Увс аймгийн Хяргас сумын удирдлагууд эмнэлгийн эмч Б-г дуудлагад авч яваад хээр орхисон. Эмч ганцаар алхсаар сүлжээтэй газар олж, гэрийнхэндээ мэдэгдэн авхуулсан байна. Тус нутагт цас ихтэй. -25 хэмийн хүйтэн өдрүүд үргэлжилж байгаа. Тиймээс сумын удирдлагууд эмчээ хээр орхисноо нууцалж байгаа гэх мэдээлэл олон нийтийн сүлжээнд цацагдсан. Тухайн үед чухам юу болсон талаар Хяргас сумын Засаг дарга Х.Дашзэвэгээс тодрууллаа.

-Хяргас сумын удирдлагууд дуудлагад хамт явсан эмчээ хээр орхисон гэх мэдээлэл бий. Тухайн үед юу болсон талаар мэдээлэл өгч болох уу?

      -Хоёрдугаар сарын 28-нд аймгийн төвөөс 150 боодол өвс манай суманд ирсэн юм. Сумын удирдлагууд өвсөө амдаж аваад малчдад тараахаар хөдөө явах гэж байтал багийн эмч Б сумын төвөөс 16 километрийн зайтай айлаас хүүхдийн дуудлага ирсэн. Та бүхэнтэй хамт явж болох уу. Буцах унаагаа би зохицуулчихсан байгаа хэмээн гуйсан юм. Би Засаг дарга болохоосоо өмнө эрүүл мэндийн салбарт ажиллаж байсан болохоор мөн хүүхдийн дуудлага ирсэн гэхээр нь эмчийг хамт явахыг зөвшөөрсөн юм. сумын төвөөс гараад 16 километр явж байтал дуудлага өгсөн айлын эзэн хөтөлгөө морьтой эмчийг тосож авсан юм. Гэрээсээ 500 метрийн зайтай эмчийг авсан гэсэн үг. Тухайн айл харагдаж байсан. Тухайн хүнд бид эмчийг маань сайн авч яваарай хэмээн захиж, хүлээлгэж өгсөн. Ямар ч монгол хүнд өөрийнхөө эхнэр шиг, охин шиг эмэгтэй хүнийг өвлийн хүйтэнд хээр орхиж явахгүй шүү дээ.

-Тухайн үед эмч яагаад танай машинд дайгдаж явсан юм бэ. Эмнэлэгийн машинаараа явах боломжгүй байсан уу?

      -Манай сумын эмнэлэг түргэний хоёр машинтай. Хоёулаа ажлаар явчихсан байсан юм билээ. Тэгээд хүүхэд халуураад байна гэх дуудлага ирсэн болохоор эмч унаа хайж, Захиргаагаар явахад нь бид таарсан гэсэн үг. Мөн сумын төвөөс ойрхон айлаас дуудлага ирсэн учир эмч явъя гэж шийдсэн юм билээ.

-Буцахдаа яаж явах тухайгаа та бүхэнд ярьсан уу. Сүлжээтэй газар олж байж л гэрийнхэндээ мэдэгдсэн гэсэн?

      -Буцахдаа нөхрөөрөө авхуулна гэдгээ хэлчихсэн байгаа гэсэн учир бид санаа зовоогүй. Гэтэл эмчийн хадам ээж бидний дунд болсон явдлыг буруу ойлгож, олон нийтийн сүлжээнд сумын удирдлагууд эмчээ хээр орхиж явсан гэх мэдээлэл олон нийтийн сүлжээнд байршуулчихсан байсан. Түүнээс болоод сумын нэр  хүнддэд муугаар нөлөөлж байна. Манай сум онцгой байдал зарлачихсан Улаанбаатар дахь орон нутгийн удирдлагууд малчдад туслах хандив цуглуулж байгаа. Тэр ажил хүртэл дээрх асуудлаас болж царцах вий гэж бодож байна.

-Сумын удирдлагууд согтуу байсан учир эмчтэйгээ муудалцаж, хээр орхисон гэх мэдээлэл олон нийтийн сүлжээнд байсан. Үүнд та ямар тайлбар өгөх вэ?

    -Зуданд 200-300 малаа алдчихсан малчдад туслахаар яваа бид яаж согтуу байх билээ дээ. Малчид тун хүнд байгаа. Сумынхаа иргэдтэй хамтарч 30 цаг цас ухаж, зам гараад хөдөөнөөс иртэл худал мэдээлэл тарчихсан байсанд үнэндээ гайхсан бас гомдсон. Биднийг согтуу байгаагүй, эмчээ хээр орхиогүй гэдгийг олон хүн нотлох байх" гэсэн юм. 

      Олон нийтийн сүлжээнд худал мэдээлэл байршуулсан гэх эмчийн хадам ээж Д.Өнөрбаяраас зарим зүйлийг тодрууллаа. 

-Та сумын удирдлагууд эмчээ хээр орхисон гэх мэдээлийг олон нийтийн сүлжээнд байршуулаад устгачихсан байсан?

     -Манай бэр багийн эмчээр ажилладаг. эмнэлгийн хоёр машин дуудлагад явчихсан эзэнгүй байхад нь манай бэр унаа олоод дуудлагад явчихсан байсан. Тэгээд сүлжээтэй газраас бид нар руу ярьж авхуулна гэж байсан юм. Тэр хэлснээрээ бидэн рүү ярьсан. Бид гурвуулаа түүнийг очиж авсан. Машин цасанд суусан бухимдалтай байсан учир сумын удирдалагууд эмчээ хээр орхисон гэх утгатай юм биччихсэн юм. Түүнийг харсан хүүхдүүд минь "Ингэж бичиж болохгүй. Намайг хөдөө орхиогүй. Харин ч миний ажлыг бүтээж өгсөн" гэж тайлбарласан болохоор нь би удахгүй устгачихсан юм. Гэтэл олон нийтийн сүлжээгээр Хяргас сумын удирдлагууд эмчээ хээр орхижээ гэх мэдээлэл янз бүрээр цацагдсан байсан.

-Таны буруу ойлголтоос болж олон нийтэд худал мэдээлэл тарсан юм байна. Та үүнийгээ хүлээн зөвшөөрч байгаа юу?

    -Тийм ээ. Миний алдаанаас болоод худал мэдээлэл олон мэдээлэл олон нийтэд хүрсэнд би харамсаж байгаа. Сумын удирдалгууд эмчээ хээр орхиогүй. Гуйлтынх нь дагуу хүрэх газар нь хүргэж өгөөд, дуудлага өгсөн хүнд хүлээлгэж өгөөд өөрсдийнхөө зорьсон ажилдаа явсан байсан. Түүнийг нь би буруу ойлгож, стресстэй байхдаа олон нийтийн сүлжээнд худал мэдээлэл тараасандаа гэмшиж байна.