Орхон аймагт улсын төсвөөр баригдаж байгаа хоёр ч сургуулийн барилга “царцаж”, балгас болжээ, Л.Энх-Амгалан сайд аа. Тодруулбал, Орхон аймгийн Говил, Рашаант багт улсын төсвийн 4.5 тэрбум төгрөг зарцуулсан хоёр сургуулийн барилга “царцаж” эзэнгүй болжээ.

        БШУЯ-наас Орхон аймгийн Баян-Өндөр сумын Говил багт 250 хүүхдийн шинэ сургууль барих тендерийг 2020 онд зохион байгуулжээ. Тендерт “Ди Ти И Эм строй” ХХК шалгарч, барилгын ажлаа мөн ондоо эхлүүлсэн байна. Шинэ сургуулийн барилгыг ажлын 150 хоногт барьж, хүлээлгэж өгөхөөр гэрээнд гарын үсэг зурж, урьдчилгаа төлбөр 2.0 тэрбумыг улсын төсвөөс авчээ. Ингээд барилгын ажлаа эхлүүлж, шаваа тавьсан байна. Харамсалтай нь, тус барилгын компани өнөөдрийг хүртэл ажлаа дуусгаагүйн балгаар Говил багийн сумын 250 хүүхэд сургуульгүй болоод байна.

Уг гэрээнд тухайн үеийн Орхон аймгийн Засаг дарга, одоогийн УИХ-ын гишүүн Д.Батлут, ЗДТГ-ын дарга Д.Соёлчхүү, “Ди Ти И Эм строй” ХХК-ийн захирал Э.Тэмүүжин, менежер Б.Амартүвшин нар гарын үсэг зурж, албажуулсан байна.

Ажлын 150 хоногт буюу 2020 оны арванхоёрдугаар сард ашиглалтад орох ёстой байсан Говил багийн 250 хүүхдийн сургууль өнөөдрийн байдлаар хүндхэн нөхцөл байдалтай байна. Баригдсан сургуулийнх нь барилгын шал намагт идэгдэж, цуурч, нурж унахад бэлэн болсон, цонх нь хагарч, хананы блок нь гажжээ. Анх энэ сургуулийг барихын тулд улсын төсвөөс 2.0 тэрбум төгрөг төсөвлөсөн байна. Харин хачирхалтай нь, 3.9 тэрбум төгрөгийн үнийн санал хүргүүлсэн “Ди Ти И Эм строй” ХХК тендерт шалгарчээ. Гэрээ байгуулахдаа мөн 3.9 тэрбум төгрөгөөр байгуулж, ажлаа эхлүүлсэн байна. Улсын төсвөөс олгох ёстой 2.0 тэрбум төгрөг “Ди Ти И Эм строй” ХХК-ийн дансанд бүрэн орсон ч ажил нь дуусаагүйгээр барах уу баригдсан сургууль нь сүнстэй байшин шиг балгас болж хувирчээ.

“Ди Ти И Эм строй” ХХК-ийн судалж үзвэл, Барилгын засвар үйлчилгээ, гадаад худалдааны чиглэлээр үйл ажиллагаа явуулахаар 2013 оны гуравдугаар сарын 26-нд байгуулагджээ. Ашгийн төлөө, Орхон, Баян-Өндөр, 6-р баг, Согоот, 6 хороолол, 19, 21 тоот хаяг дээр бүртгэгдсэн байна. Хувьцаа эзэмшигчээр нь Чимэдрэгзэн Санжаадамба, Эрдэнэтуяа Тэмүүжин бүртгүүлжээ. Харин Чимэдрэгзэн Санжаадамба нь 2018 онд нэрээ хасуулж, эцсийн өмчлөгчөөр нь Эрдэнэтуяа Тэмүүжин бүртгэгджээ.

Оролцож байсан тендер нь, Орхон аймагт Орон сууцны 10-р байрны гадна фасад хийх, Соёл мэдээллийн төвийн байрны фасад будах, 8 дугаар сургуулийн гадна талбайд биеийн тамирын талбайг иж бүрэн тохижуулах, Уурхайчин баг, 3-24-р байрны урд талд амралт чөлөөт цагийн талбай байгуулах ажил, Гудамжны болон төрийн байгууллагуудын гэрэлтүүлэг, Ундны усны шугамыг цэвэршүүлэгчээр шинэчлэх, Турбины дээврийн засвар, Ус дамжуулах шугам ф159-г элэгдэлд тэсвэртэй материалааар доторлох, Нутгийн сүлд дууны клип хийх, Малын гаралтай бүтээгдэхүүнд анхан шатны боловсруулалт хийх үйлдвэр, хүнсний ногооны зоорь /Эрдэнэбулган сум 6 дугаар баг/, Ус хангамжийн цехэд сэлгэн залгалтын камер барих ажил, ЗДТГазрын урд талбайг засварлах, Бага сургуулийн барилга, 160 суудал /Архангай, Эрдэнэбулган сум, 6 дугаар баг/ зэрэг 100 гаруй тендерт оролцож, дээрх ажлуудыг гүйцэтгэжээ. Чухамдаа, шалгарсан тендерийнхээ хэдийг нь гүйцэтгэж, улс, аймгийн комисст хүлээлгэж өгсөн, хэдийг нь Говил багийн сургууль шиг балгас болгож хаясан нь тодорхойгүй байна.

Мөн үүнээс гадна Орхон аймгийн Рашаант суманд улсын төсвийн 2.5 тэрбум төгрөгөөр мөн л 250 хүүхдийн суудалтай сургууль баригдаж байгаа ч балгас болжээ.