, Б.Содномдаржаа нарыг С.Зоригийн амийг хөнөөсөн нь бүрэн тогтоогдоогүй хэмээн үзэж, уг хэргийг нэмэлт мөрдөн байцаалтад буцаасан юм. Тэгвэл нэмэлт мөрдөн байцаалтад буцсан хэрэгт буруутай хүн байхгүй болжээ. Өөрөөр хэлбэл, С.Зоригийн хэрэгт буруутгагдаад байсан Т.Чимгээ, Б.Содномдаржаа нараа цагаатгах тогтоол жилийн өмнө гарчээ.

Б.СОДНОМДАРЖАА: БИДНИЙГ ЦАГААТГАХ ТОГТООЛ ГАРСАНД ТУЙЛЫН БАЯРТАЙ БАЙНА

Энэ талаар тус хэрэгт холбогдоод байсан Б.Содномдаржаатай холбогдож тодрууллаа.

-Нэмэлт мөрдөн байцаалтад буцсан С.Зориг агсны хэрэг юу болж байгаа вэ. Таныг дахин байцааж, шалгасан уу?

     -Биднийг цагаатгах тогтоол гарсан. Гурван шатны шүүх, хууль хяналтын байгууллагынхан биднийг хэлмэгдүүлсэн гэдэг нь тогтоогдсон. Суллагдаад гурван жил болж байна. Үүний хоёр жилд нь хэрхэх нь тодорхойгүй, хэзээ дуудах бол гэсэн айдастай амьдарлаа. Гэхдээ биднийг нэг ч удаа дуудаж, тайлбар мэдүүлэг аваагүй. Хэргийг шалгасан эсэхийг ч мэдэхгүй байна. Харин өнгөрсөн оны тавдугаар сард Нийслэлийн прокурор дуудаж, цагаатгах тогтоолтой танилцууллаа. Тэгээд цагаатгах тогтоол дээр гарын үсэг зураад, нэг мөсөн хууль хяналтын байгууллагаас саллаа. Хэчнээн сайхан байсан гэж санана. Өнгөрсөн жилээс л нуруу тэнийж, айх айдасгүй боллоо. Тэрнээс өмнө суллагдсан ч түгшүүртэй, хаашаа ч явах аргагүй амьдарч байлаа.

-Төр таниас уучлалт гуйсан гэсэн үг үү. Сэтгэл санааны хохирол нэхэмжлэх үү?

        -Цагаатгах тогтоолтой холбоотойгоор дахин нэг шүүх хурал болох юм шиг байна лээ. Түүнийг нь бид хүлээж байгаа. Тэр үедээ хэлмэгдүүлсэндээ уучлалт гуйх юм байлгүй дээ. Ямартай ч хөгшин настай ээжийн минь сэтгэл санаа амраад сайхан байгаа. Өмгөөлөгчтэйгөө хамтраад хохирол нэхэмжлэх асуудлыг хөөцөлдөж байгаа. Одоогийн байдлаар шийдэж, шийдэлд хүрсэн зүйл алга. Уг нь биднийг буруу гэдгийг тогтоож, цагаатгасан юм чинь нөхөн төлбөр олгоход удаад байх хэрэг байхгүй шүү дээ. Гэтэл одоо хүртэл сураг чимээгүй байна. Сэтгэл санааны хохирол гэдэг чинь юугаар ч хэмжээлшгүй зүйл. Бид хохирлын хэмжээгээр одоогоор тогтоогоогүй байна. Ямартай ч бидний хохирлыг барагдуулж өгнө гэдэгт итгэлтэй байгаа.

-Таны бие давгүй биз дээ. Орхон аймагтаа амьдарч байгаа юу?

          -Хорих ангиас суллагдаад ирснээс хойш бие олигтой дээрдээгүй. Нуруу өвдөөд байгааг өмнө хэлж байсан даа. Одоо бүүр хэвтэрт орох нь холгүй байна. Ийм л байдалтайгаар амьдарч байна даа. Энэ асуудал дуусаад, хохирол мөнгө нь олгохоор биеэ сайн эмчлүүлэх бодолтой байгаа. Одоо гадаад руу гарахыг хориглочихсон хэвээрээ байгаа байх. Шүүх хурлаар орж байж суллагдахад авсан таслан сэргийлэх арга хэмжээнүүдийг цуцлах болов уу.

-Хүүхдүүд тань сайн уу?

          -Тийм ээ, аав, ээжтэйгээ элэг бүтэн сайхан амьдарч байна. Бага  хүү маань хоёр настай, том залуу болж байна. Би хүүхдүүдтэйгээ хамт зах дээр ажиллаж, амьдралаа болгож байгаа. Хэрэв тэндээ л ажиллахгүй бол миний амьдрал зогсчих гээд байна шүү дээ.

-Т.Чимгээтэй холбоотой байгаа юу?

-Яг үнэндээ бид бие биеийгээ тийм сайн танихгүй. Шүүх хурлын үеэр л хамт оролцож байсан шүү дээ. Хүмүүс Т.Чимгээ, Б.Содномдаржаа гэдгийг нэг хүн шиг ойлгоод байдаг юм билээ. Тэр хүн хаана амьдарч байгааг огт мэдэхгүй. Уулзаагүй, ойрд шүүх хурал болоогүй учраас таараа ч үгүй” гэлээ.

Ингэснээр 1998 онд гарсан улс төрийн онц ноцтой хэргийг илэрсэн, илрээгүй гэх олон жилийн дуулиан дахиад сэдэрч байна.  С.Зориг агсныг хөнөөсөн гэх хэргийн эзэд цагаадаж, дараагийн хэрэгтнүүдийг хайх эрэл эхэлж байна гэсэн үг. Сонгууль дөхөөд эхлэхтэй зэрэгцээд үе үеийн эрх баригч нарын сөхдөг төр нийгмийн нэрт зүтгэлтэн С.Зориг асны хэргийг хуулийн дахин дэгдэх нь.  Харамсалтай нь, С.Зоригийн хэрэг эзэнгүйдэж, дахин өөр гэмт хэрэгтнийг хайх нь.