-СУВИЛАГЧИД ХҮҮХДҮҮДЭД ТАРИАГ ХУРДАН ШАХСАН, ТАРИАГАА НАЙРУУЛААД УДСАН БАЙЖ БОЛЗОШГҮЙ-

        Яармагийн 300 ортой эмнэлэг буюу Эх, нярай хүүхдийн үндэсний хоёрдугаар төвд  хэвтэн эмчлүүлж буй 0-2 насны 17 хүүхэд тариа хийлгэсний дараа таталт өгч, биеийн байдал нь муудсан талаар бид өмнө нь мэдээлсэн.

Тодруулбал, томуу, томуу төст өвчнөөр өвдөж, ханиад нь хүндэрсэн, хатгаа туссан гэх шалтгаанаар тус эмнэлэгт хэвтэж, 4-5 хоног эмчилгээ хийлгэсэн 17 хүүхдийн биеийн байдал гэнэт муудаж, таталт өгч, өндөр халуурч, сэхээн амьдруулах тасагт шилжсэн билээ. Хууль хяналтын байгууллагаас тус эмнэлэгт шалгалтын ажиллагаа явуулж, мөрдөн шалгах ажиллагааг үргэлжлүүлж байна.

Тэгвэл бид хүүхдүүдийн биеийн байдал ямар байгаа талаар Эх, нярай хүүхдийн үндэсний хоёрдугаар төвийн захирал А.Эрдэнэтуяагаас тодрууллаа.

Тэрбээр “Тариа тариулсны улмаас биеийн байдал нь муудсан гэх 17 хүүхдийн эрүүл мэнд сайжирч, тогтворжсон. Мөн хүүхдүүдийн ханиад, томуу ч эдгэж, өнөөдөр, маргаашаас эмнэлгээс гарахаар зэхэж байна. Өнөөдөр эмчлэгч эмч нар нь хүүхдүүдийн биеийн байдлыг танилцуулж, эмнэлгээс гарах, эсэхийг нь шийднэ. Энэ асуудал юунаас болж гарсан, хүүхдүүдийн биед яагаад гэнэт өөрчлөлт гарсан зэрэг нь одоогийн байдлаар тодорхой болоогүй байна. Хууль хяналтын байгууллага болон Эрүүл мэндийн яамнаас шалгалтын ажиллагааг явуулж байгаа. Урьдчилсан байдлаар сувилахуйн технологийн стандарт зөрчигдсөн байж болзошгүй гэж үзэж байгаа. Тухайлбал, тариагаа найруулаад удсан, хүүхдийн биед тариагаа хурдан шахсан байж болзошгүй. Энэ үндэслэлээр шалгаж байна. Тухайн өдөр ээлжинд гарч, хүүхдүүдэд тариа хийсэн сувилагчдад одоогийн байдлаар хариуцлага хүлээлгээгүй байна. Хэрэв энэ асуудал олон нийтийн анхааралд очиж, хуулийн байгууллагад шалгагдаагүй байсан бол бид дотоод журмаараа хариуцлага хүлээлгэх байсан. Харин одоо энэ асуудал олон нийтийн анхааралд байгаа” гэв.

ТАРИА ТАРИУЛСАН ХҮҮХДИЙН АР ГЭР: ЦААШИД ГАРАХ СӨРӨГ НӨЛӨӨНӨӨС НЬ АЙЖ БАЙНА

        Харин бид хүүхэд нь өвдөж, таталт өгсөн иргэнтэй холбогдож, тодруулахад “Хүүхдийн маань биеийн байдал тогтворжсон. Гэхдээ бие нь нэг л сулбагар, туниа муутай байна. Манай хүүхэд хатгалгаатай байсан учраас эмнэлэгт хэвтсэн. Эмч нар хоёр уушгийг нь чагнаад, эдгэрч байна гэж хэлсэн. Удахгүй эмнэлгээс гарах юм шиг байна лээ. Гэхдээ цаашид гарах сөрөг нөлөөг нь мэдэхгүй учраас айдастай байна. Хэдийгээр эмнэлгийн зүгээс 18 нас хүртэл нь биеийг нь хянана гэж байгаа ч эрсдлийг тооцох аргагүй шүү дээ” гэлээ.

ШИНЖИЛГЭЭНИЙ ХАРИУ ӨНӨӨДӨР ГАРНА

Харин бид энэ талаар холбогдох албаныхнаас тодруулах гэсэн боловч шалгалтын ажиллагаа явуулж байна гэхээс аар дорвитой хариулт өгөөгүй юм.

Тодруулбал, Эрүүл мэндийн яамны мэргэжилтэн “Шалгалтын ажиллагаа явуулж байна. Шинжилгээний хариу өнөөдөр гарна” гэлээ.