Халуун савны хэмжээтэй төмөрт гогцоо гагнуулах гэж байгаад дэлбэрэлтэд өртөж, амиа алдсанд нь харамсаж байна

      Дундговь аймгийн Эрдэнэдалай сумын зургадугаар багийн иргэн худгийн мөс цоолох зорилгоор гэрийнхээ ойролцоох төмрийн хог дээрээс халуун савны хэмжээтэй төмөр олж, гогцоо гагнуултал, дэлбэрч, амиа алдсан харамсалтай хэрэг гарсан. Мөн дэлбэрэлтийн улмаас гурван иргэн шархдаж, гагнуурчны биеийн байдал хүнд байгаа гэх мэдээлэл бий. Тухайн үед чухам юу болсон талаар талийгаачийн эхнэр Ч.Сарантуяагаас тодрууллаа.

-Танай гэр бүлийнхэнд эмгэнэл илэрхийлье. Гэр бүлийнх нь хүн ямар төмөр гагнуулахаар явсан юм бэ. Тухайн үед та хамт байсан уу?

       -Манай гэрийн ойролцоо төмрийн хог хаядаг цэг байдаг юм. Хэрэглэхгүй төмрүүдээ аваачиж хаядаг гэсэн үг. Миний мэдэхээр хоёр жилийн өмнөөс халуун савны хэмжээтэй нэлээд хүнд төмөр хогийн цэг дээр байдаг байсан. Нэг өдөр талийгаач минь “Энэ төмрөөр худгийн мөс цоолбол болох юм байна. Сум орохоороо гогцоо гагнуулна” гэж ярьж байсан. Тэгээд энэ сарын 6-ны өдөр сумын төв орж нөгөө төмрөө гагнуултал гэнэт түс, тас хийх дэлбэрэх чимээ гарсан. Тэр үед би гагнуурчин айлын хашааны гадна машиндаа сууж байсан юм. Чимээ гараад хар утаа суунаглаад байхаар нь очтол хоёр хүн хажуугаараа болчихсон байсны нэг нь манай нөхөр байсан. Тэгээд манай хүний гэдсэнд сум зоогдчихсон, цус алдаж байсан.

-Тэр сумыг хаанаас, хэн авчирч төмрийн хог дээр хаясныг нь та мэдэх үү. Хэзээнээс хойш байсан бэ?

       -Хаанаас, хэн авчирч хаясныг нь мэдэхгүй. Хоёр жилийн өмнө л хогийн цэг дээр байдаг байсныг нь санаад байгаа юм. Халуун савны хэмжээтэй том болохоор танкны сум байсан болов уу гэж бодож байгаа. Энэ талаар цагдаагийн байгууллагынхан ч мөн шалгаж байгаа.

-Талийгаачид задлан шинжилгээ хийсэн үү. Цагдаа нар таниас байцаалт авсан уу?

         -Аймгаас цагдаа нар болон шүүх шинжилгээний байгууллагынхан ирсэн. Бидний зөвшөөрөлгүй талийгаачид задлан шинжилгээ хийчихсэн. Уг нь би “Шалтгаан нь тодорхой юм чинь дахин сэгчүүлмээргүй байна гэж хэлсэн. Гэтэл эмнэлэгийн байгууллагынхан задлан шинжилгээ хийх шаардлагатай гэсэн.  Шинжилгээний хариу нь сарын дараа гарна гэсэн.Одоо морогт цогцос нь байгаа. Цагдаа нар надаас хэд хэдэн удаа байцаалт авсан. Мөн төмөр байсан газар ирж  дэлбэрэх магадлалтай төмөр, сум байна уу гэж шалгасан.Тэгээд талийгаачийн нас барсны гэрчилгээг олгохдоо “Дэлбэрэлтэд өртсөн” хэмээн тодорхойлсон байсан.

-Танайх ам бүл хэдүүлээ вэ. Энэ жил өвөлжөөн дээрээ өвөлжсөн үү?

        -Манайх ам бүл гурвуулаа. Сургуулийн насны нэг хүүхэдтэй. Энэ жил манайх өвөлжөөн дээрээ өвөлжсөн.

-Цагдаагийн байгууллагынхан хэргийг хэрхэн шалгаж байгаа вэ?

      -Одоогийн байдлаар цагдаагийн  байгууллагаас дэлбэрсэн төмөр биет юу байсныг тогтоохоор ажиллаж байгаа.

-Дэлбэрэлтэд өртсөн гурван хүний биеийн байдал ямар байгаа вэ. Та холбоо барьж амжсан уу?

        -Хоёрынх нь биеийн байдал хэвийн байгаа гэсэн. Гагнуурчин нэлээд хүнд шархдсан учир төв газрын эмнэлэг бараадсан сураг дуулдсан. Би тэднийхэнтэй ярьж амжаагүй л байна. Ярина гэж бодож байгаа. Дэлбэрэлтэд өртсөн нэг хүн нь хуруугаа тайруулсан гэсэн. Гэнэтийн аюултай осол болж, бидэнд хүндээр тусаад хэцүү байна.