“Шувуу ажиллагаа”-ныхан ууртай байгаа гэнэ. Улсын урд хилийг, Өмнөговийн баруун хязгаарыг хятадуудад зараад алга болсон Өмнөговь аймгийн ИТХ-ын дарга Б.Бадрааг хайгаад бухимдуу байгаа бололтой. Б.Бадраа БНСУ руу яваад сураггүй алга болж, “шувуу” болсон өдрөөс нь хойш түүнийг эрэн хайж байгаа ажээ. Тэгвэл Үндсэний аюулгүй байдалд заналхийлж, улсын газар нутгаас гадаадын иргэдэд зарсан гэх Б. Бадрааг “Шувуу ажиллагаа”-гаар авчирахаар судалж байгаа бололтой. Түүнийг Солонгосын аль дүүрэг, мужид байгааг тогтоохоохоор хуулийн байгууллагынхан ажиллаж байгаа гэнэ.

Өмнөговь аймгийн ИТХ-ын дарга Б.Бадраа, түүний хүү Б.Наранболд, эхнэр Б.Сайханжаргал, Ханбогд сумын Засаг дарга Х.Нэхийт болон тус сумын холбогдох албан тушаалтнууд Цагаан хад суурьшлын бүсэд хууль бусаар газар авч, БНХАУ-ын иргэдэд өндөр үнээр худалдсан гэх. Монгол Улсын үндсэн хуульд заналхийлсэн, улс дамнасан газрын наймаачид гэгдэх Б.Бадраа, Х.Нэхийт нарыг хууль, хяналтын байгууллагаас сүр дуулиантайгаар шалгаж, эд хөрөнгийг нь хурааж, заримыг нь баривчилаад байна. Өнгөрсөн оны арванхоёрдугаар сарын 25-нд Өмнөговийн газрыг Хятадуудад хууль бусаар эзэмшүүлсэн гэх Өмнөговь аймгийн Ханбогд сумын Засаг дарга асан Х.Нэхийт, Ш.Эрдэнэжаргал, Өмнөговь аймгийн ИТХ-ын дарга асан Б.Бадраа нарт цагдан хорих таслан сэргийлэх арга хэмжээ авах саналыг прокуророос шүүхэд хүргүүлж, улмаар шүүх уг саналыг хэлэлцсэн.  Тодруулбал, Өмнөговь аймгийн Ханбогд сумын Засаг дарга асан Х.Нэхийт, Ш.Эрдэнэжаргал нарыг АТГ-аас шалгаж, 30 хоног цагдан хорьсон. Харин Б.Бадрааг улсын хилээр орж ирсэн даруй цагдан хорих шүүхийн шийдвэр гараад байна. Нэгэнт ийм шийдвэр гарсан учраас Б.Бадраа өөрийн хүсэлтээр ирэхгүй нь тодорхой болсон. Харин “Шувуу ажиллагаа”-гаар шүүрэхээс өөр аргагүйд хүрээд байгаа бололтой.

Өнгөрсөн арваннэгдүгээр сарын 31-нд Өмнөговь аймгийн ИТХ-ын дарга Бадамгаравын Бадраа, түүний хүү Б.Наранболд, Ханбогд сумын Засаг дарга Х.Нэхийт нарыг прокурорын зөвшөөрлөөр шалгаж гэр, болон албан өрөөнөөс нь эх үүсвэр тодорхойгүй их хэмжээний мөнгө, үнэт эдлэл хураан авсан юм. Тухайлбал, Б.Бадраагийн гэрээс 300 сая төгрөг, юань, үнэт эдлэл, галт зэвсэг, сум зэргийг хурааж авсан аж. Б.Бадрааг Хан-Уул дүүрэгт өндөр зэрэглэлийн олон тооны орон сууц, үл хөдлөх хөрөнгө, өндөр үнэтэй автомашинууд худалдан авч, мөрийтэй тоглож, хууль бусаар олсон мөнгийг хувиргаж, мөнгө угаах гэмт хэрэг үйлдсэн гэж хуулийн байгууллагаас урьдчилсан байдлаар тогтоогоод байсан. Үүнтэй холбоотойгоор түүний 2020 оны хөрөнгө орлогын мэдүүлгийг судалж үзэхэд, “38.400 сая төгрөгийн орлоготой,  хоёр тэрбум, 805 саяар үнэлэгдэх хоёр орон сууцтай, үйлчилгээний зориулалттай нэг оффистой, 38 хурдан удмын морьтой, 55 саяар үнэлэгдэх малтай, гурван төрлийн өмчлөх газартай, 20 сая төгрөгийн үнэт эдлэлтэй, 147 сая төгрөгийн хадгаламжтай, "Эрдэнэт хивс" ХК, "Эрдэнэс таван толгой" ХК, "Эрхэм нар" ХХК, "Говил" ХХК, "Түвшин наран" ХХК," Говийн долгион" ХХК-аас 142 сая төгрөгийн орлого олдог гэдгийг олон нийтэд ил болгосон. Харин 2013 оноос түүний автомашин, орон сууц, эзэмших газрын тоо хэмжээ, орлого хоёр дахин нэмэгдсэн байдаг.