-ОХУ-ЫН ЭЛЧИН САЙДЫН ЯАМНААС МОНГОЛЫН ТАЛД НОТ БИЧИГ ХҮРГҮҮЛЭХ ҮҮ-

Зам тээврийн хөгжлийн яамнаас “Тээврийн долоо хоног 2023” олон улсын форумыг энэ сарын 6-10-ныг хүртэл Улаанбаатар хотод зохион байгуулсан. Гадна, дотнын зочид төлөөлөгчид оролцсон уг форумаар бүсийн хэмжээнд тээвэр, логистикийн салбарын эдийн засгийн хамтын ажиллагааны үр өгөөжийг нэмэгдүүлэх, хил дамнасан тээврийг хөнгөвчлөх, тээврийн салбарт харилцан уялдаатай холболтыг бий болгох, гааль, тариф, хилийн горим журам, баримт бичиг, дата мэдээллүүдийн нийцлийг сайжруулах, тээврийн коридоруудыг хөгжүүлэх, салбарын тулгамдаж буй бусад асуудлуудыг хамтран шийдвэрлэх асуудлуудыг хэлэлцсэн юм.

Тэгвэл уг форумын үйл ажиллагааны дараа Зам, тээврийн хөгжлийн яамнаас зочид гадаад, дотоодын төлөөлөгч нарыг угтан авах хүндэтгэлийн арга хэмжээг Их тэнгэрийн аманд зохион байгуулжээ.

Энэ үеэр Зам, тээвэр хөгжлийн сайд С.Бямбацогт УБТЗ ХНН-ийн дарга нарыг загнаж, сүрдүүлсэн хэмээн эх сурвалж мэдээллээ. Тодруулбал, тэрбээр УБТЗ ХНН-ийн орлогч дарга Д.Амарбаясгалан, Удирдлагын асуудал хариуцсан орлогч дарга Н.Энхцогт, Хөдөлгөөн хариуцсан замын орлогч дарга Ш.Нямсүрэн, Техникийн бодлого, стандартчиллын албаны дарга С.Мөнх-Алдар нарыг “ОХУ-ын талд ажилласан хэмээн буруутгажээ. Зарим эх сурвалжийн мэдээлснээр гар хүрсэн гэх асуудал ч яригдаж байгаа гэнэ. Үүнтэй холбоотой ОХУ-ын Элчин сайдын яамнаас Монголын талд нот бичиг хүргүүлэхээр болсон аж. УБТЗ ХНН-ийг Монгол, ОХУ-ын Засгийн газрууд хувь тэнцүү эзэмшдэг билээ.