Улсын заан Н.Жаргалбаяр, улсын начин Э.Нямаа нарыг “цол наймаалцсан” хэрэгт хууль хяналтын байгууллагаас шалгаж байсан. Тодруулбал, өнгөрсөн жилийн Үндэсний их баяр наадмын бөхийн барилдааны тавын даваанд Н.Жаргалбаяр зааны Өмнөговь аймгийн Засаг даргын орлогч Н.Энхбаттай утсаар ярьсан бичлэг ил болсон юм. Бөхийн барилдааны тавын даваанд Н.Жаргалбаяр заан ам авах гэж 30 минут саатсан. Түүний гар утас дуугарч, “Жаргалбаяр заан уу”, “Тийм байна аа”, “Би Өмнөговь аймгийн Засаг даргын орлогч байна” гэсэн байдаг. Тэдний харилцан яриа дараах байдлаар 50 орчим секунд үргэлжилсэн юм.

-Өмнөговь аймгийн Засаг даргын орлогч Н.Энхбат: Манай нөгөө аймгийн арслан Э.Нямааг авчих. Жагаа, Жагаа Өмнөговь аймгийн Нямаа гээд авчих за.

-Улсын заан Н.Жаргалбаяр: Хэд юм?

-Н.Энхбат: Чи тоогоо хэл.

  Ингэж ярихтай зэрэгцээд Н.Жаргалбаяр зааныг гарын даа “За хурдан бөхөө амлаарай. Хоёулаа баахан телевиз, радиогоор гарч байна шүү” гэж хэлээд тэдний харилцан яриа өндөрлөж байгаа бичлэг цахим сүлжээнд цацагдсан байдаг. Ингэж ярьсны дараахан улсын заан Н.Жаргалбаяр Өмнөговь аймгийн арслан Э.Нямааг амлан авсан билээ. Улмаар барилдаанд аймгийн арслан Э.Нямаа улсын заан Г.Жаргалбаяраар тав давж, начин цолны болзол хангасан байдаг.

       Тэгвэл энэ хэргийг хууль хяналтын байгууллагаас шалгаж эхэлсэн. Тодруулбал, АТГ-ын мөрдөгчид Өмнөговь аймгийн Засаг даргын орлогч Н.Энхбат, улсын заан Н.Жаргалбаяр нарыг авлига авч, өгөлцсөн байж болзошгүй үндэслэлээр хэрэг бүртгэл нээж, шалгаж эхэлж байсан юм. Учир нь, энэ хэрэгт улс төрийн албан тушаалтан оролцож, эрх мэдэл, албан тушаалын байдлаа урвуулан ашигласан байж болзошгүй билээ.

        Бид тухайн үед Өмнөговь аймгийн Засаг даргын орлогч Н.Энхбатаас тодруулахад “Би өөрөө улсын наадамд үзээд сууж байна. Тэр бичлэгийг харсан. Хүмүүс надаар тоглож байгаа байх. Би Н.Жаргалбаяр заанд мөнгө амлаагүй. Н.Жаргалбаяртай яриа ч үгүй. Мэдэхгүй” гэсэн хариулт өгсөн билээ.

Тэгвэл хууль хяналтын байгууллагаас буюу АТГ, ТЕГ-аас улсын заан Н.Жаргалбаяр, улсын начин Э.Нямаа, Өмнөговь аймгийн Засаг даргын орлогч Н.Энхбат нарыг шалгаж, мэдүүлэг байцаалт авчээ. Мөн Н.Жаргалбаяр, Э.Нямаа, Н.Энхбат болон тэдний хамаарал бүхий этгээдүүдийн дансыг шалгаж, авлига өгсөн, авсан эсэхийг шалгасан гэнэ. Тэр бүү хэл Өмнөговь аймгийн ЗДТГ-ын дансны мэдээллийг хүртэл эд мөрийн баримтаар хураан авч, шалгасан ажээ.

Эх сурвалжийн бидэнд өгсөн мэдээллээр “Н.Жаргалбаяр, Э.Нямаа, Н.Энхбат нарт холбогдох хэргийг шалгаж дууссан. Өнгөрсөн оноос хойш шалгаж, хэд хэдэн удаа мэдүүлэг, байцаалт авсан. Шалгалтын явцад мөнгө шилжүүлсэн, авсан баримт илрээгүй учраас тэдэнд холбогдох хэргийг хааж байгаа сураг дуулдана лээ. Тэгэхээр даваа, цол наймаалцсан энэ хэрэг хаагдаж байгаа гэсэн үг” гэсэн юм.

Н.Жаргалбаяр заантай утсаар ярьж,  мөнгө санал болгосон гэх Н.Энхбат нь Өмнөговь аймгийн Засаг даргын Уул уурхай, дэд бүтэц, хөдөө аж ахуй, байгаль орчны асуудал хариуцсан орлогч дарга албан тушаалтай. Тэрбээр Өмнөговь аймгийн ХААН банкны захирлаар 2010-2020 он хүртэл 10 жил ажилласан, Өмнөговь аймгийн ИТХ-д 2012, 2016, 2020 онд гурван удаа сонгогдсон намтартай нэгэн.

Харин Улсын заан Н.Жаргалбаяр нь  Сэлэнгэ аймгийн Мандал сумын харьяат юм. Тэрбээр 2016 онд Ардын хувьсгалын 95 жилийн ойн баяр наадамд Улсын харцага Т.Өсөх-Ирээдүйгээр тав, зургаагийн даваанд Аймгийн арслан Ч.Хөхчирэнгэртэй тунан барилдаж даван Монгол Улсын харцага цол хүртсэн байдаг. Харин 2017 онд Ардын хувьсгалын 96 жилийн ойн баяр наадамд улсын аварга Г.Эрхэмбаяраар долоо даван шөвгөрч улсын заан цол хүртсэн билээ. Мөн 97 жилийн ойн баяр наадамд улсын арслан Ц.Содномдоржоор долоо даван шөвгөрч улсын заан цолоо батлан чимэг нэмсэн байдаг.