Баянзүрх дүүргийн 26 дугаар хорооны нутаг дэвсгэрт өчигдөр газ тээвэрлэж явсан том оврын автомашин зам тээврийн ослын улмаас дэлбэрч, галын улмаас гурван аврагч, хоёр иргэн амиа алдаж, 60 өрх орох оронгүй болсон. Цагдаагийн байгууллагаас шалгалтын ажиллагааг явуулж, “Дашваанжил” ХХК-ийн жолооч Ч.Ренчиндорж болон Батлан хамгаалах яамны Барилга захиалагчийн алба ТӨААТҮГ-ын дарга Э.Мөнхнаранг шалгаж байна.

   Батлан хамгаалах яамны Барилга захиалагчийн алба ТӨААТҮГ-ын дарга Э.Мөнхнарангийн унаж явсан “Ниссан патрол” загварын автомашин нь албаны машин байсан.

Бид энэ асуудалтай холбоотойгоор Батлан хамгаалахын сайд Г.Сайханбаяртай холбогдож, дараах тодруулгыг авлаа.

 -БХЯ-ны Барилга захиалагчийн алба ТӨААТҮГ-ын дарга Э.Мөнхнаран албаны машинтай явж байгаад осолд орсон. Энэ асуудлыг БХЯ-ны дотоод хяналт, шалгалтаас шалгаж байгаа юу?

        -Тийм ээ, Дотоод хяналт, шалгалтаар шалгаад, Барилга захиалагчийн алба ТӨААТҮГ-ын дарга Э.Мөнхнаранг ажлаас нь түр түдгэлзүүлсэн байгаа. Хууль хяналтын байгууллагад шалгагдаад, буруутай эсэх нь тодорхой болно. Э.Мөнхнарангийн орны үүрэг гүйцэтгэгчийг томилчихсон байгаа. Манайхаас шаардлагатай арга хэмжээг авч, шийдвэрлэсэн. Мөн Э.Мөнхнарангийн унаж явсан автомашин яамны нэр дээр биш,  Барилга захиалагчийн албаны харьяанд бүртгэлтэй байдаг.

-Албаны харьяаны машиныг ямар учраас оройн цагаар унаж явсан юм бэ?

         -Барилга захиалагчийн алба гэдэг нь албаны хэрэгцээнд баригдаж байгаа барилга, байшинд хяналт тавих, захиалга өгөх үүрэг гүйцэтгэнэ. Осол болдог өдөр Э.Мөнхнаран Төв аймагт баригдаж байгаа барилгын явцтай танилцаад, буцаж явсан юм билээ. Албан ажлаар ажиллаад, гэр рүүгээ харьж явахдаа ийм осолд өртсөн гэдэг мэдээлэл өгсөн.

-Осолд өртсөн машинд Э.Мөнхнарангаас гадна өөр албаны хүн явсан уу?

            -Яваагүй, Э.Мөнхнаран ганцаараа явж байсан гэсэн мэдээлэл бий.

-Баярлалаа.