Дэлбэрэлтэд өртсөн таван хүн амиа алдаж, 60 айл орох оронгүй, унах унаагүй, өмсөх хувцасгүй гашуун өдрүүд өнгөрч байна, нийслэлд. Нүцгэн шахуу хүүхдээ тэврээд, гэрээсээ гарсан иргэд буудлын өрөөнд хоног төөрүүлж, түрээсийн байр хайсаар өдөр, хоногийг өнгөрөөж байна. 

            Тодруулбал, нэгдүгээр сарын 24-25-нд шилжих шөнө Баянзүрх дүүргийн 26 дугаар хороонд шингэрүүлсэн байгалийн хий (газ) тээвэрлэж явсан том оврын автомашин, суудлын автомашинтай мөргөлдсөн зам тээврийн осол гарсан. Харамсалтай нь, ослын улмаас орон сууц, автомашин шатаж, галыг унтраахаар ажиллаж байсан онцгой байдлын гурван албан хаагч газар дээрээ нас барж, 10 гаруй эмнэлэгт хүргэгдсэн юм. Түлэгдсэн хүмүүсийн биеийн байдал хүнд, Түлэнхийн төвд хэвтэн эмчлүүлж байна. Харамсалтай нь, галд өртөж, эмнэлэгт хүргэгдсэн хоёр хүн шархаа даалгүй амиа алдаад байна. Тодруулбал, 60-95 хувийн түлэгдэлтэй байсан 19, 51 настай эрэгтэй амиа алджээ. Талийгаачид гал гарах үед замын ойролцоо явж байсан бөгөөд сантехникийн ажлаар дуудлагаар явж байжээ. Тэгвэл нөхцөл байдал ямар байгаа талаар сурвалжиллаа.

115 МӨРДӨГЧ ОСЛЫН ШАЛТГААНЫГ ОЛОХООР АЖИЛЛАЖ БАЙНА

Улсын ерөнхий прокурорын газраас Баянзүрх дүүргийн 26 дугаар хорооны нутаг дэвсгэрт байрлах “Дүнжингарав” худалдааны төвийн замд гарсан галын хэрэгт Ажлын хэсэг байгуулаад байна. Тус Ажлын хэсэгт Нийслэл, Тээвэр, дүүргийн прокурорын газрын дөрвөн прокурор, цагдаагийн байгууллагын 115 мөрдөгч багтаж, шалгалтын ажиллагааг явуулж байна.

Эх сурвалжийн мэдээлж буйгаар “Галын дүгнэлт хоёрдугаар сарын эхний долоо хоногт гарна. Одоогийн байдлаар мөрдөн шалгах ажиллагаа үргэлжилж байна. Энэ ослын учир шалтгааныг хурдан хугацаанд тогтоох, шалгах чиглэл ирсэн юм билээ. Өргөн бүрэлдэхүүнтэйгээр ажиллаж байгаа учраас буруутай этгээдийг тогтоож, иргэдийг хохиролыг барагдуулна” гэлээ.

“ДААТГАЛГҮЙ МАШИНУУДЫН ТӨЛБӨРИЙГ ТӨЛӨХГҮЙ”

Галын улмаас 30 гаруй машин шатаж, дэлбэрэлтэд өртсөн. Иргэдийн хохиролыг барагдуулсан эсэх талаар гурван жолоочтой холбогдож, тодрууллаа.

Жолооч Р: Миний машин шатсан барилгын доод талын зогсоолд байсан. Зөвхөн төмөр нь л үлдэж, хогийн цэгт тушаахаар болсон. Тээврийн хэрэгслийн даатгалгүй, зөвхөн жолоочийн хариуцлагын даатгалтай байсан. Ийм учраас даатгалаас ямар ч төлбөр орж ирэхгүй гэсэн үг. Иргэдэд төрөөс түрээсийн байрны мөнгө олгож байгаа шүү дээ. Харин бидний машинд нөхөн төлбөр олгох боломжгүй гэж байна лээ. Зөвхөн буруутай этгээд нь тогтоогдож байж төлбөрийг тэр талаас гаргуулна гэсэн. Мөрдөн шалгах ажиллагаа хэдий хэр хугацаанд үргэлжилэхийг бид мэдэхгүй. Тэгэхээр машингүй хэдэн сар, бүр хэдэн жил болж магадгүй байна. Хурдан шийдээд өгөөсэй л гэж залбирч байна. Миний машин Mercedes-Benz загварын машин байгаа. Үнэлгээ нь 50 сая төгрөг.

Жолооч Б: Миний машины үнэлгээ 27 сая төгрөг. Би “Приус-30” маркийн автобус машин аваад удаагүй байсан. Тээврийн хэрэгслийн даатгал байхгүй учраас надад төрөөс болон даатгалаас ямар ч нөхөн төлбөр ирэхгүй юм билээ. Тээврийн хэрэгслийн даатгалтай байсан машинуудын эзэнд нөхөн төлбөр олгосон байна лээ. Үлдсэн хэд нь зөвхөн буруутай этгээдийг хүлээхээс өөр сонголтгүй. Буруутай нь тогтоогдсон жолооч төлбөрийн чадваргүй бол бидний эд хөрөнгийг төлж өгч чадахгүй ч байж мэднэ. Үнэхээр гайхаж байна. Өөрсдөө амьд гарсандаа баярлаж байгаа ч эд хөрөнгөөрөө хохироод хэцүү байна. Бидний асуудлыг хурдан шийдээд өгөөсэй.

Жолооч С: Тээврийн хэрэгслийн даатгалгүй жолоочид хохирч байна. Үнэндээ байрны зээл, хэрэглээний зээлтэй хүмүүс машинаа 300, 400 мянган төгрөгөөр жил бүр даатгаад байж чадахгүй шүү дээ. Гэхдээ Монголын нөхцөлд даатгуулахаас өөр ямар ч сонголтгүй байна. Хэзээ л бол хэзээ аюул аваар тулгарна, эд хөрөнгө, амь нас, эрүүл мэндээрээ хохирч болохыг харлаа. Бидний төлбөрийг хурдан шийдэж өгөөсэй л гэж хүсэж байна.

ГАЛД ӨРТСӨН БАЙРНЫ ОРШИН СУУГЧИД: ЕСДҮГЭЭР САР ХҮРТЭЛ ТҮРЭЭСИЙН БАЙРАНД АМЬДРАХ ГЭРЭЭ ХИЙСЭН

Бид үргэлжлүүлэн галд өртсөн орон сууцны оршин суугчидтай холбогдлоо.

“Эдү апарт” хотхоны оршин суугч Э: Манай байр ипотекийн зээлтэй байсан. Өөрөөр хэлбэл, зээлээр авсан учир даатгалын компаниар жил бүр даатгуулдаг байсан гэсэн. Манай байр “Хаан” даатгалд даатгуулсан байсан юм. Үнэлгээний компаниас хүмүүс ирээд, уулзаад явсан. Хачирхалтай, үнэлгээний газар болон даатгалын ажилтнууд “Обой, шал чинь шатаагүй байна” гээд үнэлгээгээ багасгаж байгаа юм шиг байна лээ. Гэхдээ хөө тортог болсон шүү дээ. Биднийг толбо болсон обойгоо угаагаад, шалаа зүлгээд амьдарч болно гэж байх шиг байна. Бид гэнэтийн осол, аваараас л урьдчилан сэргийлж өчнөөн мөнгө төлж, орон сууцаа даатгаж байгаа шүү дээ. Гэтэл урдаас тийм зүйл яриад байж байгаа нь бухимдал төрүүлж байна. Одоогоор даатгалаас мөнгө төгрөг тушаасан, олгосон зүйл алга. Бид энэ сарынхаа ипотекийн зээлээ төлөөд л байж байна. Дараа сарынхыг ч бас төлөх бололтой. Үнэлгээ хийдэг хүмүүс сэтгэлтэй байгаасай. Хэдийгээр тавилга, эд хогшил маань бүрэн шатаагүй ч хүн амьдархааргүй болсон гэдгийг харж байгаа шүү дээ. Гэтэл “энэ чинь бүтэн байна, тэр чинь болж байна” гэх юм.

            “Эдү апарт” хотхоны оршин суугч Д: Төртэй хийх түрээсийн гэрээгээ хийсэн. Мөнгө нь орж ирээгүй байгаа учраас түрээслэх байр олоогүй байна. Хэрэв мөнгө нь ороод ирвэл түрээсийн байр хайна. Хүүхдүүд маань Баянзүрх дүүргийн 26 дугаар хороонд сургуульд явдаг учраас энэ хавьдаа байр түрээсэлнэ. Бид ирэх есдүгээр сар хүртэл түрээсийн байранд амьдрах гэрээ хийсэн. Одоогоор түрээсийн мөнгө ороогүй учраас ах, дүүгийнхээрээ амьдарч байна. Удахгүй, өнөө, маргаашгүй л мөнгө нь орно гэж хэлсэн.

“Эдү апарт” хотхоны оршин суугч Р: Улсын онцгой комисс, Барилга хот, байгуулалтын сайдын шийдвэрээр 30 гаруй хүний бүрэлдэхүүнтэй Ажлын хэсэг байгуулсан гэсэн. Ажлын хэсэгт контор, цахилгаан, Барилгын хөгжлийн төв гээд мэргэжлийн хүмүүс багтсан. Ажлын хэсгийн гишүүд манай шатсан байранд хоёрдугаар сарын 1, 2-нд ирж ажиллана гэсэн. Энэ үеэр галд өртсөн айлуудын эзэдтэй уулзаж, манай байрны нөхцөл байдлыг дүгнэнэ гэж байгаа. Энэ Ажлын хэсгийн дүгнэлтээс айлуудын хохирлын хэмжээ, байрны засварын үнэлгээ гарах юм билээ. Манайх одоогоор аавындаа амьдарч байгаа. Буудлын өрөөнд тохь муутай, хүүхдүүд зутраад байгаа учраас энд ирсэн. Зочид буудалд цөөн тооны хүн амьдарч байгаа. Бүгд түрээсийн гэрээ хийсэн, мөнгөө хүлээж байгаа. Хүүхдүүдийн сургууль, цэцэрлэг энэ долоо хоногт цахимаар хичээллэж байна. Дараа долоо хоногоос танхимаар хичээллэх учраас энэ хавьдаа бушуухан байр олно.

“Эдү апарт” хотхоны оршин суугч С: Танилцуулгаасаа зөрсөн, чанаргүй материалаар баригдсан байр болох нь тогтоогдлоо шүү дээ. Ийм учраас орон сууцыг барьж, ашиглалтад оруулсан хүмүүс ч гэсэн хариуцлага хүлээх нь зөв болов уу. Барьсан компанийг хариуцагчаар татаад шүүхэд өгөх хэрэгтэй гэж бодож байна. Галын дохиолол нь ажиллахгүй, галын үед ашиглах усан хангамж байхгүй, галд тэсвэргүй, стандартын бус материалаар барьсан барилга гэдэг нь л асуудал болно шүү дээ. Дээрээс нь, гал түймрийн үед хэрэглэх гарцыг хааж, хоёр орон сууц барьсан нь иргэдийг аюулд орууллаа. Барьсан барилгын эзэнд гомдолтой байна. Түрээсийн байраа хайж байна.

БАЯНЗҮРХ ДҮҮРГИЙН 26 ДУГААР ХОРООНД ХОЁР ӨРӨӨ ОРОН СУУЦНЫ ТҮРЭЭСИЙН ҮНЭ 1.2-1.7 САЯ ТӨГРӨГИЙН ҮНЭТЭЙ БАЙНА

Бид мэдээлэл хүргэх үүднээс хэд хэдэн байр түрээслэх зараар холбогдож, үнэ ханш сонирхлоо.

-Баянзүрх дүүргийн 26 дугаар хороо “Олимп” хотхонд хоёр өрөө орон сууцны үнэ 1.2-1.7 сая төгрөгийн үнэлгээтэй байна. Хоёр өрөө орон сууцны хувьд 50 мкв бөгөөд төлбөрийг гурван сараар авна. Мөн ихэнх байрууд төлбөрийг 3-6 сараар авч, дээрээс нь барьцаа хөрөнгө авна гэж бичжээ.

-Баянмонгол  хороололд  хоёр өрөө орон сууцны түрээсийн төлбөр 1.5 сая төгрөг байна. Төлбөрийг дөрвөн сараар тооцож авна.

-Саншайн хотхонд 53 мкв хоёр өрөө орон сууцны түрээсийн 1.7 сая төгрөг. Түрээсийг дөрвөн сараар авна.

-Их монгол хороололд 33.5 мкв хоёр өрөө орон сууны түрээсийн үнэ 1.2 сая төгрөг. Төлбөрийг гурван сараар барьцаа хөрөнгөтэй авна.

АМИА АЛДСАН ИРГЭНИЙ АР ГЭР: УС АЛДААД БАЙНА ГЭСЭН ДУУДЛАГААР ЯВЖ БАЙГААД ГАЛД ӨРТӨЖ, АМИА АЛДЧИХЛАА